Mose I, 49 - BAIBLO ALOO NGMAMI KLƆUKLƆU Ɔ

Yakob nyagbe munyuhi

¹ Jehanɛ Yakob tsɔ ya de e bimɛ ɔmɛ ke, “Nyɛ ba bua nyɛ he nya nɛ ma de nyɛ nɔ́ nɛ maa ba nyɛ nɔ hwɔɔ se.

² “Yakob bimɛ, nyɛ bua nyɛ he nya nɛ nyɛɛ bu tue. Nyɛɛ bu nyɛ tsɛ Israel tue.

³ “Ruben, mo ji ye bitɛte; mo ji ye he wami, kɛ ye nihe mi kekleekle bi. Mo ji nɔ nɛ bu ngɛ o he, nɛ o ngɛ he wami pe ye bimɛ ɔmɛ tsuo.

⁴ O ngɛ kaa pa nɛ hia kɛ bee. Se jehanɛ lɛɛ, o kekleekle blɔ he ɔ ma bɔ mo. Ejakaa o kɛ ye plã ya hwɔ si Nɛ o ble o tsɛ sa a.

⁵ “Simeon kɛ Levi ɔ, nyɛmimɛ ji mɛ. A kɛ a dɛ mi dade po tsuɔ yi wu tso ní tsumi.

⁶ I kɛ mɛ be soe kɔkɔɔkɔ, I kɛ mɛ be bɔe hulɔ, Ejakaa ke a mi mi fu ɔ, a gbeɔ nɔmlɔ, Nɛ a plaa nahi kɛ jeɔ a hɛja.

⁷ A gbiɛ a mi mi fumi ɔ, Ejakaa e nya wa, nɛ a kɛ peeɔ yi wu tso níhi. Ma gbɛ mɛ ngɔ fĩa Israel zugba a nɔ ngɛ a ma mi bi ɔmɛ a kpɛti.

⁸ “Yuda, o nyɛmimɛ ɔmɛ ma je o yi. O ma kpata o he nyɛli ɔmɛ a hɛ mi. O nyɛmimɛ ɔmɛ ma kpla si ngɛ o hɛ mi.

⁹ Yuda ngɛ kaa jata nɛ ya ye de lo nɛ e kpale ba ba buu si, ngɛ e he jɔɔe; mɛnɔ ma nyɛ maa tsɛ̃ɛ̃ lɛ?

¹⁰ Yuda maa hɛɛ matsɛ tso ɔ, E nina maa ye matsɛ daa. Je ma amɛ ma tsu to ba ha lɛ, Nɛ a ma ba kpla si ngɛ e hɛ mi.

¹¹ E fiɔ e teji ngɔ woɔ wai tso he E fiɔ e teji bimɛ kɛ woɔ wai tso kpakpahi a he. E fɔɔ e tadehi a he ngɛ wai nɛ tsuɔ kaa muɔ mi.

¹² E hɛngmɛ tsuɔ kɔlukɔlu pe wai. Jã kɛ̃ e lungu hiɛ futafuta pe na nyɔ nyu.

¹³ “Zebulun maa hi wo nya. E hi he ɔ maa pee lɛsimuɔ he, nɛ e kɛ Sidon maa wo huzu.

¹⁴ “Isakar ngɛ kaa teji nɛ e wuhi a mi tsa; E buu si ngɛ lohwehi a tsuhi a mi.

¹⁵ E na kaa e na zugba kpakpa, nɛ e sihi he ɔ hu ngɔɔ. Lɔ ɔ he ɔ, e ba si nɛ e tloo tlomi, Nɛ e plɛɛ pee nyɔguɛ.

¹⁶ “Dan maa ye e ma mi bi ɔmɛ a nɔ kaa Israel wɛtso kpa amɛ.

¹⁷ Dan maa pee kaa sinɔ ngɛ gbɛjegbɛ tue; kaa bleka ngɛ blɔ nɔ, Nɛ kɔɔ okpɔngɔ nane se ja, Nɛ e nɔ hilɔ tsɔɔ kɛ nɔɔ si ngɛ e se je.

¹⁸ “Yawɛ, i ngɛ mo blɔ hyɛe nɛ o ba kpɔ mi.

¹⁹ “Gad lɛɛ, ojo fiali ma ba tua lɛ; Se e ma plɛ wo mɛ, nɛ e maa fie mɛ.

²⁰ “Asher zugba a maa ba ní saminya; E ma ha niye ní nɛ sa matsɛmɛ.

²¹ “Naftali ngɛ kaa tso ko nɛ bɔ. Nɛ e gba tso kɔni saminyawiiwi.

²² “Yosef ngɛ kaa nga mi teji ngɛ pa he. E ngɛ kaa nga mi okpɔngɔ bi ngɛ yoku he.

²³ E he nyɛli tuaa lɛ basabasa. Nɛ a nyɛɛɔ e se kɛ kɛ̃ɛ̃, kɛ kɛ̃ɛ̃ mi bihi.

²⁴ Se Yosef lɛɛ e kɛ̃ɛ̃ ɔ ji e dɛ gblegbleegble. E he wami ɔ je Yakob Mawu Ope ɔ dɛ mi, To hyɛlɔ ɔ, nɛ ji Israel he bulɔ ɔ.

²⁵ O tsɛmɛ a Mawu ɔ nɛ gbaa mo, Mawu Ope ɔ nɛ gbaa mo. E ha nɛ hiɔmi nɛ nɛ ha mo kɛ je hiɔwe; E ha nɛ nyu nɛ ba ha mo kɛ je zugba a mi. E ha mo lohwehi kɛ bimɛ babauu.

²⁶ E ha mo ngma kɛ mɔmɔhi. E ha mo ní kpakpahi kɛ je blema yoku ɔmɛ a nɔ. Mo Yosef, nɛ a hla mo ngɔ to kɛ je o nyɛmimɛ ɔmɛ a kpɛti ɔ, Mawu nɛ gbaa mo ní nɛ ɔmɛ tsuo.

²⁷ “Benyamin ngɛ kaa ogbetee nɛ tsɔtslɔɔ e he nyɛli a mi. Mɔtu ɔ, e gbeɔ mɛ nɛ e yeɔ. Gbɔkuɛ ɔ, e dlaa ta yibu ní.”

²⁸ Yakob bimɛ, Israel wɛtso nyɔngma kɛ enyɔ ɔmɛ ji nɛ ɔmɛ nɛ. Benɛ a tsɛ ɔ kɛ mɛ ye nyagbe sɛ, nɛ e gbaa mɛ ɔ, munyuhi nɛ e tu mɛ ji nɛ ɔmɛ nɛ; nɔ tsuaa nɔ ná e nɔ́.

Yakob gbo nɛ a pu lɛ

²⁹ Enɛ ɔ se ɔ, Yakob ka e bimɛ ɔmɛ kita ke, “E be kɛe nɛ ma gbo, nɛ ma ya piɛ ye nɛmɛ ɔmɛ a he. Ke i gbo ɔ, nyɛɛ ngɔ mi kɛ ho nɛ nyɛ ya pu mi ngɛ ye nɛmɛ ɔmɛ a kasa nya, ngɛ tɛ puɔ ɔ nɛ ngɛ Hit no ɔ nɛ a tsɛɛ Efron ɔ zugba a nɔ ɔ.

³⁰ Tɛ puɔ nɛ ɔ ngɛ Makpela, ngɛ Mamre beleku je, ngɛ Kanaan zugba a nɔ. Abraham ji nɔ nɛ he tɛ puɔ nɛ ɔ, kɛ jamɛ a zugba a ngɛ Efron, Hit no ɔ dɛ, nɛ e kɛ pee gɔ.

³¹ Lejɛ ɔ a pu Abraham kɛ e yo Sara ngɛ; lejɛ ɔ a pu Isak kɛ e yo Rebeka ngɛ; nɛ lejɛ ɔ ji he nɛ imi hu i pu Lea ngɛ.

³² Zugba a kɛ tɛ puɔ ɔ nɛ ngɛ nɔ ɔ, Hit bi ɔmɛ a dɛ a he ngɛ. Nyɛ ya pu mi ngɛ lejɛ ɔ.”

³³ Benɛ Yakob ka e bimɛ ɔmɛ kita a gbe nya a, e ya hwɔ si ekohu, nɛ e gbo.