Mose I, 29 - BAIBLO ALOO NGMAMI KLƆUKLƆU Ɔ

Yakob ya su Laban we ɔ mi

¹ Yakob tsa e blɔ hiami ɔ nɔ kɛ ya si e ya su zugba a nɛ ngɛ beleku je ɔ nɔ.

² Tlukaa a, e ya pã vu ko nɔ ngɛ nga a nɔ, nɛ to kuu etɛ hwɔɔ si kɛ bɔle vu ɔ. Jamɛ a vu ɔ mi nɛ a yɛɛ nyu ngɛ kɛ haa tohi nɛ a nuɔ, nɛ tɛ agbo ko ngɛ vu ɔ nya.

³ Ke to ɔmɛ tsuo ba bua a he nya ngɛ lejɛ ɔ, to hyɛli ɔmɛ ma kpɛne tɛ ɔ kɛ je vu ɔ nya nɛ a ma ha to ɔmɛ nyu. Kɛkɛ ɔ, a ma kpɛne tɛ ɔ kɛ ya to e blɔ he ekohu.

⁴ Yakob bi to hyɛli ɔmɛ ke, “Ye nyɛmimɛ, jije nyɛ je?” A he nɔ ke, “Wa je Haran.”

⁵ E bi mɛ ekohu ke, “Anɛ nyɛ le Nahor binyumu Laban lo?” A he nɔ ke, “Ee, wa le lɛ.”

⁶ E pa bi mɛ ke, “E ngɛ saminya lo?” A he nɔ ke, “Ee, e ngɛ saminya. Hyɛ, e biyo Rahel nɛ kpaka e to ɔmɛ kɛ ma a nɛ!”

⁷ Yakob de mɛ ke, “Je jɔɛ lolo; e sui be nɛ a maa wo lohwe ɔmɛ tsu mi. Nyɛ ha to ɔmɛ nyu nɛ a nu, nɛ nyɛɛ kpale mɛ kɛ ho nɛ a ya ye ní.”

⁸ To hyɛli ɔmɛ he nɔ ke, “Dɛbi, wa be nyɛe maa pee ja, ja to ɔmɛ tsuo ba bua a he nya ngɛ hiɛ ɔ, nɛ a kpɛne tɛ ɔ kɛ je vu ɔ nya, loko wa ma ha mɛ nyu.”

⁹ Benɛ Yakob kɛ mɛ ngɛ munyu tue kɛ mwɔɔ ɔ, Rahel ba su lejɛ ɔ kɛ e tsɛ to ɔmɛ; ejakaa lɛ ji nɔ nɛ hyɛɛ to ɔmɛ.

¹⁰ Benɛ Yakob na Rahel kɛ e tsɛko Laban to ɔmɛ ɔ, e ya kpɛne tɛ ɔ kɛ je vu ɔ nya nɛ e ha to ɔmɛ nyu.

¹¹ Lɔ ɔ se ɔ, e fua Rahel atuu, nɛ e kɛ bua jɔmi fo ya pue e nɔ.

¹² E de Rahel ke, “Ye nyɛmi ji mo; o tsɛ nyɛmiyo Rebeka a, e bi ji mi.” Rahel tu fo kɛ ho nɛ e ya bɔ e tsɛ amaniɛ.

¹³ Benɛ Laban nu e wɔfase Yakob he ɔ, e tu fo ya kpee lɛ, nɛ e pee lɛ atuu; e fiɔ e nya he, nɛ e kɛ lɛ ba we mi. Benɛ Yakob bɔ Laban nɔ́ tsuaa nɔ́ nɛ ba a,

¹⁴ Laban de ke, “Niinɛ, imi nitsɛ ye nyɛmi tutuutu ji mo!” Yakob hi Laban ngɔ hlami kake.

Yakob sɔmɔ Laban

¹⁵ Pee se ɔ, Laban de Yakob ke, “E ngɛ mi kaa o weku no ji mi lɛɛ, se e sɛ kaa o tsuɔ ní kɛ haa mi yaka. Tsɔɔ mi hiɔwo nɛ o ngɛ hlae.”

¹⁶ Laban ngɛ biyihi enyɔ; a tsɛɛ nɔkɔtɔma a ke Lea, nɛ e senɔ ɔ biɛ ji Rahel.

¹⁷ Lea hɛngmɛ ngɛ fɛu saminyayoo, se Rahel lɛɛ e nɔmlɔ tso ɔ kɛ e nɔ́ tsuaa nɔ́ hi kɛ pi si; e he ngɛ fɛu saminya.

¹⁸ Akɛnɛ Yakob suɔ Rahel he je ɔ, e de Laban ke, “Ma tsu ní ha mo jeha kpaago konɛ o kɛ Rahel, o bi wayo ɔ ha mi nɛ ma ngɔ.”

¹⁹ Laban he nɔ ke, “Saminya! I suɔ kaa i kɛ lɛ ma ha mo pe kaa i kɛ lɛ ma ha nɔ kpa ko. Lɔ ɔ he ɔ, moo hi ye ngɔ.”

²⁰ Yakob tsu ní jeha kpaago konɛ e kɛ na he blɔ nɛ e ngɔ Rahel. Se suɔmi nɛ e ngɛ kɛ ha Rahel he je ɔ, jeha kpaago ɔ be nɛ e pee lɛ kaa ligbi bɔɔ kɛkɛ.

²¹ Kɛkɛ nɛ Yakob de Laban ke, “Be ɔ nɛ wa to kaa ma tsu ní ha mo kɛ ya si ɔ, be ɔ su; ha mi o biyo ɔ nɛ ma ngɔ lɛ.”

²² Laban ngmɛ okplɔɔ agbo, nɛ e kpee nihi tsuo nɛ ngɛ lejɛ ɔ kɛ ba ní yemi ɔ.

²³ Se jamɛ a nyɔ ɔ mi ɔ, Laban kɛ e bi Lea mohu ba ha Yakob, nɛ e kɛ lɛ hwɔ.

²⁴ Laban ngɔ e nyɔguɛ yo ɔ nɛ a tsɛɛ lɛ Zilpa a ngɔ ha e bi Lea, nɛ e ba pee e mawayo.

²⁵ Yakob li kaa mamoo Lea mohu e kɛ hwɔ si ɔ, kɛ ya si mɔtu. Lɔ ɔ he ɔ, e bi Laban ke, “Mɛni o pee mi nɛ ɔ? Anɛ i tsu we ní ha we mo konɛ ma ngɔ Rahel lo? Mɛni he je mɔ nɛ o sisi mi?”

²⁶ Laban he nɔ ke, “Wa hiɛmɛ nɛ ɔ kusumi ngmɛ́ blɔ ja; a ha we jokuɛyo gba be mi nɛ nɔkɔtɔma gba we lolo.

²⁷ Mlɛ kɛ yaa si ayɛflo he nyami otsi ɔ maa be. Lɔ ɔ se ɔ, ke o maa wo si kaa o ma tsu ní ha mi jeha kpaago kpa kɛ piɛ he ɔ, i kɛ Rahel hu ma ha mo.”

²⁸ Yakob kplɛɛ, nɛ benɛ ayɛflo he nyami otsi ɔ be ɔ, Laban kɛ e bi Rahel hu ha lɛ.

²⁹ Laban kɛ e nyɔguɛ yo ɔ nɛ a tsɛɛ lɛ Bilha a ha Rahel, nɛ e ba pee e mawayo.

³⁰ Yakob kɛ Rahel hu na bɔmi, nɛ e suɔ lɛ kulaa pe Lea. Yakob tsu ní ha Laban jeha kpaago kɛ piɛ he.

Yakob bimɛ

³¹ Benɛ Yawɛ na kaa Yakob sume Lea kaa bɔ nɛ e suɔ Rahel ɔ, e ha Lea fɔ bimɛ; se Rahel pee yosa.

³² Lea ba na mi nɛ e fɔ binyumu. E wo lɛ biɛ ke Ruben, nɛ e de ke, “Yawɛ na ye we amanehlu ɔ; jehanɛ lɛɛ ye huno ɔ maa suɔ mi.”

³³ Lea ba na mi ekohu, nɛ e fɔ binyumu. E wo lɛ biɛ ke Simeon, nɛ e de ke, “Yawɛ nu kaa a sume mi, lɔ ɔ he ɔ, e ha mi binyumu nɛ ɔ hulɔ.”

³⁴ Lea ba na mi ekohu, nɛ e fɔ binyumu. E wo lɛ biɛ ke Levi, nɛ e de ke, “Jehanɛ lɛɛ ye huno ɔ kɛ e he maa mɛtɛ ye he kpɛii, ejakaa i fɔ binyumuhi etɛ ha lɛ.”

³⁵ Lɔ ɔ se ɔ, e ba na mi ekohu, nɛ e fɔ binyumu. E wo lɛ biɛ ke Yuda, nɛ e de ke, “Jehanɛ lɛɛ ma je Yawɛ yi.” Kɛkɛ nɛ e po fɔmi.