Mose I, 25 - BAIBLO ALOO NGMAMI KLƆUKLƆU Ɔ

Abraham nina kpa komɛ

¹ Abraham ngɔ yo ekohu. A tsɛɛ lɛ Ketura.

² Abraham kɛ lɛ fɔ Zimran, Yokshan, Medan, Midian, Ishbak, kɛ Shua.

³ Yokshan fɔ Sheba kɛ Dedan. Dedan nina ji Ashur bi, Letush bi, kɛ Leum bi.

⁴ Midian bimɛ ji Efa, Efer, Hanok, Abida, kɛ Eldaa. Ketura nina ji ni nɛ ɔmɛ tsuo.

⁵ Abraham ngɔ e weto ní tsuo kɛ ha Isak,

⁶ se benɛ e na we nɛ e gbo lolo ɔ, binyumuhi nɛ e kɛ e yi kpa amɛ fɔ ɔ hu, e ha mɛ nike níhi. Lɔ ɔ se ɔ, e wo bimɛ nɛ ɔmɛ blɔ kɛ ho beleku je zugba a nɔ ya, kɛ je e bi Isak he.

Abraham ba gbo nɛ a pu lɛ

^7-8 Abraham bwɔ kotokoto, nɛ e ye jeha lafa kɛ nyingmi kpaago kɛ enuɔ loko e gbo.

⁹ E bimɛ Isak kɛ Ishmael pu lɛ ngɛ Makpela tɛ puɔ ɔ mi ngɛ zugba a nɛ ngɛ Mamre beleku je ɔ nɔ. Zugba nɛ ɔ, jinɛ Zohar binyumu Efron, Hit no ɔ nɔ́,

¹⁰ se Abraham he zugba a ngɛ Hit bi ɔmɛ a dɛ. Lejɛ ɔ ji he nɛ a pu Abraham kɛ e yo Sara tsuo ngɛ.

¹¹ Benɛ Abraham gbo se ɔ, Mawu gbaa e bi Isak. Jamɛ a be ɔ mi ɔ, Isak hia kɛ ho ma ko mi ya nɛ e ya hi lejɛ ɔ. A tsɛɛ ma nɛ ɔ ke “Hɛ kalɔ ɔ nɛ naa mi ɔ vu.”

Ishmael nina

¹² Abraham bi Ismael nɛ e kɛ Sara mawayo Hagar nɛ je Egipt fɔ ɔ,

¹³ e binyumuhi ngɛ a fɔmi nya ji nɛ ɔmɛ nɛ: Nebayot, Kedar, Adbeel, Mibsam,

¹⁴ Mishma, Duma, Masa,

¹⁵ Hadad, Tema, Yetur, Nafish, kɛ Kedema.

¹⁶ Ishmael bimɛ nyɔngma kɛ enyɔ nɛ ɔmɛ ba pee wɛtso nyɔngma kɛ enyɔ komɛ a nyatsɛmɛ, nɛ a kɛ a biɛ wo wɛtso ɔmɛ, kɛ kɔpe ɔmɛ.

¹⁷ Ishmael ye jeha lafa kɛ nyingmi etɛ kɛ kpaago nɛ e gbo.

¹⁸ Ishmael bi ɔmɛ hi Havila kɛ Shur a kpɛti ngɛ Egipt beleku je, kɛ yaa Asiria blɔ. A kɛ Abraham nina kpa amɛ hi akã nɔ.

A fɔ Esau kɛ Yakob

¹⁹ Abraham binyumu Isak he sane ji nɛ ɔ nɛ.

²⁰ Isak ye jeha nyingmi eywiɛ nɛ e ngɔ Rebeka, Aram no ɔ nɛ je Mesopotamia nɛ a tsɛɛ lɛ Betuel ɔ biyo ɔ. Rebeka nyɛminyumu ji Laban.

²¹ Jinɛ Isak yo Rebeka a, yosa ji lɛ, se Isak kpa Yawɛ pɛɛ ha lɛ. Yawɛ bu e kue fami ɔ tue, nɛ Rebeka ba na mi.

²² Rebeka ngɔ hawi hɔ, nɛ benɛ e na we nɛ e fɔ mɛ lolo ɔ, jokuɛwi ɔmɛ kɛ a he ngɛ kunɔ nɔe ngɛ a nyɛ ɔ muklii ɔ mi. Rebeka bi e he ke, “Mɛni lɛ ngɛ mi pee nɛ ɔ?” Kɛkɛ nɛ e ho ya bi Yawɛ ga womi.

²³ Yawɛ de lɛ ke, “Bimɛ nɛ ngɛ o mi mi ɔ ma ba pee je ma enyɔ hwɔɔ se, nɛ́ a kɛ a he be yee. Kake he ma ba wa pe kake; nɛ nɔkɔtɔma a ma sɔmɔ jokuɛ ɔ.”

²⁴ Benɛ Rebeka fɔmi be su ɔ, e fɔ hawi, nyumuhi enyɔ.

²⁵ Nɔ nɛ ba kekle ɔ tsuɔ papaapa, nɛ e he womi ngɛ kaa bo nɛ a kɛ bwɔmi lo. Enɛ ɔ he je ɔ, a wo lɛ biɛ ke Esau.

²⁶ Benɛ enyɔne ɔ ma a, e kɛ e nine fua e nyɛmi Esau nane se ja kpɛii; lɔ ɔ he ɔ, a wo lɛ biɛ ke Yakob. Isak ye jeha nyingmi ekpa benɛ a fɔ hawi ɔmɛ ɔ.

Esau jua e bitɛte blɔ nya

²⁷ Nyumuwi ɔmɛ ba wa. Esau ba pee de dalɔ kpanaa, nɛ daa nɛ ɔ, e nyɛɛ nga mi kɛ bee. Yakob lɛɛ nɔmlɔ kpoo ji lɛ, nɛ daa nɛ ɔ, e ngɛ we mi.

²⁸ Isak suɔ Esau sane, ejakaa Esau ya gbeɔ de lo ba haa lɛ nɛ e yeɔ; se Rebeka lɛɛ e suɔ Yakob.

²⁹ Ligbi ko ɔ, Yakob ngɛ yɔ flɔɔ ko pee; kɛkɛ nɛ Esau je de nga mi kɛ ba nɛ hwɔ gbe lɛ.

³⁰ E de Yakob ke, “Hwɔ ngɛ mi yee! Ha mi kikɛmɛ a nɔ́ tsutsu nɛ ɔ eko ma ye.” Enɛ ɔ he je nɛ a wo lɛ biɛ ke Edom ɔ nɛ.

³¹ Yakob he nɔ ke, “Yoo, ma ha mo. Se loko ma ha mo ɔ, ja o ngɔ o blɔ nya kaa bitɛte ɔ ngɔ ha mi.”

³² Esau de ke, “Saminya! Pe i miɔ nɛ ma gbo nɛ ɔ nɛ; mɛni bitɛte blɔ nya nɛ ɔ maa pee ha mi?”

³³ Yakob he nɔ ke, “Kekleekle ɔ, ka mi kita kaa o kɛ o blɔ nya a ma ha mi.” Esau ka lɛ kita, nɛ e jua e blɔ nya a kɛ ha Yakob.

³⁴ Kɛkɛ nɛ Yakob ha Esau abolo kɛ yɔ flɔɔ ɔ eko nɛ e ye, nɛ e nu nɔ́ ko ngɔ pue nɔ. Lɔ ɔ se ɔ, e te si, nɛ e je lejɛ ɔ, nɛ e bitɛte blɔ nya a nɛ e hɛ ngɔ fɔ he ɔ si we lɛ kpu.