Mose I, 42 - BAIBLO ALOO NGMAMI KLƆUKLƆU Ɔ

Yosef nyɛmimɛ ɔmɛ ba Egipt ba he blɛfo

¹ Benɛ Yakob nu kaa blɛfo ngɛ Egipt ɔ, e bi e binyumu ɔmɛ ke, “Mɛni nyɛ ngɛ nyɛ sibi hyɛe ngɛ pee?

² I nu kaa blɛfo ngɛ Egipt. Nyɛɛ ya lejɛ ɔ nɛ nyɛ ya he eko kɛ ba nɛ waa ye, nɛ hwɔ ko ba gbe wɔ.”

³ Kɛkɛ nɛ Yosef tsɛbimɛ nyɔngma amɛ pue nɔ kɛ ho Egipt ya, konɛ a ya he blɛfo.

⁴ Se Yosef nyɛbi Benyamin lɛɛ Yakob ha we nɛ e kɛ e nyɛmimɛ ɔmɛ nɛ a ya; ejakaa Yakob ye gbeye kaa, alini, nɔ́ ko ma ya pee lɛ ngɛ blɔ ɔ nɔ.

⁵ Yakob bimɛ ɔmɛ piɛ nihi nɛ ba blɛfo hemi ɔ a he; ejakaa hwɔ ba Kanaan zugba a hu nɔ.

⁶ Yosef, ganɔ nɛ ngɛ Egipt zugba a nɔ ɔ, ji nɔ nɛ ngɛ blɛfo ɔ juae ha nɔ tsuaa nɔ nɛ ba blɛfo hemi ɔ nɛ. Kɛkɛ nɛ Yosef nyɛmimɛ ɔmɛ ba kpla si ngɛ e hɛ mi, nɛ a kɛ a hɛ mi bu si.

⁷ Benɛ Yosef na e nyɛmimɛ ɔmɛ ɔ, e le a mi tso, se e pee e he kaa e li mɛ. E tu e hɛ mi ngɔ wo mɛ, nɛ e bi mɛ ke, “Jije nyɛ je?” A he nɔ ke, “Wa je Kanaan zugba a nɔ, nɛ wa ma niye ní hemi.”

⁸ Yosef le e nyɛmimɛ ɔmɛ a mi tso, se mɛɛ lɛɛ a yo we lɛ.

⁹ E kai nlami ɔmɛ nɛ e nla ngɛ a he ɔ, nɛ e de mɛ ke, “Slaali ji nyɛ! Nyɛ ba nɛ nyɛ ba slaa wa zugba a, konɛ nyɛɛ hyɛ he nɛ wa huza amɛ a he wɛ ngɛ.”

¹⁰ A he nɔ ke, “Dɛbi! Wa nyɔmtsɛ, wa kpa mo pɛɛ, niye ní wa ma hemi.

¹¹ Nyumu kake bimɛ ji wɔ tsuo. Anɔkualetsɛmɛ ji wɔ; pi slaali ji wɔ.”

¹² Yosef de mɛ ke, “Dɛbi! Nyɛ ba nɛ nyɛ ba hyɛ he nɛ wa huza amɛ a he wɛ ngɛ.”

¹³ A de Yosef ke, “Nyumu kake bimɛ ji wɔ; wa tsɛ je Kanaan zugba a nɔ. Jinɛ nyɛmimɛ nyɔngma kɛ enyɔ ji wɔ; se wa ti nɔ kake be je mi, nɛ jokuɛyo ɔ hu ngɛ wa tsɛ ngɔ.”

¹⁴ Yosef he nɔ ke, “Tse i de! Nɔ́ nɛ i de ɔ ji nɛ ɔ nɛ; slaali ji nyɛ!

¹⁵ Nɔ́ nɛ i kɛ ma kpa nyɛ si ji nɛ ɔ nɛ. I na Farao ɔ kaa nyɛ be hiɛmɛ nɛ ɔ jee; ja nyɛ nyɛmi jokuɛyo ɔ ba hiɛ ɔ loko nyɛ maa ho.

¹⁶ Nyɛ ti nɔ kake nɛ ya ngɔ lɛ kɛ ba. Nyɛ ni nɛmɛ nɛ piɛ ɔ lɛɛ a maa wo nyɛ tsu kɛ yaa si nyɛ nyɛmi ɔ maa ba. Blɔ nɔ nɛ wa maa gu kɛ hyɛ kaa anɔkuale munyu nɛ nyɛ tu ɔ ji nɛ ɔ nɛ. Se ke e ba mi kaa lakpa munyu nyɛ ba tu mi ɔ, lɛɛ i na Farao ɔ kaa slaali ji nyɛ.”

¹⁷ Kɛkɛ nɛ e wo mɛ tsu ligbi etɛ.

¹⁸ Ligbi nɛ ji etɛ ɔ, Yosef de mɛ ke, “Imi lɛɛ i yeɔ Mawu gbeye; lɔ ɔ he ɔ, nɔ́ nɛ nyɛ maa pee kɛ he nyɛ yi wami ji nɛ ɔ nɛ.

¹⁹ Ke anɔkualetsɛmɛ ji nyɛ niinɛ ɔ, nyɛ ha a wo nyɛ ti nɔ kake tsu ngɛ he nɛ a je nyɛ kɛ je ɔ. Nyɛ ni nɛmɛ nɛ nyɛ piɛ ɔ, nyɛɛ ngɔ blɛfo nɛ nyɛ he ɔ kɛ ya we ya ha nyɛ weku li nɛ hwɔ ngɛ mɛ yee ɔ,

²⁰ konɛ nyɛɛ ngɔ nyɛ nyɛmi jokuɛyo ɔ kɛ ba. Enɛ ɔ maa tsɔɔ kaa sane ɔ nɛ nyɛ ba gba mi ɔ, anɔkuale, nɛ i be nyɛ gbee.” A kplɛɛ,

²¹ nɛ a de a sibi ke, “Niinɛ, nɔ́ nɛ wa pee wa nyɛmi ɔ be ko nɛ be ɔ, lɔ ɔ he nɔ́ wa ngɛ nae nɛ ɔ nɛ. Wa na bɔ nɛ e hao, nɛ e kpa wɔ pɛɛ ke waa na lɛ mɔbɔ; se wa pui mi. Enɛ ɔ he je nɛ kikɛmɛ a haomi nɛ ɔ ba wa nɔ ɔ nɛ.”

²² Ruben de mɛ ke, “Tse i de nyɛ ke nyɛ ko pee jokuɛ ɔ yayami ko nɛ nyɛ bui mi tue; e gbenɔ ɔ he tue gblami nɛ wa ngɛ nae nɛ ɔ nɛ.”

²³ A li tete kaa Yosef nu nɔ́ nɛ a ngɛ dee ɔ sisi; ejakaa benɛ a kɛ lɛ ngɛ munyu ɔ tue ɔ, nɔ ko je gbi nya ha mɛ.

²⁴ Yosef je a he, nɛ e ya fo ya. Benɛ e kpale e se kɛ ba, nɛ e kɛ mɛ ba tu munyu ekohu ɔ, e je Simeon ngɛ a kpɛti, nɛ e ha a fi lɛ ngɛ a hɛ mi.

Yosef nyɛmimɛ ɔmɛ kpale kɛ ho Kanaan ya

²⁵ Yosef fa e tsɔli ɔmɛ ke a wo e nyɛmimɛ ɔmɛ a blɛfo kotoku ɔmɛ a mi blɛfo nɛ a hyi tɔtɔɔtɔ. Jehanɛ se hu, e fa ke a kpale nɔ tsuaa nɔ sika nɛ e hɛɛ kɛ ba a kɛ wo e kotoku ɔ mi, nɛ a ha mɛ niye ní nɛ a ya ye ngɛ blɔ ɔ nɔ. Tsɔli ɔmɛ pee ja.

²⁶ Yosef nyɛmimɛ ɔmɛ fi blɛfo ɔ nɛ a he ɔ ngɔ fɔ a teji ɔmɛ a nɔ, nɛ a pue blɔ.

²⁷ Benɛ a ya su nibwɔhi a to he ɔ, nɛ a ti nɔ kake pɛne e kotoku ɔ nya konɛ e ha e teji ɔ ní ɔ, e na e sika a ngɛ kotoku ɔ nya.

²⁸ Kɛkɛ nɛ e de e nyɛmimɛ ɔmɛ ke, “A kpale ye sika a kɛ wo ye kotoku ɔ mi!” A tsui po, nɛ a kɛ he domi bi a sibi ke, “Mɛni po Mawu pee wɔ nɛ ɔ?”

²⁹ Benɛ a ba su a tsɛ Yakob ngɔ ngɛ Kanaan ɔ, a bɔ lɛ níhi tsuo nɛ a pee mɛ ɔ. A de lɛ ke,

³⁰ “Ganɔ ɔ nɛ ngɛ Egipt ɔ tu e hɛ mi ngɔ wo wɔ. E kɛ wɔ tu munyu basabasa, nɛ e po wa nya ke wa ba e zugba a slaami.

³¹ Wa de lɛ ke, ‘Tsa pi slaali ji wɔ; anɔkualetsɛmɛ ji wɔ.

³² Nyumu kake bimɛ ji wɔ. Jinɛ nyɛmimɛ nyɔngma kɛ enyɔ ji wɔ; se wa ti nɔ kake be je mi, nɛ jokuɛyo ɔ hu ngɛ wa tsɛ ngɔ ngɛ Kanaan zugba a nɔ.’

³³ Nyumu ɔ nɛ ji ganɔ ɔ ngɛ zugba a nɔ ɔ de wɔ ke, ‘Bɔ nɛ ma pee kɛ le kaa anɔkualetsɛmɛ ji nyɛ ji nɛ ɔ nɛ: nyɛ si nyɛ ti nɔ kake ha mi ngɛ hiɛ ɔ. Nyɛ ni nɛmɛ nɛ nyɛ piɛ ɔ, nyɛɛ ngɔ blɛfo nɛ nyɛ he ɔ kɛ ya we ya ha nyɛ weku li nɛ hwɔ ngɛ mɛ yee ɔ,

³⁴ konɛ nyɛɛ ngɔ nyɛ nyɛmi jokuɛyo ɔ kɛ ba. Enɛ ɔ ma kɛ le kaa anɔkualetsɛmɛ ji nyɛ, se pi slaali ji nyɛ. Ma kpale nyɛ nyɛmi ɔ kɛ ha nyɛ, nɛ nyɛ ma nyɛ hi hiɛ ɔ nɛ nyɛɛ ye jua faa.’ ”

³⁵ Benɛ a ngɛ kotoku ɔmɛ a nya pɛnee ɔ, a ti nɔ tsuaa nɔ na e sika kɛ kpɛɛ ɔ ngɛ e kotoku ɔ mi; benɛ a na sika a, a kɛ a tsɛ Yakob ɔ tsuo a tsui po.

³⁶ Kɛkɛ nɛ a tsɛ Yakob de mɛ ke, “Nyɛ ma ha ye bimɛ ɔmɛ ma gbo ta ye he lo? Yosef be; Simeon be; nɛ jehanɛ, nyɛ ngɛ hlae nɛ nyɛɛ ngɔ Benyamin hu kɛ ho. Nɔ yeyee maa hi mi pee kikɛ nɛ ɔ!”

³⁷ Ruben de e tsɛ ɔ ke, “Ke i kpale we Benyamin ba ha we mo ɔ, lɛɛ gbee ye binyumuwi enyɔ ɔmɛ. Moo to Benyamin ngɔ wo ye dɛ mi, nɛ ma kpale lɛ kɛ ba ha mo.”

³⁸ Se Yakob de ke, “Ye bi ɔ kɛ nyɛ be yae; e nyɛmi ɔ gbo, nɛ lɛ nɔ kake too e piɛ. Ke i kɛ lɛ ha nyɛ ɔ, nɔ́ ko ma ya pee lɛ ngɛ blɔ ɔ nɔ. I bwɔ, nɛ nyɛ ma ha nɛ i kɛ aywilɛho maa ya gbeje.”