Mose I, 39 - BAIBLO ALOO NGMAMI KLƆUKLƆU Ɔ

Yosef kɛ Potifar yo ɔ

¹ Ishmael bi ɔmɛ kɛ Yosef ba Egipt nɛ a ba jua lɛ ngɔ ha Egipt matsɛ ɔ tsɔlɔ kake nɛ a tsɛɛ lɛ Potifar; lɛ ji matsɛ we buli ɔmɛ a nyatsɛ.

² Yawɛ gbaa Yosef nɛ e ya nɔ ngɛ nɔ́ tsuaa nɔ́ mi; nɛ e sɔmɔ ngɛ e we Egipt nyɔmtsɛ ɔ we ɔ mi.

³ Benɛ Yosef nyɔmtsɛ ɔ na kaa Yawɛ gbaa Yosef, nɛ e haa e yeɔ manye ngɛ nɔ́ tsuaa nɔ́ mi ɔ,

⁴ e na e he bua jɔmi. Potifar wo lɛ nɔkɔtɔma ngɛ e we ɔ mi, nɛ e to e nɔ́ tsuaa nɔ́ ngɔ wo e dɛ.

⁵ Kɛ je jamɛ a be ɔ kɛ yaa a, Yawɛ gbaa Potifar ngɛ Yosef he. E gbaa e weto ní tsuo: e we mi níhi, kɛ e ngmɔ mi níhi tsuo.

⁶ Potifar to e nɔ́ tsuaa nɔ́ kɛ wo Yosef dɛ, nɛ e gba we e he nya ngɛ nɔ́ ko nɔ́ ko he kaa ja nɔ́ nɛ e maa ye kɛkɛ. Yosef ɔ, nyumu nɛ he ngɛ fɛu saminya ji lɛ.

⁷ Saii mi ɔ, e nyɔmtsɛ ɔ yo ɔ bɔni e se nyɛɛmi nɛ e kɛ lɛ nɛ na bɔmi.

⁸ Yosef kplɛɛ we; nɛ e de e nyɔmtsɛ ɔ yo ɔ ke, “Hyɛ, ye nyɔmtsɛ gba we e he nya ngɛ nɔ́ ko nɔ́ ko he ngɛ we nɛ ɔ mi, ejakaa i ngɛ hiɛ ɔ. E to e nɔ́ tsuaa nɔ́ ngɔ wo ye dɛ.

⁹ I ngɛ he wami ngɛ we nɛ ɔ mi kaa bɔ nɛ lɛ hu e ngɛ ɔ. Nɔ́ ko nɔ́ ko be nɛ ye nyɔmtsɛ ɔ je we he gbi ha mi, kaa ja mo pɛ; ejakaa moo lɛɛ e yo ji mo. Mɛni he je mɔ nɛ ma tsu yi wu tso ní kaa kikɛ nɛ ɔ, nɛ ma pee yayami kɛ si Mawu?”

¹⁰ Yo nɛ ɔ hao Yosef daa ligbi kɛ kikɛmɛ a munyu nɛ ɔ; se Yosef kplɛɛ we kaa e kɛ lɛ ma na bɔmi, loo e maa hɛ lɛ kɛ su e he po.

¹¹ Se ligbi ko benɛ Yosef ba we ɔ mi nɛ e ba tsu ní ɔ, tsɔli ɔmɛ a ti nɔ ko be we ɔ mi.

¹² Kɛkɛ nɛ yo ɔ nu Yosef tade ɔ, nɛ e de lɛ ke, “Ba nɛ o kɛ mi ba hwɔ si.” Se Yosef tu fo kɛ je kpo, nɛ e je e tade ɔ he ngɛ yo ɔ dɛ mi.

¹³ Benɛ yo ɔ na kaa Yosef tu fo kɛ je e tade ɔ he ngɛ e dɛ mi ɔ,

¹⁴ e tsɛ tsɔli ɔmɛ nɛ tsuɔ ní ngɛ we ɔ mi ɔ, nɛ e de mɛ ke, “Nyɛɛ hyɛ! Ye huno ya ngɔ kikɛmɛ a Hebri no nɛ ɔ kɛ ba futu wɔ, konɛ e ba ye wa he fɛu. Nyumu nɛ ɔ ba ye ngɔ konɛ e ba tua mi, se i kpa bubuubui.

¹⁵ Benɛ e nu nɛ i ngɛ bubuubui ɔ kpae ɔ, e tu fo kɛ je kpo, nɛ e je e tade ɔ he.”

¹⁶ Yo ɔ ngɔ Yosef tade ɔ ngɔ to kɛ ya si Yosef nyɔmtsɛ ɔ ba we ɔ mi.

¹⁷ Kɛkɛ nɛ yo ɔ bɔ lɛ kikɛmɛ a amaniɛ nɛ ɔ nɔuu ke, “Hebri no tsɔlɔ nɛ ɔ nɛ o ngɔ ba futu wɔ ɔ ba ye ngɔ, nɛ e hla kaa e ma tua mi.

¹⁸ Se benɛ i kpa bubuubui ɔ, e tu fo kɛ je kpo, nɛ e je e tade ɔ he.”

¹⁹ Benɛ Yosef nyɔmtsɛ ɔ nu ní ɔmɛ nɛ e yo ɔ de ke Yosef pee lɛ ɔ, e mi mi fu wawɛɛ nitsɛ,

²⁰ nɛ e ha a nu Yosef kɛ wo tsu ngɛ he nɛ a woɔ matsɛ pamitsɛmɛ ɔmɛ tsu ngɛ ɔ; nɛ e hi lejɛ ɔ.

²¹ Se Yawɛ kɛ Yosef ngɛ; nɛ e na lɛ mɔbɔ, nɛ e ha nɛ pamitsɛmɛ ɔmɛ a nɔ hyɛlɔ ɔ na e he bua jɔmi.

²² Pamitsɛmɛ ɔmɛ a nɔ hyɛlɔ ɔ to pamitsɛmɛ ɔmɛ tsuo kɛ wo Yosef dɛ mi. Lɛ ji nɔ nɛ hyɛɛ a nɔ kɛ peeɔ nɔ́ tsuaa nɔ́ ngɛ lejɛ ɔ.

²³ Pamitsɛmɛ ɔmɛ a nɔ hyɛlɔ ɔ pa gba we e he nya hu kaa nɔ́ ko nɛ e to kɛ wo Yosef dɛ mi ɔ, lɛ nitsɛ e ma pa hyɛ nɔ. Ejakaa Yawɛ kɛ Yosef ngɛ, nɛ nɔ́ tsuaa nɔ́ nɛ e peeɔ ɔ, e yeɔ manye.