Mose I, 35 - BAIBLO ALOO NGMAMI KLƆUKLƆU Ɔ

Mawu gbaa Yakob ngɛ Betel

¹ Mawu de Yakob ke, “Yaa Betel esɔ, nɛ o ya hi lejɛ ɔ. Yaa ma bɔ sami la tɛ ngɛ lejɛ ɔ ha imi, Mawu ɔ nɛ i je ye he kpo ngɔ tsɔɔ mo, benɛ o tu o nyɛmi Esau nya fo ɔ.”

² Kɛkɛ nɛ Yakob de e yi ɔmɛ, kɛ e bimɛ ɔmɛ, kɛ nɔ tsuaa nɔ nɛ kɛ lɛ ngɛ ɔ ke, “Nyɛ jé ma se mawu ɔmɛ nɛ ngɛ nyɛ dɛ ɔ ngɔ pue he; nyɛɛ tsukɔ nyɛ he, nɛ nyɛɛ wo tadehi nɛ a he tsɔ.

³ Wa ngɛ hiɛ ɔ jee kɛ yaa Betel. Ma ma bɔ sami la tɛ ngɛ lejɛ ɔ ha Mawu ɔ nɛ piɛ ye he ngɛ ye amanehlu be ɔ mi, nɛ e kɛ mi ngɛ kɛ ba si mwɔnɛ nɛ ɔ.”

⁴ A ngɔ a ma se mawu ɔmɛ tsuo nɛ ngɛ a dɛ ɔ, kɛ a tue nya ní ɔmɛ ba ha Yakob; nɛ Yakob pu ngɛ tso ngua a sisi ngɛ Shekem kasa nya.

⁵ Benɛ Yakob kɛ e yi ɔmɛ, e bimɛ ɔmɛ, kɛ e we bi ɔmɛ hia kɛ yaa a, sawale nu ni ɔmɛ ngɛ ma amɛ nɛ bɔle mɛ ɔ a mi; lɔ ɔ he ɔ, a nyɛɛ we a se.

⁶ Yakob kɛ e we bi ɔmɛ tsuo ba su Luz, ngɛ Kanaan zugba a nɔ. Ma nɛ ɔ biɛ kpa ji Betel.

⁷ Yakob ma bɔ sami la tɛ ngɛ lejɛ ɔ, nɛ e kɛ Betel Mawu ɔ biɛ wo lɛ; ejakaa lejɛ ɔ ji he nɛ Mawu je e he kpo ngɔ tsɔɔ lɛ ngɛ, benɛ e tu e nyɛmi Esau nya fo ɔ.

⁸ Bimɛanyɛ ɔ nɛ hyɛ Rebeka ngɛ e jokuɛ mi, nɛ a tsɛɛ lɛ Debora a ba gbo, nɛ a pu lɛ ngɛ tso ngua a sisi, ngɛ Betel leneyi je. Enɛ ɔ he je ɔ, a wo lejɛ ɔ biɛ ke, “Tso ngua he nɛ a woɔ ya ngɛ.”

⁹ Benɛ Yakob je Mesopotamia kɛ ba a, Mawu je e he kpo ngɔ tsɔɔ lɛ ekohu, nɛ e gbaa lɛ.

¹⁰ Mawu de lɛ ke, “O biɛ ji Yakob; se kɛ je mwɔnɛ ɔ kɛ yaa a, a be mo tsɛe ja hu; a ma tsɛ mo Israel.” Kɛkɛ nɛ Mawu wo lɛ biɛ ke Israel.

¹¹ Jehanɛ Mawu de lɛ ke, “Imi ji Mawu Ope ɔ nɛ; mo fɔ bimɛ babauu. Niinɛ, je mahi kɛ matsɛmɛ maa je o mi.

¹² Zugba a nɛ i ngɔ kɛ ha Abraham kɛ Isak ɔ, i kɛ ma ha mo kɛ o nina.”

¹³ Kɛkɛ nɛ Mawu je e he ngɛ he nɛ e kɛ lɛ tu munyu ngɛ ɔ.

¹⁴ Yakob kɛ kaimi tɛ ko ma si ngɛ he nɛ Mawu kɛ lɛ ba tu munyu ngɛ ɔ. E plɛ wai kɛ oliv nu ngɔ pue nɔ, nɛ e kɛ pee tɛ ɔ klɔuklɔu kɛ ha Mawu.

¹⁵ E wo lejɛ ɔ biɛ ke Betel; e sisi ji Mawu we.

Rahel gbenɔ

¹⁶ Yakob kɛ e yi ɔmɛ, kɛ e bimɛ ɔmɛ hia kɛ je Betel, nɛ a pue blɔ. Benɛ e piɛ bɔɔ nɛ a maa su Efrat ɔ, Rahel fɔmi be su, nɛ e nu kɔɔmi nɛ nya wa.

¹⁷ Benɛ e fɔmi ɔ he ba wa a, fɔlɔyo ɔ nɛ ngɛ lɛ hyɛe ɔ de lɛ ke, “Rahel, koo ye gbeye; o fɔ binyumu ekohu!”

¹⁸ Se Rahel miɔ nɛ e ma gbo. Loko e ma e nya a, e wo bi ɔ nɛ e fɔ ɔ ke Benoni; se e tsɛ lɛɛ biɛ nɛ e wo lɛ ji Benyamin.

¹⁹ Benɛ Rahel gbo ɔ, a pu lɛ ngɛ blɔ nɛ yaa Efrat ɔ he. Amlɔ nɛ ɔ lɛɛ a tsɛɛ Efrat ma a ke Betlehem.

²⁰ Yakob kɛ kaimi tɛ ma Rahel yɔkɔ ɔ nɔ, nɛ tɛ ɔ ngɛ lejɛ ɔ kɛ ba si mwɔnɛ ɔ.

²¹ Yakob, nɛ e biɛ tsake pee Israel ɔ, tsa e nyɛɛmi ɔ nɔ, nɛ e ya ma e bo tsu ɔ ngɛ Eder mɔ ɔ se.

Yakob binyumu ɔmɛ

²² Benɛ Yakob ngɛ jamɛ a zugba a nɔ ɔ, Ruben kɛ Bilha, e tsɛ pla amɛ a ti nɔ kake ɔ ya na bɔmi; nɛ Yakob nu he. Yakob ngɛ binyumuhi nyɔngma kɛ enyɔ.

²³ Lea binyumuhi ji nɛ ɔmɛ nɛ: Ruben (Yakob bitɛte), Simeon, Levi, Yuda, Isakar, kɛ Zebulun.

²⁴ Rahel binyumuhi ji Yosef kɛ Benyamin.

²⁵ Rahel mawayo Bilha binyumuhi ji Dan kɛ Naftali.

²⁶ Lea mawayo Zilpa binyumuhi ji Gad kɛ Asher. A fɔ bimɛ nɛ ɔmɛ ha Yakob ngɛ Mesopotamia.

Isak gbenɔ

²⁷ Yakob ba e tsɛ Isak ngɔ ngɛ Mamre, he nɛ Abraham kɛ Isak ba to nubwɔ ngɛ ɔ. Mamre biɛ kpa ji Kiriat Arba, aloo Hebron.

²⁸ Isak ye jeha lafa kɛ nyingmi kpaanyɔ,

²⁹ nɛ e gbo benɛ e bwɔ kotokoto; nɛ e bimɛ Esau kɛ Yakob pu lɛ.