Mose I, 5 - BAIBLO ALOO NGMAMI KLƆUKLƆU Ɔ

Adam nina

¹ Adam nina he sane ji nɛ ɔ nɛ. Benɛ Mawu bɔ nɔmlɔ ɔ, e pee nɔmlɔ ɔ kaa bɔ nɛ lɛ Mawu ɔ e ngɛ ɔ.

² E bɔ nyumu kɛ yo nɛ e gbaa mɛ, nɛ e wo mɛ biɛ ke “adesa.”

³ Benɛ Adam ye jeha 130 ɔ, e fɔ binyumu ko nɛ je lɛ saminya, nɛ e wo lɛ biɛ ke Set.

⁴ Benɛ a fɔ Set se ɔ, Adam hi si jeha 800 nɛ e fɔ binyumuhi kɛ biyi kpahi.

⁵ Adam ye jeha 930 nɛ e gbo.

⁶ Benɛ Set ye jeha 105 ɔ, e fɔ binyumu nɛ e biɛ ji Enosh.

⁷ Nɛ́ a fɔ Enosh se ɔ, Set hi si jeha 807 nɛ e fɔ binyumuhi kɛ biyi kpahi.

⁸ Lɔ ɔ he ɔ, jeha abɔ nɛ Set ye loko e gbo ji 912.

⁹ Benɛ Enosh ye jeha 90 ɔ, e fɔ binyumu nɛ a tsɛɛ lɛ Kenan.

¹⁰ Nɛ́ a fɔ Kenan se ɔ, Enosh hi si jeha 815. E fɔ binyumuhi kɛ biyi kpahi,

¹¹ nɛ e gbo benɛ e ye jeha 905.

¹² Benɛ Kenan ye jeha 70 ɔ, e fɔ binyumu nɛ a tsɛɛ lɛ Mahalalel.

¹³ Nɛ́ a fɔ Mahalalel se ɔ, Kenan hi si jeha 840. E fɔ binyumuhi kɛ biyi kpahi,

¹⁴ nɛ e gbo benɛ e ye jeha 910.

¹⁵ Benɛ Mahalalel ye jeha 65 ɔ, e fɔ binyumu nɛ a tsɛɛ lɛ Yared.

¹⁶ Nɛ́ a fɔ Yared se ɔ, Mahalalel hi si jeha 830. E fɔ binyumuhi kɛ biyi kpahi,

¹⁷ nɛ e gbo benɛ e ye jeha 895.

¹⁸ Benɛ Yared ye jeha 162 ɔ, e fɔ binyumu nɛ a tsɛɛ lɛ Enok.

¹⁹ Nɛ́ a fɔ Enok se ɔ, Yared hi si jeha 800. E fɔ binyumuhi kɛ biyi kpahi,

²⁰ nɛ e gbo benɛ e ye jeha 962.

²¹ Benɛ Enok ye jeha 65 ɔ, e fɔ binyumu nɛ a tsɛɛ lɛ Metusela.

²² Nɛ́ a fɔ Metusela se ɔ, Enok kɛ Mawu hi si saminya jeha 300. E fɔ binyumuhi kɛ biyi kpahi,

²³ nɛ e hi si jeha 365.

²⁴ Enok kɛ Mawu hi si saminya e wami be ɔ tsuo. Lɔ ɔ se ɔ, a nɛ lɛ hu; ejakaa Mawu ba ngɔ lɛ kɛ ho.

²⁵ Benɛ Metusela ye jeha 187 ɔ, e fɔ binyumu nɛ a tsɛɛ lɛ Lamek.

²⁶ Nɛ́ a fɔ Lamek se ɔ, Metusela hi si jeha 782. E fɔ binyumuhi kɛ biyi kpahi,

²⁷ nɛ e gbo benɛ e ye jeha 969.

²⁸ Benɛ Lamek ye jeha 182 ɔ, e fɔ binyumu.

²⁹ E de ke, “Dengme nɛ wa ngɛ gboe kɛ ngɛ ní tsue ngɛ zugba nɛ Yawɛ gbiɛ ɔ nɔ ɔ, bi nɛ ɔ ma ba wo wa bua.” Lɔ ɔ he ɔ, e wo jokuɛ ɔ biɛ ke Noa.

³⁰ Benɛ a fɔ Noa se ɔ, Lamek hi si jeha 595. E fɔ binyumuhi kɛ biyi kpahi,

³¹ nɛ e gbo benɛ e ye jeha 777.

³² Benɛ Noa ye jeha 500 ɔ, e fɔ binyumuhi etɛ. Mɛ ji Shem, Ham, kɛ Yafet.