Mose I, 50 - BAIBLO ALOO NGMAMI KLƆUKLƆU Ɔ

¹ Yosef wo ya ngɔ pue e tsɛ ɔ nɔ, nɛ e fiɔ e nya he.

² E fa e tsɔli nɛ peeɔ tsopa a ke a wo e tsɛ ɔ tsopa konɛ e ko puɛ; nɛ a pee ja.

³ A ngɔ ligbi nyingmi eywiɛ kɛ wo lɛ tsopa kaa bɔ nɛ a pɔɔ peemi ɔ; nɛ Egipt bi ɔmɛ nyɛ ya ha lɛ ligbi nyingmi kpaago.

⁴ Benɛ a pee ya gbe nya a, Yosef de matsɛ tsɔli ɔmɛ ke, “I kpa nyɛ pɛɛ nɛ nyɛ ya na Farao ɔ ha mi.

⁵ Nyɛ de lɛ ke, benɛ tsaatsɛ miɔ nɛ e ma gbo ɔ, e ha nɛ i ka lɛ kita kaa ke e gbo ɔ, ma ya pu lɛ ngɛ Kanaan zugba a nɔ, ngɛ yɔkɔ ɔ nɛ lɛ nitsɛ e tsua ngɔ fɔ si ɔ mi. Nyɛ de lɛ ke, i kpa lɛ pɛɛ nɛ e ha mi blɔ nɛ ma ya pu tsaatsɛ, nɛ ma kpale kɛ ba.”

⁶ Matsɛ ɔ he nɔ ke, “Yaa nɛ o ya pu o tsɛ ɔ kaa bɔ nɛ o ka lɛ kita ke o maa pee ɔ.”

⁷ Kɛkɛ nɛ Yosef ho nɛ e ya pu e tsɛ ɔ. Matsɛ tsɔli ɔmɛ, matsɛ we mi nikɔtɔma amɛ, Egipt ma nimeli ɔmɛ,

⁸ Yosef we mi bi ɔmɛ, e nyɛmimɛ ɔmɛ, kɛ e tsɛ we mi bi ɔmɛ tsuo pɛpɛɛpɛ kɛ lɛ ho. A bimɛ tsɔwitsɔwi ɔmɛ, kɛ a to ɔmɛ, kɛ a na amɛ pɛ nɛ piɛ ngɛ Goshen zugba a nɔ.

⁹ Zugba lɛhi, kɛ okpɔngɔhi a nɔ hili hu kɛ lɛ ho. Nihi babauu nitsɛ lɛ ho ɔ nɛ.

¹⁰ Benɛ a su ngma mi sami he ɔ ngɛ Atad, ngɛ Yordan pa a beleku je ɔ, a wo yana wawɛɛ ngɛ lejɛ ɔ be saii; nɛ Yosef pee kusumi kɛ nyɛ ya ligbi kpaago.

¹¹ Benɛ Kanaan zugba a nɔ bi ɔmɛ na ni ɔmɛ nɛ a ngɛ ya pee ngɛ ngma mi sami he ɔ ngɛ Atad ɔ, a de ke, “Egipt bi tsa pee we ya mɔbɔmɔbɔ kikɛ nɛ ɔ.” Enɛ ɔ he je ɔ, a wo lejɛ ɔ biɛ ke Abel Egipt. E ngɛ Yordan pa a beleku je.

¹² Yakob bimɛ ɔmɛ pee kaa bɔ nɛ e fa mɛ ɔ.

¹³ A ngɔ lɛ kɛ ya Kanaan nɛ a ya pu lɛ ngɛ tɛ puɔ ɔ nɛ ngɛ Makpela zugba a nɔ ɔ mi, ngɛ Mamre kasa nya. Abraham ji nɔ nɛ he zugba nɛ ɔ ngɛ Hit no ɔ nɛ a tsɛɛ lɛ Efron ɔ dɛ, nɛ e kɛ pee gɔ.

¹⁴ Benɛ Yosef pu e tsɛ gbe nya a, e kɛ e nyɛmimɛ ɔmɛ, kɛ nihi tsuo nɛ kɛ lɛ ya e tsɛ pumi ɔ kpale kɛ ba Egipt ekohu.

Yosef wo e nyɛmimɛ ɔmɛ bua

¹⁵ Benɛ Yakob gbo se ɔ, Yosef nyɛmimɛ ɔmɛ de ke, “Eko piɔ, wa he dɔmi ngɛ Yosef mi kɛ mwɔɔ, nɛ e maa to wɔ yayami tsuo nɛ wa pee lɛ ɔ nane mi.”

¹⁶ Enɛ ɔ he je ɔ, a ngɔ sɛ gbi ngɔ mane Yosef ke, “Loko tsaatsɛ gbo ɔ,

¹⁷ e ke wa de mo ke, ‘I kpa mo pɛɛ nɛ o kɛ o nyɛmimɛ ɔmɛ a yayami nɛ a pee mo ɔ ngɔ pa mɛ.’ Lɔ ɔ he ɔ, wa kpa mo pɛɛ nɛ o ngɔ wa yayami ɔ ngɔ pa wɔ; ejakaa wɔ hu o tsɛmɛ a Mawu ɔ lɛ wa jaa.” Benɛ a ya bɔ Yosef amaniɛ nɛ ɔ, e wo ya.

¹⁸ Jehanɛ, e nyɛmimɛ ɔmɛ nitsɛmɛ ba, nɛ a ba kpla si ngɛ e hɛ mi, nɛ a de lɛ ke, “Wɔ o nyɔguɛ ɔmɛ ji nɛ ɔmɛ nɛ.”

¹⁹ Se Yosef de mɛ ke, “Nyɛ ko ye gbeye. Nyɛ susu kaa Mawu ji mi lo?

²⁰ Nyɛɛ lɛɛ nyɛ so kaa nyɛ maa pee mi yayami, se Mawu tsake nyɛ yi mi tomi ɔ kɛ pee nɔ́ kpakpa; bɔ nɛ pee nɛ e kɛ he nihi babauu a yi wami, kaa bɔ nɛ e ba mi mwɔnɛ nɛ ɔ.

²¹ Lɔ ɔ he ɔ, nyɛ ko ye gbeye. Ma lɛ nyɛ, kɛ nyɛ bimɛ ɔmɛ.” Bɔ nɛ Yosef pee nɛ e kɛ munyu ngɔngɔɛhi wo e nyɛmimɛ ɔmɛ bua ji nɛ ɔ nɛ.

Yosef gbo

²² Yosef kɛ e tsɛ we mi bi ɔmɛ hi Egipt. E ye jeha lafa kɛ nyɔngma benɛ e gbo ɔ.

²³ E he bibimɛ kɛ gu Efraim nɔ. Jehanɛ, Manase binyumu Makir hu fɔ bimɛ kɛ wo weku ɔ mi.

²⁴ Yosef de e nyɛmimɛ ɔmɛ ke, “E be kɛe nɛ ma gbo. Se Mawu maa hyɛ nyɛ nɔ kɛ̃, nɛ e ma kpaka nyɛ kɛ je zugba nɛ ɔ nɔ kɛ ya zugba a nɛ e wo Abraham, kɛ Isak, kɛ Yakob he si ɔ nɔ.”

²⁵ Kɛkɛ nɛ Yosef ha nɛ e we bi ɔmɛ ka lɛ kita. E de mɛ ke, “Nyɛɛ wo mi si kaa ke Mawu ba kpaka nyɛ kɛ yaa jamɛ a zugba a nɔ ɔ, nyɛ maa ngɔ ye flɔ̃ ɔ kɛ ho.”

²⁶ Yosef gbo ngɛ Egipt benɛ e ye jeha lafa kɛ nyɔngma; nɛ a wo lɛ tsopa, nɛ a kɛ lɛ wo daka mi.