Mose I, 27 - BAIBLO ALOO NGMAMI KLƆUKLƆU Ɔ

Isak gbaa Yakob

¹ Benɛ Isak ba bwɔ, nɛ e hɛngmɛ yu ɔ, e tsɛ e bi nɔkɔtɔma Esau ɔ, nɛ e de lɛ ke, “Ye bi!” Esau he nɔ ke, “Tsaatsɛ, i ngɛ hiɛ ɔ.”

² Isak de lɛ ke, “Jehanɛ lɛɛ i bwɔ, nɛ ye gbenɔ be su ta.

³ Ngɔɔ o kɛ̃ɛ̃ mi bihi nɛ o ya nga nɔ nɛ o ya gbe de lo kɛ ba.

⁴ Kɛ pee niye ní nɛ ngɔɔ kaa bɔ nɛ i suɔ ɔ. Ngɔɔ ba ha mi nɛ ma ye, nɛ ma gbaa mo loko ma gbo.”

⁵ Benɛ Isak kɛ Esau ngɛ munyu tue ɔ, Rebeka ngɛ tue bue. Lɔ ɔ he ɔ, benɛ Esau ho pu mi ya nɛ e ya da de ɔ,

⁶ Rebeka de Yakob ke, “I nu nɛ o tsɛ ngɛ o nyɛmi Esau dee ke,

⁷ ‘Yaa hla de lo kɛ ba nɛ o kɛ ba pee niye ní nɛ ngɔɔ ha mi nɛ ma ye nɛ ma gbaa mo ngɛ Yawɛ hɛ mi loko ma gbo.’

⁸ Lɔ ɔ he ɔ, ye bi, bu mi tue konɛ o pee nɔ́ nɛ ma de mo nɛ ɔ.

⁹ Yaa to tsu ɔ mi, nɛ o ya nu apletsi saminyawiiwi enyɔ kɛ ba nɛ ma kɛ pee niye ní nɛ ngɔɔ kaa bɔ nɛ o tsɛ suɔ ɔ.

¹⁰ O kɛ niye ní ɔ ma ya ha o tsɛ nɛ e ye, konɛ e gbaa mo loko e gbo.”

¹¹ Yakob de e nyɛ Rebeka ke, “Ye nyɛmi Esau ɔ, bwɔmitsɛ ji lɛ, se imi lɛɛ ye he womi nɔ ngɛ tlotlo.

¹² Eko ɔ, tsaatsɛ maa pɛtɛ ye he, nɛ e maa na kaa i sisi lɛ; nɛ i kɛ gbiɛmi mohu, se pi gbaami maa ba imi nitsɛ ye nɔ.”

¹³ E nyɛ ɔ he nɔ ke, “Ye bi, ha nɛ o gbiɛmi ɔ nɛ ba ye nɔ. Nɔ́ nɛ i de mo ke o pee ɔ, moo lɛɛ moo pee kɛkɛ; yaa nɛ o ya nu apletsi ɔmɛ kɛ ba.”

¹⁴ Kɛkɛ nɛ Yakob ya nu apletsi ɔmɛ kɛ ba, nɛ e nyɛ kɛ mɛ pee niye ní nɛ ngɔɔ kaa bɔ nɛ e tsɛ Isak suɔ ɔ.

¹⁵ Lɔ ɔ se ɔ, Rebeka ya ngɔ Esau tade kpakpa pe kulaa a nɛ ngɛ lɛ Rebeka a dɛ ngɛ we ɔ mi ɔ, nɛ e ngɔ kɛ wo Yakob.

¹⁶ Jehanɛ, e ngɔ apletsi ɔmɛ a he womi ɔmɛ kɛ ha Yakob ninehi a he, kɛ e kuɛ he nɛmɛ nɛ ngɛ tlotlo ɔ.

¹⁷ Enɛ ɔ se ɔ, Rebeka ngɔ niye ní nɛ ngɔɔ ɔ, kɛ abolo nɛ e sã a ha Yakob.

¹⁸ Kɛkɛ nɛ Yakob ho e tsɛ ɔ ngɔ ya, nɛ e ya de lɛ ke, “Tsaatsɛ!” Isak he nɔ ke, “I ngɛ hiɛ ɔ, ye bi! Mo mɛnɔ?”

¹⁹ Yakob he nɔ ke, “Imi Esau, o bitɛte ɔ; nɔ́ nɛ o de mi ke ma pee ɔ, i pee. I kpa mo pɛɛ, tee si nɛ o hi si, nɛ o ye de lo nɛ i kɛ ba a eko, konɛ o gbaa mi.”

²⁰ Isak bi Yakob ke, “Kɛ e ba lɛ kɛɛ loko o he sɔ kɛ ná lo ɔ kikɛ nɛ ɔ?” Yakob he nɔ ke, “Yawɛ, o Mawu ɔ nɛ je lɛ ha mi.”

²¹ Isak de Yakob ke, “Ye bi, hɛɛ mo kɛ ba nɛ ma pɛtɛ o he ma hyɛ kaa ye bi Esau ji mo niinɛ lo.”

²² Benɛ Yakob hɛ lɛ kɛ su e tsɛ Isak he ɔ, e tsɛ ɔ pɛtɛ e he nɛ e de ke, “Gbi ɔ, Yakob gbi, se nine ɔmɛ lɛɛ Esau níhi.”

²³ Isak li Yakob mi tso, ejakaa bwɔmi ngɛ e nine ɔmɛ a he kaa Esau ní ɔmɛ. Loko e gbaa lɛ ɔ,

²⁴ e bi lɛ ekohu ke, “Anɛ ye bi Esau ji mo niinɛ lo?” Yakob he nɔ ke, “Ee.”

²⁵ Isak de lɛ ke, “Ngɔɔ lo ɔ nɛ o ya gbe ɔ eko kɛ ba nɛ ma ye, konɛ ma gbaa mo.” Yakob ngɔ niye ní ɔ ba ha lɛ, nɛ e ye; jehanɛ se hu, e ha lɛ wai nɛ e nu.

²⁶ Lɔ ɔ se ɔ, e tsɛ Isak de lɛ ke, “Ye bi, hɛɛ mo kɛ ba nɛ o ba fiɔ ye nya he.”

²⁷ Benɛ Yakob hɛ lɛ kɛ ba konɛ e ba fiɔ Isak nya he ɔ, Isak nu e tade ɔ mi via; lɔ ɔ he ɔ, e gbaa lɛ. E de lɛ ke, “Ye bi ɔ he via kaa ngmɔ ko nɛ Yawɛ gbaa nɔ, nɛ baa ní ɔ nɔ via.

²⁸ Mawu nɛ ha mo bɔ́ kɛ je hiɔwe, nɛ o zugba a nɛ ba ní, nɛ o na blɛfo kɛ wai babauu.

²⁹ Je ma amɛ ma sɔmɔ mo, nɛ nimli adesahi ma kpla si ha mo. O maa ye o nyɛmimɛ ɔmɛ a nɔ, nɛ o nyɛbimɛ ɔmɛ ma kpla si ha mo. Nihi nɛ gbiɛɛ mo ɔ, a maa gbiɛ mɛ; ni nɛmɛ nɛ gbaa mo ɔ, a maa gbaa mɛ.”

Esau kpa Isak pɛɛ ke e gbaa lɛ

³⁰ Benɛ Isak gbaa Yakob ta, nɛ Yakob je e tsɛ ɔ ngɔ pɛ kɛkɛ nɛ e nyɛmi Esau hu je de dami kɛ ba.

³¹ Lɛ hu e ba pee niye ní nɛ ngɔɔ, nɛ e kɛ ba ha e tsɛ ɔ. E de lɛ ke, “Tsaatsɛ, i kpa mo pɛɛ, tee si nɛ o hi si, nɛ o ye de lo nɛ i kɛ ba a eko, konɛ o gbaa mi.”

³² Isak bi lɛ ke, “Mo mɛnɔ?” Esau he nɔ ke, “Imi o bi ɔ; o bitɛte Esau!”

³³ Isak he do blibliibli wawɛɛ nitsɛ, nɛ e bi ke, “Lɛɛ mɛnɔ ji nɔ nɛ ya gbe de lo ɔ nɛ e ngɔ ba ha mi ɔ?” E ya nɔ nɛ e de ke, “Loko o ba a, i ye ní ɔ tsuo nɛ i gbaa lɛ momo. Lɔ ɔ he ɔ, amlɔ nɛ ɔ, gbaami ɔ pee e nɔ́!”

³⁴ Benɛ Esau nu munyu nɛ ɔ, e kɛ aywilɛho kpa ngmlaa wawɛɛ nitsɛ, nɛ e de e tsɛ ɔ ke, “Oo Tsaatsɛ, moo gbaa imi hulɔ!”

³⁵ Se Isak he nɔ ke, “O nyɛmi ɔ ba sisi mi, nɛ e ba he o gbaami ɔ kɛ je.”

³⁶ Esau de ke, “E biɛ Yakob ɔ di e he, ejakaa enɛ ɔ ji si enyɔ sɔuu nɛ e sisi mi. E he ye bitɛte blɔ nya a momo, nɛ amlɔ nɛ ɔ hu e ba he ye gbaami ɔ! Anɛ o si we gbaami ɔ eko ha we mi lo?”

³⁷ Isak he nɔ ke, “I pee lɛ o nyɔmtsɛ momo, nɛ i pee nyɛ e nyɛmimɛ ɔmɛ tsuo e nyɔguɛhi. I ha lɛ ngma kɛ wai. Lɔ ɔ he ɔ, ye bi, nɔ́ ko pa be nɛ ma pee ha mo!”

³⁸ Esau bi e tsɛ ɔ ke, “Tsaatsɛ, gbaami kake nɛ ɔ pɛ o ngɛ lo? Tsaatsɛ, moo gbaa imi hulɔ!” Kɛkɛ nɛ Esau wo ya.

³⁹ Jehanɛ Isak de lɛ ke, “O maa hi zugba nɛ bɛ ní nɔ, Hiɔwe bɔ́ hu be nɛe ha mo.

⁴⁰ O klaate nɛ o kɛ ma he o yi wami. O ma sɔmɔ o nyɛminyumu ɔ. Se ke o na blɔ ɔ, O ma tsɔ e hɛ mi atuã, Nɛ o maa ye o he.”

⁴¹ Esau nyɛ Yakob ngɛ gbaami ɔ nɛ e tsɛ gbaa Yakob ɔ he. E de ngɛ e yi mi ke, “Tsaatsɛ gbenɔ be su ta. Ke tsaatsɛ gbo nɛ a pee ya se ɔ, ma gbe ye nyɛmi Yakob.”

⁴² Benɛ Rebeka nu kaa Esau to e yi mi kaa kikɛ nɛ ɔ, e tsɔ ya tsɛ Yakob kɛ ba, nɛ e de lɛ ke, “O nyɛmi Esau to kaa e maa gbe mo nɛ e kɛ ye e he lue.

⁴³ Lɔ ɔ he ɔ, ye bi, bu tue! Tuu fo esɔ kɛ ya ye nyɛminyumu Laban ngɔ ngɛ Haran.

⁴⁴ Yaa hi e ngɔ bɔɔ kɛ yaa si o nyɛmi ɔ mi mi fumi ɔ nya maa ba si,

⁴⁵ nɛ e hɛ maa je nɔ́ nɛ o pee lɛ ɔ nɔ. Lɔ ɔ se ɔ, ma tsɔ nɛ a ba ngɔ mo kɛ ba. Mɛni he je ye bimɛ enyɔ ɔmɛ tsuo a yi maa ta ligbi kake too?”

Isak wo Yakob blɔ kɛ ya ha Laban

⁴⁶ Rebeka de Isak ke, “Jehanɛ lɛɛ ma se yiwi nɛ ɔmɛ nɛ Esau ya ngɔ ɔ, a sane ba gbe ye nya. Ke e maa ba mi kaa Yakob hu ma ya ngɔ Hit yihewi nɛ ɔmɛ a ti nɔ ko ɔ, lɛɛ afani nɛ ma gbo mohu.”