Mose I, 40 - BAIBLO ALOO NGMAMI KLƆUKLƆU Ɔ

Yosef tsɔɔ pamitsɛmɛ ɔmɛ a nlamihi a sisi

¹ Saii mi ɔ, Egipt matsɛ ɔ dã nɔ hyɛlɔ, kɛ abolo salɔ nɔkɔtɔma a ya tɔ a nyɔmtsɛ ɔ, nɛ ji Egipt matsɛ ɔ nɔ.

² Farao ɔ mi mi fu e tsɔli enyɔ nɛ ɔmɛ,

³ nɛ e wo mɛ tsu ngɛ matsɛ we buli a nyatsɛ ɔ we ɔ mi. Lejɛ ɔ nɛ a wo Yosef hu tsu ngɛ ɔ nɛ.

⁴ A se kɛ saminya ngɛ tsu ɔ mi, nɛ matsɛ we buli a nyatsɛ ɔ tu mɛ ngɔ wo Yosef dɛ mi nɛ e sɔmɔ mɛ.

⁵ Nyɔ kake mi ɔ, Egipt matsɛ ɔ dã nɔ hyɛlɔ ɔ kɛ abolo salɔ ɔ tsuo nla ngɛ he nɛ a wo mɛ tsu ngɛ ɔ; nɔ tsuaa nɔ kɛ e nlami, nɛ nlami tsuaa nlami kɛ e sisi.

⁶ Mɔtu, benɛ Yosef ba a ngɔ ɔ, e na kaa a hɛ mi pee mɔbɔmɔbɔ.

⁷ E bi mɛ ke, “Mwɔnɛ ɔ lɛɛ mɛni he je nyɛ hɛ mi pee mɔbɔmɔbɔ kikɛ nɛ ɔ?”

⁸ A he nɔ ke, “Wa ti nɔ tsuaa nɔ nla nlami ko, nɛ nɔ ko be nɛ maa tsɔɔ wɔ sisi.” Yosef de mɛ ke, “Mawu lɛ tsɔɔ nlamihi a sisi; i kpa nyɛ pɛɛ nɛ nyɛɛ sɛɛ nlami ɔmɛ ha mi.”

⁹ Kɛkɛ nɛ dã nɔ hyɛlɔ nɔkɔtɔma a de Yosef e nlami ɔ ke, “I nla nɛ wai tso ko maa si ngɛ ye hɛ mi,

¹⁰ nɛ tso ɔ gba kɔni etɛ. Benɛ ba amɛ je kpo pɛ nɛ mɔmɔ ɔmɛ gba, nɛ wai yiblii nɛ tsu je kpo.

¹¹ Jamɛ a be ɔ mi ɔ, i hɛɛ Farao ɔ kplu ɔ ngɛ ye dɛ mi. Lɔ ɔ he ɔ, i tsɔ wai yiblii ɔ, nɛ i nga kɛ wo mi, nɛ i kɛ kplu ɔ wo Farao ɔ dɛ mi.”

¹² Yosef de lɛ ke, “Nlami ɔ sisi ji nɛ ɔ nɛ: tso kɔni etɛ ɔmɛ daa si ha ligbi etɛ.

¹³ Hiɛmɛ nɛ ɔ ligbi etɛ ɔ, Farao ɔ ma je mo kɛ je tsu mi; e kɛ o he maa ke mo, nɛ e maa ngɔ mo ngɔ to o blɔ he ɔ ekohu. O kɛ Farao ɔ kplu ɔ maa wo e dɛ mi ekohu kaa bɔ nɛ o peeɔ sa, benɛ o ji e dã nɔ hyɛlɔ nɔkɔtɔma a.

¹⁴ Se, i kpa mo pɛɛ, ke níhi a mi ya hi ha mo ɔ, mo kai mi nɛ o na mi mɔbɔ; moo tu ye he munyu kpakpa ha Farao ɔ, nɛ e ba je mi kɛ je tsu nɛ ɔ mi.

¹⁵ Pani nya nɛ a nu mi kɛ je Hebri bi ɔmɛ a zugba a nɔ kɛ ba hiɛ ɔ; nɛ Egipt hiɛmɛ nɛ ɔ hu i pee we nɔ́ ko nɛ sa kaa a wo mi tsu.”

¹⁶ Benɛ abolo salɔ nɔkɔtɔma a na kaa Yosef tsɔɔ nlami ɔ sisi saminya a, e de lɛ ke, “Imi hu i nla nɛ i tloo abolo kusii etɛ.

¹⁷ Niye ní slɔɔtoslɔɔtohi nɛ a sã ha Farao ɔ ngɛ kusii nɛ ngɛ hiɔwe pe kulaa a mi; nɛ lohwe pɛlitsɛmɛ ba ngɛ yee.”

¹⁸ Yosef de lɛ ke, “Nlami ɔ sisi ji nɛ ɔ nɛ: kusii etɛ ɔmɛ daa si ha ligbi etɛ.

¹⁹ Hiɛmɛ nɛ ɔ ligbi etɛ ɔ, Farao ɔ ma je mo kɛ je tsu mi, nɛ e ma ha a sɛu mo ngɛ tso nɔ, nɛ lohwe pɛlitsɛmɛ ma ba ye o he lo ɔ.”

²⁰ Ligbi etɛ se ɔ, Farao ɔ ye e fɔmi ligbi. E tsɛ e tsɔli ɔmɛ tsuo ní yemi, nɛ e ha a ya je e dã nɔ hyɛlɔ nɔkɔtɔma a, kɛ abolo salɔ nɔkɔtɔma a ngɛ tsu ɔ mi kɛ ba.

²¹ E kɛ e dã nɔ hyɛlɔ nɔkɔtɔma a blɔ he ɔ ha lɛ ekohu kaa nɔ nɛ maa ngɔ Farao ɔ kplu ɔ kɛ wo e dɛ mi.

²² Se abolo salɔ nɔkɔtɔma a lɛɛ Farao ɔ ha a sɛu lɛ kaa bɔ nɛ Yosef tsɔɔ a nlami ɔmɛ a sisi ɔ pɛpɛɛpɛ.

²³ Se dã nɔ hyɛlɔ nɔkɔtɔma a kai we Yosef hu; e hɛ je e nɔ pɛsɛpɛsɛ.