Mose I, 46 - BAIBLO ALOO NGMAMI KLƆUKLƆU Ɔ

Yakob kɛ e we ɔ tsuo ho Egipt ya

¹ Yakob hia, kɛ e nɔ́ tsuaa nɔ́. Benɛ e su Beersheba a, e sã bɔ kɛ ha e tsɛ Isak Mawu ɔ ngɛ lejɛ ɔ.

² Nyɔ mi ɔ, Mawu kɛ lɛ tu munyu ngɛ nina mi. Mawu tsɛ lɛ ke, “Yakob, Yakob!” Yakob he nɔ ke, “I ngɛ hiɛ ɔ.”

³ Mawu de lɛ ke, “Imi ji Mawu, o tsɛ Isak Mawu ɔ. Koo ye gbeye kaa o maa ya Egipt; ejakaa ma ha nɛ o nina maa pee ma agbo ngɛ lejɛ ɔ.

⁴ I kɛ mo maa ya Egipt, nɛ o ma ya gbo ngɔ fɔ Yosef gugue mi ngɛ lejɛ ɔ; se o nina lɛɛ, ma kpale mɛ kɛ ba hiɛmɛ nɛ ɔ ekohu.”

⁵ Yakob hia kɛ je Beersheba. Yakob bimɛ ɔmɛ ngɔ a tsɛ Yakob, kɛ a yi ɔmɛ, kɛ a bimɛ tsɔwitsɔwi ɔmɛ ngɔ wo zugba lɛ ɔ nɛ Egipt matsɛ ɔ ngɔ mane mɛ ɔ mi.

⁶ A ngɔ a lohwe ɔmɛ, kɛ weto ní nɛ a na ngɛ Kanaan zugba a nɔ ɔ, nɛ a pue blɔ kɛ ho Egipt ya. Yakob ngɔ e nina a tsuo kɛ ho;

⁷ e binyumu ɔmɛ, e bibinyumu ɔmɛ, e biyi ɔmɛ, kɛ e bibiyi ɔmɛ.

⁸ Yakob nina nɛ e ngɔ kɛ ya Egipt ɔ ji nɛ ɔmɛ nɛ: Ruben, Yakob bitɛte ɔ,

⁹ kɛ Ruben binyumu ɔmɛ: Hanok, Palu, Hezron, kɛ Karmi.

¹⁰ Simeon kɛ e binyumu ɔmɛ: Yemuel, Yamin, Ohad, Yakin, Zohar, kɛ Shaul, Kanaan yo ɔ bi ɔ.

¹¹ Levi kɛ e binyumu ɔmɛ: Gershon Kohat, kɛ Merari.

¹² Yuda kɛ e binyumu ɔmɛ: Shela, Perez, kɛ Zera. (Yuda binyumu kpahi, Er kɛ Onan ɔ, mɛɛ a gbo ngɛ Kanaan zugba a nɔ.) Perez binyumuhi ji: Hezron kɛ Hamul.

¹³ Isakar kɛ e binyumu ɔmɛ: Tola, Pua, Yashub kɛ Shimron.

¹⁴ Zebulun kɛ e binyumu ɔmɛ: Sered, Elon kɛ Yahleel.

¹⁵ Binyumuhi nɛ Yakob kɛ Lea, fɔ ngɛ Mesopotamia ji nɛ ɔmɛ nɛ. A fɔ biyo kake hulɔ, nɛ a tsɛɛ lɛ Dina. Nina tsuo pɛpɛɛpɛ, nyumuhi kɛ yihi nɛ Yakob na kɛ gu Lea nɔ ɔ, a hiɛmi ji nyingmi etɛ kɛ etɛ.

¹⁶ Gad kɛ e binyumu ɔmɛ: Zefon, Hagi, Shuni, Ezbon, Eri, Arod, kɛ Areli.

¹⁷ Asher kɛ e binyumu ɔmɛ: Imna, Ishva, Ishvi, Beria, kɛ a nyɛmiyo Sera. Beria binyumuhi ji Heber kɛ Malkiel.

¹⁸ Nimli nyɔngma kɛ ekpa nɛ ɔmɛ ji nina nɛ Yakob na kɛ gu Zilpa nɔ. Zilpa ji nyɔguɛ yo ɔ nɛ Laban ha e biyo Lea a nɛ.

¹⁹ Yakob kɛ e yo Rahel fɔ binyumuhi enyɔ: Yosef kɛ Benyamin.

²⁰ Yosef hu kɛ Asenat fɔ binyumuhi enyɔ ngɛ Egipt: mɛ ji Manase kɛ Efraim. Asenat ɔ, osɔfo Potifera nɛ je Heliopolis ma a mi ɔ biyo ji lɛ.

²¹ Benyamin binyumuhi ji Bela, Beker, Ashbel, Gera, Naaman, Ehi, Rosh, Mupim, Hupim, kɛ Ard.

²² Nimli nyɔngma kɛ eywiɛ nɛ ɔmɛ ji nina nɛ Yakob na kɛ gu Rahel nɔ.

²³ Dan kɛ e binyumu Hushim.

²⁴ Naftali kɛ e binyumu ɔmɛ: Yazeel, Guni, Yezer, kɛ Shilem.

²⁵ Nimli kpaago nɛ ɔmɛ ji nina nɛ Yakob na kɛ gu Bilha nɔ. Bilha ji nyɔguɛ yo ɔ nɛ Laban ha e biyo Rahel ɔ nɛ.

²⁶ Yakob nina tsuo pɛpɛɛpɛ nɛ ya Egipt ɔ, ke a je e binyumu ɔmɛ a yi ɔmɛ kɛ je mi ɔ, a hiɛmi ji nyingmi ekpa kɛ ekpa.

²⁷ Ke a kɛ Yosef binyumuhi enyɔ ɔmɛ nɛ a fɔ ngɛ Egipt ɔ piɛ he ɔ, Yakob we ɔ tsuo nɛ ya Egipt ɔ peeɔ nimli nyingmi kpaago.

Yakob kɛ e we mi bimɛ ngɛ Egipt

²⁸ Yakob tsɔ Yuda kɛ sɛ hlami, konɛ e ya de Yosef nɛ e kɛ lɛ ba kpe ngɛ Goshen. E kɛ we nɛ a ya su Goshen.

²⁹ Yosef hi e zugba ta lɛ ɔ mi, nɛ e ho konɛ e ya kpee e tsɛ ngɛ Goshen. Benɛ a kpe hɛ mi kɛ hɛ mi ɔ, Yosef kɛ e nine kpla e tsɛ kuɛ mi, nɛ e fo ya ngɔ pue e nɔ hluu.

³⁰ Yakob de Yosef ke, “Jehanɛ lɛɛ nɛ i na o hɛ mi, nɛ i na kaa o ngɛ je mi kɛ mwɔɔ ɔ, ke i gbo hu, e pi nɔ́ ko.”

³¹ Kɛkɛ nɛ Yosef de e nyɛmimɛ ɔmɛ, kɛ e tsɛ weku li ɔmɛ ke, “I yaa nɛ ma ya de Farao ɔ ke, ‘Ye nyɛmimɛ, kɛ tsaatsɛ weku ɔ tsuo je Kanaan kɛ ba ye ngɔ.’

³² Ma de lɛ ke to hyɛli kɛ na tsɔ̃li ji nyɛ; nɛ nyɛɛ kɛ nyɛ to ɔmɛ, nyɛ na amɛ, kɛ nyɛ weto ní tsuo ba.

³³ Ke Farao ɔ tsɔ ba tsɛ nyɛ, nɛ e bi nyɛ ke mɛni ní tsumi nyɛ tsuɔ ɔ,

³⁴ nyɛ de lɛ ke, ‘Kɛ je wa nihe mi kɛ ba si mwɔnɛ nɛ ɔ, lohwe wa lɛɛ; wa nɛmɛ ɔmɛ hu kikɛmɛ a ní tsumi nɛ ɔ nɔuu a tsu.’ Ke nyɛ de lɛ ja a, e ma ha nɛ nyɛɛ hi Goshen zugba a nɔ; ejakaa Egipt bimɛ hiee lohwe lɛli.”