Mose I, 47 - BAIBLO ALOO NGMAMI KLƆUKLƆU Ɔ

^1-2 Yosef hla e nyɛmimɛ ɔmɛ a ti nihi enuɔ, nɛ e kɛ mɛ ya tsɔɔ Farao ɔ. Yosef de Farao ɔ ke, “Tsaatsɛ kɛ ye nyɛmimɛ ɔmɛ je Kanaan zugba a nɔ kɛ ba. A kɛ a tohi, kɛ a nahi, kɛ a weto ní tsuo ba. Amlɔ nɛ ɔ, a pueɔ si ngɛ Goshen zugba a nɔ.”

³ Farao ɔ bi Yosef nyɛmimɛ ɔmɛ ke, “Mɛni ní tsumi nyɛ tsuɔ?” A he nɔ ke, “Lohwe lɛli ji wɔ; wa nɛmɛ ɔmɛ hu kikɛmɛ a ní tsumi nɛ ɔ nɔuu a tsu.

⁴ Wa ba nɛ wa ba hi hiɛmɛ nɛ ɔ bɔɔ. Wa nɛ niye ní ha wa lohwe ɔmɛ ngɛ Kanaan zugba a nɔ, ejakaa hwɔ ɔ nya wa ngɛ lejɛ ɔ wawɛɛ nitsɛ. Wa kpa mo pɛɛ nɛ o ha nɛ waa hi Goshen zugba a nɔ.”

⁵ Farao ɔ de Yosef ke, “O tsɛ kɛ o nyɛmimɛ ɔmɛ ba mo tomi.

⁶ Egipt zugba a lɛ ngɛ o hɛ mi tilaa nɛ ɔ nɛ. Ha nɛ o tsɛ kɛ o nyɛmimɛ ɔmɛ nɛ a hi Goshen zugba a nɔ; lejɛ ɔ ji he nɛ hi pe zugba a tsuo. Ke o na kaa a ti ni komɛ le lohwe lɛmi ní tsumi nɛ ɔ saminya a, ha nɛ a ya hyɛ imi nitsɛ ye lohwe ɔmɛ a nɔ.”

⁷ Yosef ngɔ e tsɛ Yakob hu kɛ ba tsɔɔ Farao ɔ. Yakob gbaa Farao ɔ,

⁸ nɛ Farao ɔ bi lɛ ke, “Jeha nyɛmɛ o ye?”

⁹ Yakob he nɔ ke, “I ye jeha lafa kɛ nyingmi etɛ. Ye nɛmɛ ɔmɛ lɛɛ slo mɛ; mɛɛ lɛɛ a se kɛ ngɛ je mi.”

¹⁰ Kɛkɛ nɛ Yakob gbaa Farao ɔ ekohu, nɛ e je e ngɔ.

¹¹ Jehanɛ, Yosef ha e tsɛ kɛ e nyɛmimɛ ɔmɛ sihi he ngɛ Egipt zugba a nɔ. Kaa bɔ nɛ Farao ɔ fa lɛ Yosef ɔ, e ha mɛ weto ní ngɛ Rameses kasa nya, nɛ ji zugba nɛ hi pe zugba a tsuo.

¹² Yosef ha e tsɛ, kɛ e nyɛmimɛ ɔmɛ, kɛ e tsɛ weku li ɔmɛ, kɛ a bimɛ tsɔwitsɔwi ɔmɛ tsuo niye ní, bɔ nɛ su nɔ tsuaa nɔ nya.

Hwɔ ɔ nya wa

¹³ Jehanɛ lɛɛ hwɔ ɔ nya ba wa wawɛɛ nitsɛ. Niye ní be zugba a nɔ he ko he ko; nɛ hwɔ ɔ ha nɛ Egipt bi ɔmɛ, kɛ Kanaan bi ɔmɛ tsuo gbɔjɔ.

¹⁴ Sika nɛ a kɛ je Egipt kɛ Kanaan zugba amɛ a nɔ kɛ ba he blɛfo ɔ, Yosef bua lɛ tsuo nya, nɛ e ngɔ kɛ ho matsɛ we ɔ mi ya.

¹⁵ Benɛ sika nɛ ngɛ Egipt kɛ Kanaan tsuo ba ta a, Egipt bi ɔmɛ ba de Yosef ke, “Ha wɔ ní nɛ waa ye! Anɛ o maa hi wɔ hyɛe nɛ wa gbo lo? Wa sika tsuo ta.”

¹⁶ Yosef he nɔ ke, “Ke nyɛ sika ta a, nyɛɛ ngɔ nyɛ lohwe ɔmɛ kɛ ba, nɛ ma ha nyɛ niye ní kɛ to nya.”

¹⁷ A ya ngɔ a we okpɔngɔ ɔmɛ, to ɔmɛ, na amɛ, kɛ teji ɔmɛ kɛ ba ha Yosef; nɛ e ha mɛ niye ní kɛ to lohwe ɔmɛ a nya. Jamɛ a jeha a tsuo ɔ, Egipt bi ɔmɛ ngɔ a lohwehi tsuo kɛ ba Yosef ngɔ kɛ ba tsake niye ní.

¹⁸ Jeha nɛ nyɛɛ se ɔ, Egipt bi ɔmɛ ba Yosef ngɔ ekohu, nɛ a ba de lɛ ke, “Wa nyɔmtsɛ, wa be mo nɔ́ ko nɔ laae. Anɔkuale mi ɔ, wa sika tsuo ta; nɛ wa lohwe ɔmɛ hu ba pee o níhi. Nɔ́ kpa ko pa be wa dɛ pe wɔ nitsɛmɛ, kɛ wa zugba a.

¹⁹ Anɛ o maa hi wɔ hyɛe nɛ wa gbo, nɛ wa zugba a hɛ mi nɛ kpata lo? Mo he wɔ kɛ wa zugba a tsuo, nɛ o ha wɔ niye ní ngɔ to nya. Wa maa pee Farao ɔ nyɔguɛhi, konɛ e ngɔ wa zugba a hulɔ. Ha wɔ blɛfo nɛ waa ye, nɛ wa ko ba gbo, kɛ ngmɛdu nɛ wa ma du ngɛ wa ngmɔ ɔmɛ a nɔ.”

²⁰ Yosef he Egipt zugba a tsuo kɛ ha Farao ɔ. Egipt no tsuaa Egipt no jua e zugba, ejakaa hwɔ ɔ nya ba wa tsɔ. Nɛ zugba a tsuo ba pee Farao ɔ nɔ́.

²¹ Enɛ ɔ he je ɔ, Egipt bi ɔmɛ tsuo ba pee Farao ɔ nyɔguɛhi, ngɛ a ma amɛ a mi.

²² Zugba pɛ nɛ Yosef he we ji osɔfo ɔmɛ a zugba a. Osɔfo ɔmɛ lɛɛ e hia we kaa a jua a zugba a, ejakaa mɛɛ lɛɛ a haa mɛ niye ní kɛ jeɔ Farao ɔ nitsɛ ngɔ.

²³ Yosef de ma a ke, “I he nyɛ kɛ nyɛ zugba a mwɔnɛ ligbi nɛ ɔ kɛ ha Farao ɔ. Blɛfo ji nɛ ɔ nɛ; nyɛ ba ngɔ nɛ nyɛ ya du.

²⁴ Ke nyɛ kpa ní ɔ, nyɛɛ ngɔ mi dlami enuɔ mi kake ba ha Farao ɔ, konɛ nɔ́ nɛ piɛ ɔ nɛ pee nyɛ nitsɛmɛ, kɛ nyɛ bimɛ, kɛ nyɛ we mi bimɛ nyɛ nɔ́; nyɛɛ ye eko, nɛ nyɛ du eko.”

²⁵ Ma a he nɔ ke, “O he wa yi wami! Wa nyɔmtsɛ, ke e sa o hɛ mi ɔ, wa maa pee Farao ɔ nyɔguɛhi.”

²⁶ Lɔ ɔ he ɔ, Yosef wo mlaa nɛ ngɛ kɛ ba si mwɔnɛ ligbi nɛ ɔ, kaa Egipt zugba a niba ní ɔ mi dlami enuɔ mi kake maa pee Farao ɔ nɔ́. Osɔfo ɔmɛ a zugba a pɛ ji nɔ́ nɛ be Farao ɔ nɔ́ pee.

Yakob nyagbe hiami nɔ́

²⁷ Israel bi ɔmɛ hi Goshen zugba a nɔ ngɛ Egipt. A na ní, nɛ a fɔ bimɛ, nɛ a he hiɛ babauu.

²⁸ Yakob hi Egipt zugba a nɔ jeha nyɔngma kɛ kpaago; lɔ ɔ he ɔ, jeha tsuo nɛ Yakob ye ji jeha lafa kɛ nyingmi eywiɛ kɛ kpaago.

²⁹ Benɛ Yakob gbenɔ be su ɔ, e tsɛ e bi Yosef, nɛ e de lɛ ke, “Ke o suɔ nɛ o sa ye hɛ mi ɔ, ngɔɔ o nine kɛ wo ye fiɔ enyɔ ɔmɛ a kpɛ, nɛ o ka mi kita kaa o maa ye mi anɔkuale, nɛ o be mi pue ngɛ Egipt zugba a nɔ.

³⁰ Ma suɔ nɛ a pu mi ngɛ he nɛ a pu ye nɛmɛ ɔmɛ ngɛ ɔ. Lɔ ɔ he ɔ, ke i gbo ɔ, ngɔɔ mi kɛ je Egipt, nɛ o ya pu mi ngɛ a kasa nya.” Yosef he nɔ ke, “Ma pee kaa bɔ nɛ o de ɔ.”

³¹ Yakob de Yosef ke, “Ka mi kita kaa o maa pee ja.” Yosef ka lɛ kita kaa e maa pee ja. Kɛkɛ nɛ Yakob kpla si ngɛ e sa a yiti je, nɛ e na si.