Mose I, 30 - BAIBLO ALOO NGMAMI KLƆUKLƆU Ɔ

¹ Benɛ Rahel na kaa e fɔ we ha Yakob ɔ, e hɛ kɔ̃ e nyɛmiyo ɔ nɔ, nɛ e de Yakob ke, “Ha mi bimɛ, ke pi ja a, ma gbo.”

² Yakob mi mi fu lɛ wawɛɛ nitsɛ, nɛ e bi lɛ ke, “Anɛ Mawu ji mi lo? Lɛ ji nɔ nɛ tsi o fɔmi nya a nɛ.”

³ Rahel he nɔ ke, “Hyɛ, ye mawayo Bilha ji nɛ ɔ nɛ; o kɛ lɛ nɛ hwɔ, nɛ e fɔ ha mi, konɛ imi hu ma na bimɛ kɛ gu e nɔ.”

⁴ Rahel kɛ e mawayo Bilha ha Yakob, nɛ Yakob kɛ lɛ na bɔmi.

⁵ Bilha ba na mi nɛ e fɔ binyumu ha Yakob.

⁶ Rahel wo lɛ biɛ ke Dan, nɛ e de ke, “Mawu wo mi nguɔ. E nu ye kue fami ɔ, nɛ e ha mi binyumu.”

⁷ Bilha ba na mi ekohu, nɛ e fɔ binyumu enyɔne ha Yakob.

⁸ Rahel wo lɛ biɛ ke Naftali, nɛ e de ke, “I kɛ wa wenyɛ ɔ hwu ta nɛ nya wa, nɛ i ye e nɔ.”

⁹ Benɛ Lea na kaa e fɔmi se po ɔ, e kɛ e mawayo Zilpa ha Yakob kaa e yo,

¹⁰ nɛ Yakob kɛ lɛ fɔ binyumu.

¹¹ Lea wo lɛ biɛ ke Gad, nɛ e de ke, “Ye he ba ní pɛ!”

¹² Zilpa fɔ binyumu enyɔne ha Yakob.

¹³ Lea wo lɛ biɛ ke Asher, nɛ e de ke, “Hyɛ bɔ nɛ ye bua jɔ ha! Yi kpa amɛ ma de ke a gbaa mi saminya.”

¹⁴ Ligbi ko, benɛ a ngɛ ngma kpae ɔ, Ruben ya na suɔmi tso yiblii komɛ ngɛ nga a nɔ, nɛ e ngɔ kɛ ba ha e nyɛ Lea. Rahel de Lea ke, “I kpa mo pɛɛ, ha mi suɔmi tso yiblii nɛ o bi ɔ kɛ ba a eko.”

¹⁵ Lea he nɔ ke, “Nɛ o kpɔ ye huno ɔ ngɛ ye dɛ ɔ, lɔ ɔ pi ha mo lolo? Ye bi ɔ suɔmi tso yiblii nɛ ɔ hu o ma kpɔ lo?” Rahel de lɛ ke, “Ha mi o bi ɔ suɔmi tso yiblii ɔ, konɛ Yakob kɛ mo nɛ hwɔ nyɔ nɛ ɔ mi.”

¹⁶ Gbɔkuɛ nya si benɛ Yakob je ngmɔ mi kɛ ma a, Lea je kpo ya kpee lɛ, nɛ e de lɛ ke, “Ma hwɔ o ngɔ mwɔnɛ ɔ, ejakaa i kɛ suɔmi tso yiblii ɔ nɛ ye bi ɔ kɛ ba a wo he hiɔ.” Lɔ ɔ he ɔ, Yakob kɛ lɛ na bɔmi jamɛ a nyɔ ɔ mi.

¹⁷ Mawu bu Lea kue fami ɔ tue, nɛ e ba na mi, nɛ e kɛ Yakob fɔ binyumu enuɔne.

¹⁸ Lea wo lɛ biɛ ke Isakar, nɛ e de ke, “I kɛ ye mawayo ɔ ha ye huno, nɛ Mawu wo mi hiɔ.”

¹⁹ Lea kɛ Yakob na bɔmi ekohu, nɛ Lea ba na mi, nɛ e fɔ binyumu ekpane.

²⁰ E wo lɛ biɛ ke Zebulun, nɛ e de ke, “Mawu ke mi nɔ́ kpakpa ko. Jehanɛ lɛɛ ye huno kɛ mi maa hi si saminya, ejakaa i kɛ lɛ fɔ binyumuhi ekpa.”

²¹ Pee se ɔ, e fɔ biyo nɛ e wo lɛ biɛ ke Dina.

²² Mawu kai Rahel hulɔ; Mawu bu e kue fami ɔ tue, nɛ e bli e muklii mi nya.

^23-24 Rahel ba na mi, nɛ e fɔ binyumu. E wo lɛ biɛ ke Yosef, nɛ e de ke, “Mawu je ye hɛ mi zo. Mawu nɛ e pa ha mi binyumu kpa.”

Yakob kɛ Laban wo nɔ́ he jua

²⁵ Benɛ a fɔ Yosef se ɔ, Yakob de Laban ke, “Wo mi blɔ konɛ ma kpale kɛ ho ye je he, kɛ ye zugba nɔ ya.

²⁶ Ye yi ɔmɛ kɛ ye bimɛ ɔmɛ nɛ i tsu ní ha mo nɛ i kɛ na mɛ ɔ, ngɔɔ mɛ ngɔ ha mi nɛ ma ho. Mo nitsɛ o le kaa i sɔmɔ mo saminya.”

²⁷ Laban he nɔ ke, “I kpa mo pɛɛ nɛ o bu nɔ́ nɛ ma de nɛ ɔ tue. I ya bi ní, nɛ a de mi ke o he nɛ Yawɛ gbaa mi ngɛ.

²⁸ Tsɔɔ mi bɔ nɛ o ma he, konɛ ma wo mo hiɔ.”

²⁹ Yakob he nɔ ke, “Mo nitsɛ o le bɔ nɛ i sɔmɔ mo, kɛ bɔ nɛ i hyɛ o lohwe ɔmɛ.

³⁰ Benɛ i ba a, lohwe bɔɔ pɛ o ngɛ. Se amlɔ nɛ ɔ lohwe ɔmɛ bɔ, nɛ a he hiɛ babauu; Yawɛ gu ye nɔ nɛ e kɛ gbaa mo babauu. Amlɔ nɛ ɔ, e su be nɛ ma to blɔ nya kɛ ha imi nitsɛ ye we ɔ.”

³¹ Laban bi lɛ ke, “Nyɛmɛ ma ha mo?” Yakob he nɔ ke, “I hla we hiɔwo ko. Ke o maa pee nɔ́ nɛ ma bi mo nɛ ɔ ha mi ɔ, lɛɛ ma tsa nɔ ma hyɛ o to ɔmɛ ha mo.

³² Ngmɛɛ mi blɔ nɛ ma ya kpa o to ɔmɛ tsuo a mi mwɔnɛ ɔ, nɛ ma ngɔ jijɔ yumu tsuaa jijɔ yumu, kɛ apletsi bi tsuaa apletsi bi nɛ e he ngɛ huatahuata, loo a tsɔɔtsɔɔ e he. Hiɔwo pɛ nɛ i ngɛ hlae ji nɛ ɔ nɛ.

³³ Pee se, ke o ma ye hiɔwo ɔ bumi ɔ, o maa na kaa i ye mo anɔkuale, loo i sisi mo. Ke o ba na akpakpo ko nɛ e he be huatahuata nɛ a tsɔɔtsɔɔ we e he hulɔ, aloo jijɔ ko nɛ yu we ɔ, lɛɛ o le kaa imi nɛ i ju lɛ.”

³⁴ Laban he nɔ ke, “Saminya! Wa maa pee kaa bɔ nɛ o de ɔ.”

³⁵ Se jamɛ a nyɔ ɔ mi ɔ, Laban je akpakpohi nɛ a ngmaangmaa a he ɔ, kɛ ní nɛmɛ nɛ a tsɔɔtsɔɔ a he ɔ, kɛ apletsi yihi tsuo nɛ a he ngɛ huatahuata, loo a tsɔɔtsɔɔ a he, loo a wo a he so futaa a kɛ je to tsu ɔ mi. Jijɔ yumu ɔmɛ hu e je mɛ tsuo kulaa kɛ je lejɛ ɔ. Laban kɛ lohwe ɔmɛ wo e binyumu ɔmɛ a dɛ mi,

³⁶ nɛ e kɛ mɛ kɛ lohwe ɔmɛ je Yakob he, nɛ e nyɛɛ ligbi etɛ. Yakob hyɛ Laban lohwe kpa amɛ nɛ piɛ ɔ.

³⁷ Yakob ya po tso kɔnihi kɛ je tso slɔɔto etɛ a he. E ngmla tso toto ɔ ngɛ he komɛ, nɛ futaa je si ngɛ tso kɔni ɔmɛ a mi.

³⁸ E ngɔ tso kɔnihi nɛ e ngmla a he ɔ ba pue to nyu numi ní ɔmɛ a mi ngɛ to ɔmɛ a hɛ mi. E ngɔ mɛ ba pue lejɛ ɔ, ejakaa ke to ɔmɛ ba nyu numi ɔ, a kuɔɔ a he ngɛ lejɛ ɔ.

³⁹ Benɛ akpakpo ɔmɛ kuɔ eyi ɔmɛ ngɛ tso kɔni ɔmɛ a hɛ mi ɔ, a fɔ bimɛ nɛ a he ngmaangmaa. Ekomɛ a he ngɛ huatahuata, nɛ ekomɛ hu a he tsɔɔtsɔɔ mi.

⁴⁰ Yakob je jijɔ ɔmɛ kɛ je apletsi ɔmɛ a he, nɛ e ha nɛ a plɛ a hɛ mi ngɔ kpee Laban to huatahuata amɛ, kɛ yumuyumu ɔmɛ. Bɔ nɛ Yakob pee nɛ e kɛ na lɛ nitsɛ e to tsu ji nɛ ɔ nɛ; e kɛ e to ɔmɛ futuu we Laban ní ɔmɛ.

⁴¹ Be tsuaa be nɛ tohi nɛ ngɛ he wami saminya a ma bɔni a he kuɔmi ɔ, Yakob maa ngɔ tso kɔni ɔmɛ kɛ ba wo lohwehi a nyu numi nɔ́ ɔ mi ngɛ to ɔmɛ a hɛ mi.

⁴² Ke lohwe ɔmɛ be he wami kpakpa ko ɔ, lɛɛ Yakob kɛ tso kɔni ɔmɛ be a hɛ mi fɔe. Enɛ ɔ he je ɔ, lohwe wudɔwudɔ ɔmɛ ba pee Laban níhi, nɛ ní nɛmɛ nɛ ngɛ he wami saminya a ba pee Yakob níhi.

⁴³ Blɔ nɔ nɛ Yakob gu nɛ e kɛ na ní kpɔtɔɔ ji nɛ ɔ nɛ. E na tohi, nyɔguɛhi, afukpɔngɔhi, kɛ tejihi babauu.