Mose I, 6 - BAIBLO ALOO NGMAMI KLƆUKLƆU Ɔ

Adesa yi mi wa

¹ Nimli adesahi a he ba hiɛ ngɛ je ɔ mi, nɛ a fɔ biyihi.

² Mawu binyumu ɔmɛ ekomɛ na kaa yi nɛ ɔmɛ a he ngɛ fɛu; lɔ ɔ he ɔ, a ngɔ a ti ni nɛmɛ nɛ a suɔ.

³ Kɛkɛ nɛ Yawɛ de ke, “I be hae nɛ nɔmlɔ nɛ hi je mi kɛ ya neneene; ejakaa nɔ́ nɛ gboɔ ji lɛ. Kɛ je be nɛ ɔ mi kɛ yaa a, nɔmlɔ be yee pe jeha lafa kɛ nyingmi enyɔ.”

⁴ Jamɛ a be ɔ mi, benɛ Mawu binyumu ɔmɛ kɛ nimli a biyi ɔmɛ, ba na bɔmi, nɛ a kɛ mɛ bɔni fɔmi ɔ, oblaihi ngɛ je ɔ mi. Mɛ ji blema katsɛmɛ, kɛ nimli nɛ a he biɛ.

⁵ Benɛ Yawɛ na kaa nimlihi a yi mi wa, nɛ nɔ́ yaya pɛ a susuɔ daa nɛ ɔ,

⁶ e dɔ lɛ nɛ e pia e he kaa e bɔ nɔmlɔ nɛ e kɛ lɛ wo je ɔ mi.

⁷ Lɔ ɔ he ɔ, Yawɛ de ke, “Ma kpata nɔmlɔ nɛ i bɔ ɔ e hɛ mi; pi nɔmlɔ kɛkɛ, se lohwehi tsuo: nane eywiɛɛywiɛtsɛmɛ, pɛlitsɛmɛ kɛ ní nɛmɛ nɛ sãã si. E dɔ mi kaa i pee mɛ.”

⁸ Se Noa lɛɛ, Yawɛ bua jɔ e he.

Noa he sane

^9-10 Noa he sane ji nɛ ɔ nɛ. Noa ngɛ binyumuhi etɛ: Shem, Ham, kɛ Yafet. Noa nɛ ɔ, piami ko be e he; e be ɔ mi ɔ, lɛ pɛ ji dalɔ, nɛ e peeɔ Mawu suɔmi nya ní.

¹¹ Se nimli kpa amɛ lɛɛ a peeɔ yayami ngɛ Mawu hɛ mi, nɛ basabasa ngɛ je ɔ mi he tsuaa he.

¹² Kɛkɛ nɛ Mawu na kaa je ɔ puɛ, ejakaa nimli ɔmɛ tsuo ngɛ yayami pee.

¹³ Mawu de Noa ke, “I to kaa ma kpata nimli adesahi tsuo kulaa a hɛ mi, ejakaa a ha je ɔ tsuo pee kɛ yayami sɔuu. Ɛɛ, ma kpata a kɛ je ɔ tsuo a hɛ mi.

¹⁴ Ngɔɔ tso kpakpa nɛ o kɛ kpɛ lɛ. Moo pee tsuhi ngɛ mi, nɛ o ngɔ amã kɛ kpa lɛ ɔ he kɛ e mi tsuo.

¹⁵ Bɔ nɛ o maa kpɛ lɛ ɔ ha ji nɛ ɔ nɛ: lɛ ɔ kami nɛ pee gugue nyingmi kpaago kɛ enuɔ, e blimi nɛ pee gugue nyɔngma kɛ enyɔ kɛ fa, konɛ e mi kuɔmi nɛ pee gugue kpaago kɛ fa.

¹⁶ Mo bu lɛ ɔ yi, nɛ o si blɔ maa pee nine mi blimi enyɔ ngɛ gba a kɛ lɛ ɔ nitsɛ a kpɛti. Moo kpɛ lɛ ɔ kaa hiɔwe tsu siaudo etɛ, nɛ o je sinya ngɛ kasa nya.

¹⁷ Ma ha nɛ nyu kpekpemi maa ba je ɔ mi nɛ e ma kpata nɔ́ tsuaa nɔ́ nɛ wami ngɛ e mi ɔ hɛ mi. Nɔ́ tsuaa nɔ́ nɛ ngɛ je ɔ mi ɔ hɛ mi ma kpata,

¹⁸ se moo lɛɛ i kɛ mo maa so. O kɛ o yo, kɛ o binyumu ɔmɛ, kɛ a yi ɔmɛ nɛ ba sɛ lɛ ɔ mi.

^19-20 Ngɔɔ lohwe tsuaa lohwe, eku kɛ eyo kɛ ba lɛ ɔ mi, konɛ a yi nɛ na wami: pɛlitsɛmɛ, nane eywiɛɛywiɛtsɛmɛ, kɛ ní nɛmɛ nɛ sãã si.

²¹ Jehanɛ, ngɔɔ, niye ní slɔɔtohi kɛ to, konɛ nyɛɛ kɛ lohwe ɔmɛ nɛ ye.”

²² Nɛ Noa pee nɔ́ tsuaa nɔ́ nɛ Mawu fa lɛ ke e pee ɔ.