Mose I, 38 - BAIBLO ALOO NGMAMI KLƆUKLƆU Ɔ

Yuda kɛ Tamar

¹ Jamɛ a be ɔ mi nɔuu ɔ, Yuda je e nyɛmimɛ ɔmɛ a he, nɛ e ya hi nyumu ko nɛ je Adulam, nɛ a tsɛɛ lɛ Hira ngɔ.

² Yuda ya na Kanaan yiheyo ko ngɛ lejɛ ɔ nɛ a tsɛɛ e tsɛ biɛ ke Shua. E ngɔ lɛ,

³ nɛ e kɛ lɛ fɔ binyumu, nɛ Yuda wo lɛ biɛ ke Er.

⁴ Yo ɔ na mi ekohu, nɛ e fɔ binyumu ekohu, nɛ e wo lɛ ke Onan.

⁵ E kpale fɔ binyumu ekohu, nɛ e wo lɛ Shela. Benɛ a fɔ binyumuyo nɛ ɔ, Yuda ngɛ Akzib.

⁶ Yuda ya ngɔ yo ko nɛ a tsɛɛ lɛ Tamar ba ha Er, e bitɛte ɔ.

⁷ Yuda bitɛte Er pee e he nɔmlɔ yayami. Nɔ́ nɛ ɔ ngɔɛ Yawɛ nya; lɔ ɔ he ɔ, Yawɛ gbe lɛ.

⁸ Pee se ɔ, Yuda de Onan ke, “Yaa nɛ o kɛ o nyɛmi ɔ yalɔyo ɔ nɛ ya hwɔ. E ji o blɔ nya ní tsumi kaa o ngɔ o nyɛmi ɔ yalɔyo ɔ, konɛ o kɛ lɛ nɛ fɔ bimɛ ha o nyɛmi ɔ.”

⁹ Se Onan le kaa bimɛ ɔmɛ ba be e nɔ pee. Enɛ ɔ he je ɔ, be tsuaa be nɛ e kɛ e nyɛmi ɔ yo ɔ ma na bɔmi ɔ, e haa nɛ nyu nɛ jeɔ e he ɔ pueɔ zugba, bɔ nɛ pee nɛ e ko fɔ bimɛ ha e nyɛmi ɔ.

¹⁰ Se nɔ́ nɛ e pee nɛ ɔ sɛ́ Yawɛ hɛ mi; lɔ ɔ he ɔ, Yawɛ gbe lɛ hulɔ.

¹¹ Kɛkɛ nɛ Yuda de e nganyɛ Tamar ke, “Yaa nɛ o ya hi si ngɛ o tsɛ we ɔ mi kaa yalɔyo kɛ yaa si ye bi Shela maa wa.” E de enɛ ɔ, ejakaa e ye gbeye kaa lɛ hu e ma ba gbo kaa bɔ nɛ e nyɛmimɛ ɔmɛ gbo ɔ. Lɔ he ɔ, Tamar je kɛ ho e tsɛ we mi ya.

¹² Pee se ɔ, Yuda yo ɔ nɛ ji Shua biyo ɔ ba gbo. Benɛ Yuda nyɛ ya ha lɛ ta a, e kɛ e huɛ Hira nɛ je Adulam ɔ ho Timna ya, ngɛ he nɛ e to ɔmɛ a he bwɔmi sali ɔmɛ ngɛ ɔ.

¹³ Nɔ ko ya naa Tamar nane nɔ kaa e ngatsɛ ɔ yaa Timna nɛ e ya sã e to ɔmɛ a he bwɔmi.

¹⁴ Lɔ ɔ he ɔ, e je yalɔyo bo ɔ nɛ e bu ɔ ngɔ fɔ si. E tsake e he; e kɛ hɛ mi hami nɔ́ ha e hɛ mi, nɛ e ho ya hi si ngɛ Enaim ma a nya, ngɛ Timna blɔ ɔ nɔ. E pee nɔ́ nɛ ɔ, ejakaa e na kaa Shela wa, se a kɛ lɛ Tamar a ha we lɛ.

¹⁵ Benɛ Yuda na lɛ ɔ, e bu lɛ kaa yo yaholɔ ko; ejakaa e kɛ nɔ́ ha e hɛ mi.

¹⁶ Yuda ho ya na lɛ ngɛ blɔ ɔ tue, nɛ e de lɛ ke, “I kɛ mo maa hwɔ si.” Mamoo Yuda li tete kaa e nganyɛ ɔ nɛ e kɛ ngɛ munyu tue ɔ nɛ. Tamar bi lɛ ke, “Mɛni o ma ha mi loko o kɛ mi maa hwɔ si ɔ?”

¹⁷ Yuda he nɔ ke, “Ma ha nɛ a nu apletsi wayoo ko ngɛ ye to ɔmɛ a kpɛti kɛ ba ha mo.” Tamar de lɛ ke, “Saminya! Si nɔ́ ko ha mi nɛ o kɛ to mi awaba kɛ yaa si be nɛ o kɛ apletsi ɔ maa mane mi.”

¹⁸ Yuda bi lɛ ke, “Mɛni ma si ha mo kɛ to mo awaba a?” Tamar he nɔ ke, “O womi nya sɔumi nɔ́ kɛ e he kpa, kɛ o dɛma tso ɔ.” Yuda ngɔ ní ɔmɛ ngɔ ha lɛ. Kɛkɛ nɛ e kɛ lɛ na bɔmi, nɛ Tamar ngɔ hɔ.

¹⁹ Tamar je kɛ ho we mi ya, nɛ e ya je e hɛ mi hami nɔ́ ɔ ngɔ fɔ si, nɛ e bu e yalɔyo bo ɔ.

²⁰ Yuda tsɔ e huɛ Hira ke e ngɔ apletsi ɔ ya ha yo ɔ, konɛ e he ní ɔmɛ nɛ e kɛ to lɛ awaba a ngɛ e dɛ kɛ ba. Se Hira nɛ yo ɔ ngɛ lejɛ ɔ.

²¹ E bi nyumu komɛ ngɛ Enaim ma a mi ke, “Yo yaholɔ ɔ nɛ hii si ngɛ hiɛmɛ nɛ ɔ, jije e ngɛ?” Se a he nɔ ke, “Yo yaholɔ ko kaa ja be hiɛmɛ nɛ ɔ.”

²² Hira kpale e se kɛ ba Yuda ngɔ ekohu, nɛ e ba de lɛ ke, “I nɛ yo ɔ. Nyumu ɔmɛ nɛ ngɛ lejɛ ɔ hu ke yo yaholɔ ko kaa ja be lejɛ ɔ.”

²³ Yuda de ke, “Ha ní ɔmɛ nɛ a hi e dɛ. Wa be suɔe nɛ nihi nɛ a ba muɔ wɔ; i bɔ mɔde kaa ma wo lɛ hiɔ, se mo nɛ o nɛ lɛ.”

²⁴ Maa pee hlami etɛ se ɔ, nɔ ko ba de Yuda ke, “O nganyɛ Tamar ya nyɛɛ basabasa, nɛ hɔ ba e he nɛ a li hɔtsɛ.” Yuda fa ke, “A je lɛ kpo, nɛ a ya sã lɛ.”

²⁵ Benɛ a kɛ lɛ je kpo kɛ ba a, e tsɔ nɛ a ya de e ngatsɛ ɔ ke, “Nɔ nɛ níhi ji nɛ ɔmɛ ɔ, lɛ nɛ wo mi hɔ ɔ nɛ. Hyɛ kaa o maa le ní nɛ ɔmɛ a tsɛ lo; womi nya sɔumi nɔ́ kɛ e he kpa nɛ ɔ, kɛ tso nɛ ɔ.”

²⁶ Yuda le ní ɔmɛ a mi tso, nɛ e de ke, “E nɔ́ da; ye nɔ́ be mi. Jinɛ e sa kaa i ko ngɔ lɛ ngɔ ha ye bi Shela nɛ e gba lɛ.” Nɛ́ pee ja a, Yuda kɛ Tamar na we bɔmi hu.

²⁷ Benɛ Tamar fɔmi be su ɔ, a na kaa hawi lɛ ngɛ e muklii mi ɔ nɛ.

²⁸ Jehanɛ, benɛ e nu kɔɔmi ɔ, hayo ɔ kake je e nine kpo. Fɔlɔyo ɔ nu e nine ɔ, nɛ e kɛ kpa tsu fi nine ɔ he, nɛ e de ke, “Nɔ nɛ ɔ ba kekle.”

²⁹ Se hayo ɔ gbla e nine ɔ se, nɛ e nyɛmi ɔ kple kɛ sɛ e hlami. Kɛkɛ nɛ fɔlɔyo ɔ de ke, “Bɔ nɛ o gba o blɔ kɛ ba ha ji nɛ ɔ!” Enɛ ɔ he je ɔ, a wo lɛ biɛ ke Perez.

³⁰ Kɛkɛ nɛ e nyɛmi ɔ hu kple kɛ e nine kpa tsu ɔ, nɛ a wo lɛ Zera.