Mose I, 7 - BAIBLO ALOO NGMAMI KLƆUKLƆU Ɔ

Nyu kpekpemi ɔ

¹ Yawɛ de Noa ke, “Yaa sɛ lɛ ɔ mi; mo, kɛ nihi nɛ ngɛ o we ɔ mi ɔ tsuo; ejakaa i na kaa mo pɛ ji nɔ nɛ peeɔ nɔ́ nɛ da ngɛ je ɔ mi tsuo.

² Ngɔɔ lohwe nane eywiɛɛywiɛtsɛmɛ nɛ a he tsɔ, eku kpaago kɛ eyo kpaago, kɛ ní nɛmɛ nɛ a he tsɔ we lɛɛ eku kɛ eyo kakaaka pɛ kɛ wo lɛ ɔ mi.

³ Lohwe pɛlitsɛmɛ hu, ngɔɔ eko tsuaa eko eku kpaago kɛ eyo kpaago kɛ wo lɛ ɔ mi. Moo pee enɛ ɔ, konɛ lohwe ɔmɛ tsuo a yi nɛ na wami, nɛ a fɔ kɛ wo je ɔ mi ekohu.

⁴ Hiɛmɛ nɛ ɔ otsi ɔ, ma ha nɛ hiɔmi maa nɛ ngɛ je ɔ mi nyɔ kɛ pia ligbi nyingmi eywiɛ, nɛ ma kpata níhi tsuo nɛ i bɔ nɛ wami ngɛ a mi ɔ a hɛ mi.”

⁵ Noa pee nɔ́ tsuaa nɔ́ nɛ Yawɛ fa lɛ ke e pee ɔ.

⁶ Noa ye jeha lafa ekpa benɛ nyu kpekpemi ɔ ba je ɔ mi ɔ.

⁷ E kɛ e yo, kɛ e binyumu ɔmɛ, kɛ a yi ɔmɛ ya sɛ lɛ ɔ mi nɛ a kɛ tu nyu kpekpemi ɔ nya fo.

^8-9 Nɛ kaa bɔ nɛ Mawu fa Noa a, lohwe tsuaa lohwe ya sɛ lɛ ɔ mi, eku kɛ eyo eku kɛ eyo: lohwehi nɛ a he tsɔ kɛ ní nɛmɛ nɛ a he tsɔ we, pɛlitsɛmɛ, nane eywiɛɛywiɛtsɛmɛ, kɛ ní nɛmɛ nɛ sãã si tsuo.

¹⁰ Ligbi kpaago se ɔ, nyu kpekpemi ɔ nɛ ngɔ pue zugba a nɔ.

¹¹ Benɛ Noa ye jeha lafa ekpa a, jamɛ a jeha a we hlami enyɔne ɔ ligbi nɛ ji nyɔngma kɛ kpaago ɔ nɔ ɔ, zugba a nɔ nyu hɛngmɛhi babauu ɔ tsuo hia, nɛ hiɔwe saflɛ ɔmɛ tsuo bli,

¹² nɛ hiɔmi nɛ ngɔ pue zugba a nɔ nyɔ kɛ pia ligbi nyingmi eywiɛ.

¹³ Jamɛ a ligbi ɔ nɔuu ɔ, Noa kɛ e yo ɔ, kɛ e binyumu etɛ ɔmɛ, Shem, Ham, kɛ Yafet, kɛ mɛ hu a yi ɔmɛ sɛ lɛ ɔ mi.

¹⁴ A kɛ lohwe slɔɔtoslɔɔtohi sɛ lɛ ɔ mi: we mi lohwehi, pu mi lohwehi, lohwe nguahi kɛ wawihi, kɛ pɛlitsɛmɛ.

^15-16 Kaa bɔ nɛ Mawu fa Noa a, nɔ́ tsuaa nɔ́ nɛ wami ngɛ e mi ɔ kɛ mɛ sɛ lɛ ɔ mi eku kɛ eyo eku kɛ eyo. Kɛkɛ nɛ Yawɛ nga sinya a kɛ wo Noa yi.

¹⁷ Nyu kpekpemi ɔ nɛ ngɔ pue zugba a nɔ ligbi nyingmi eywiɛ. Benɛ nyu ɔ ba hiɛ saii ɔ, e wo lɛ ɔ nɔ kɛ je zugba.

¹⁸ Enɛ ɔ se ɔ, nyu ɔ ba babauu ngɛ zugba a nɔ. Kɛkɛ nɛ lɛ ɔ hia nɛ e bɔni nyɛɛmi kɛ ngɛ yae kɛ ngɛ bae ngɛ nyu ɔ hɛ mi.

^19-20 Jehanɛ, nyu ɔ ba babauu nitsɛ kɛ ya si e ha yo gagaaga amɛ tsuo a nɔ nɛ a yi laa maa pee gugue eywiɛ.

²¹ Nɔ́ tsuaa nɔ́ ngɛ je ɔ mi nɛ wami ngɛ e mi ɔ gbo: lohwe pɛlitsɛmɛ, we mi lohwehi, pu mi lohwehi, kɛ ní nɛmɛ nɛ sãã si, kɛ nimli adesahi tsuo pɛpɛɛpɛ.

²² Je mi nɔ́ tsuaa nɔ́ nɛ woɔ mumi ɔ gbo.

²³ Yawɛ kpata nɔ́ tsuaa nɔ́ nɛ ngɛ hɛ ngmengmle ngɛ je ɔ mi ɔ hɛ mi: nimli adesahi, lohwe pɛlitsɛmɛ, lohwe nane eywiɛɛywiɛtsɛmɛ, kɛ ní nɛmɛ nɛ sãã si. Noa kɛ ni nɛmɛ nɛ e kɛ mɛ ngɛ lɛ ɔ mi ɔ pɛ nɛ a piɛ.

²⁴ Nyu kpekpemi ɔ ha zugba a nɔ ligbi lafa kɛ nyingmi enuɔ.