Mose I, 33 - BAIBLO ALOO NGMAMI KLƆUKLƆU Ɔ

Yakob kɛ Esau kpe

¹ Yakob na Esau nɛ e kɛ nihi lafa eywiɛ ma e ngɔ; lɔ ɔ he ɔ, e dla e bimɛ ɔmɛ ngɔ ha Lea kɛ Rahel kɛ mawayi enyɔ ɔmɛ.

² E ngɔ mawayi ɔmɛ kɛ a bimɛ ɔmɛ ngɔ to hɛ mi. Lea kɛ e bimɛ ɔmɛ nyɛɛ se, nɛ nyagbe ɔ, Rahel kɛ Yosef ba.

³ Yakob nitsɛ lɛɛ e sɛ hlami, nɛ benɛ e kɛ e nyɛmi ɔ maa ho buami ya a, e kpla si nɛ e kɛ e hɛ mi bu si si kpaago.

⁴ Se Esau tu fo ba kpee Yakob nɛ e fua lɛ atuu. E kɛ e nine fɔ e kuɛ mi, nɛ e fiɔ e nya he, nɛ a fo ya.

⁵ Benɛ Esau na yi ɔmɛ kɛ jokuɛwi ɔmɛ ɔ, e bi ke, “Mɛnɔmɛ o kɛ nyɛɛ ɔ?” Yakob he nɔ ke, “Bimɛ nɛ Mawu kɛ dloo imi, o tsɔlɔ ɔ ji nɛ ɔmɛ nɛ.”

⁶ Kɛkɛ nɛ mawayi ɔmɛ kɛ a bimɛ ɔmɛ hɛ mɛ kɛ ba, nɛ a ba kpla si.

⁷ Lea kɛ e bimɛ ɔmɛ hu ba, nɛ a ba kpla si. Nyagbe ɔ, Yosef kɛ Rahel hu ba, nɛ a ba kpla si ja nɔuu.

⁸ Esau bi ke, “Lohwe kuukuu nɛ ɔmɛ tsuo nɛ i kɛ kpe ɔ, kɛ ji e sisi kɛɛ?” Yakob he nɔ ke, “Nike ní nɛ i kɛ ma mo, ye nyɔmtsɛ ɔ kpatami ji nɛ ɔmɛ nɛ.”

⁹ Se Esau de lɛ ke, “Ye nyɛmi, nɔ́ nɛ i ngɛ ɔ hiɛ; ha nɛ enɛ ɔmɛ nɛ a hi si ha mo.”

¹⁰ Yakob he nɔ ke, “Dɛbi! I kpa mo pɛɛ, ke o kɛ ye tɔmi pa mi ɔ, lɛɛ mo he ye nike ní nɛ ɔmɛ. Anɔkuale mi ɔ, nɛ i na o hɛ mi ɔ, e ngɛ kaa nɔ́ nɛ i na Mawu nitsɛ hɛ mi; ejakaa o ná ye he tsui, nɛ o he mi atuu.

¹¹ I kpa mo pɛɛ nɛ o he nike ní nɛ ɔmɛ nɛ i ngɔ ba ha mo ɔ; Mawu nɛ na mi mɔbɔ, nɛ e ha mi nɔ́ tsuaa nɔ́ nɛ hia mi.” Kikɛ nɛ ɔ Yakob hao Esau hluu kɛ ya si Esau kplɛɛ nɛ e he nike ní ɔmɛ.

¹² Jehanɛ Esau de Yakob ke, “Ha waa ho; ma sɛ o hlami.”

¹³ Yakob he nɔ ke, “Ye nyɔmtsɛ, mo nitsɛ o na kaa jokuɛwi ɔmɛ a hɛ mi fa we lolo. Jehanɛ hu, tohi kɛ nahi nɛ a bimɛ ji nyɔ nya lolo ɔ hu a he ní tsumi fɔɔ si ngɛ ye kuɛ nɔ. Ke a ha nɛ a nyɛɛ tsɔ pe nine ligbi kake po ɔ, lohwe ɔmɛ tsuo pɛpɛɛpɛ ma gbo.

¹⁴ Enɛ ɔ he je ɔ, ye nyɔmtsɛ, i kpa mo pɛɛ nɛ o sɛ hlami; i kɛ lohwe ɔmɛ kɛ jokuɛwi ɔmɛ maa hi nyɛɛe blɛuublɛuu kɛ yaa si wa ma ba na mo ngɛ Edom.”

¹⁵ Esau de lɛ ke, “Saminya! Lɛɛ ma si ye we bi ɔmɛ ekomɛ ngɛ hiɛ ɔ nɛ a tsɔɔ nyɛ blɔ.” Se Yakob he nɔ ke, “Oo! E he hia we! Ke ye nyɔmtsɛ ɔ na ye he tsui kɛkɛ ɔ, lɔ ɔ hiɛ.”

¹⁶ Esau kpale e se jamɛ a ligbi ɔ kɛ ho Edom ya.

¹⁷ Se Yakob lɛɛ e pue nɔ kɛ ho Sukot ya. E ya po we ngɛ lejɛ ɔ, nɛ e ma tsu ha e lohwe ɔmɛ hulɔ. Enɛ ɔ he je ɔ, a wo lejɛ ɔ biɛ ke Sukot.

¹⁸ Yakob kpale e se kɛ je Mesopotamia kɛ ba Shekem ngɛ Kanaan zugba a nɔ fiafiaafia, nɛ e ba ma e bo tsu ɔmɛ ngɛ zugba ko nɔ, ngɛ ma a nya.

¹⁹ E he jamɛ a zugba a ngɛ Shekem tsɛ Hamor dɛ kɛ sika hiɔ yi lafa. Hamor ji nɔ nɛ to Shekem ma a sisi.

²⁰ Yakob ma bɔ sami la tɛ ngɛ lejɛ ɔ, nɛ e kɛ Israel Mawu ɔ biɛ wo lɛ.