Mose I, 23 - BAIBLO ALOO NGMAMI KLƆUKLƆU Ɔ

Sara ba gbo nɛ Abraham he zugba nɛ e kɛ pee gɔ

¹ Sara ye jeha lafa kɛ nyingmi enyɔ kɛ kpaago,

² nɛ e gbo ngɛ Kiriat Arba. Kiriat Arba biɛ kpa ji Hebron, nɛ e ngɛ Kanaan zugba a nɔ. Abraham ye Sara kɔmɔ, nɛ e nyɛ ya ha lɛ.

³ Lɔ ɔ se ɔ, e je gbogboe ɔ he, nɛ e ya de Hit bi ɔmɛ ke,

⁴ “Nubwɔ ji mi ngɛ nyɛ kpɛti; nyɛ ha mi nyɛ zugba a eko nɛ ma kɛ pee gɔ, konɛ ma pu ye yo ɔ ngɛ lejɛ ɔ.”

⁵ Hit bi ɔmɛ he nɔ ke,

⁶ “Wa nyɔmtsɛ, moo bu wɔ tue! Wa buu mo kaa hɛ mi nyɛɛlɔ ngua ko ngɛ wa kpɛti; yaa pu o yo ɔ ngɛ wa gɔ nɛ hi pe kulaa a mi. Wa ti nɔ tsuaa nɔ maa suɔ kaa e maa ngɔ lɛ nitsɛ e yɔkɔ kɛ ha mo nɛ o pu o yo ɔ ngɛ mi.”

⁷ Kɛkɛ nɛ Abraham kpla si ngɛ Hit bi ɔmɛ a hɛ mi,

⁸ nɛ e de mɛ ke, “Ke nyɛ suɔ kaa ma pu ye yo ɔ ngɛ hiɛmɛ nɛ ɔ, lɛɛ i kpa nyɛ pɛɛ nɛ nyɛɛ kɛ Zohar binyumu Efron nɛ tu ha mi,

⁹ konɛ e ngɔ Makpela tɛ puɔ ɔ nɛ ngɛ e zugba a nya a kɛ ha mi. Nyɛ de lɛ nɛ e jua zugba a kɛ ha mi sisiisi ngɛ nyɛ hɛ mi ngɛ hiɛmɛ nɛ ɔ, konɛ ma he nɛ ma kɛ pee gɔ.”

¹⁰ Jamɛ a be ɔ mi ɔ, Efron nitsɛ hii si ngɛ Hit bi ɔmɛ a kpɛti ngɛ kpe he ɔ, ngɛ ma a agbo ɔ nya. E ha Abraham heto, nɛ nɔ tsuaa nɔ nɛ ngɛ lejɛ ɔ nu ke,

¹¹ “Bu tue, ye nyɔmtsɛ! I ngɔ zugba a tsuo, kɛ tɛ puɔ ɔ nɛ ngɛ zugba a mi ɔ kɛ ke mo. I ngɔ kɛ ha mo ngɛ ye ma mi bi ɔmɛ a hɛ mi ngɛ hiɛmɛ nɛ ɔ, konɛ o pu o yo ɔ ngɛ lejɛ ɔ.”

¹² Se Abraham kpla si ngɛ Hit bi ɔmɛ a hɛ mi,

¹³ nɛ e kɛ Efron tu munyu, nɛ nɔ tsuaa nɔ nɛ ngɛ lejɛ ɔ nu ke, “I kpa mo pɛɛ nɛ o bu mi tue. Nɔ́ nɛ o de ɔ, i ngɔɛ. Ha nɛ ma wo mo zugba a he hiɔ, konɛ ma pu ye yo ɔ ngɛ lejɛ ɔ. O nɛ, sika a ji nɛ ɔ nɛ.”

¹⁴ Efron he nɔ ke,

¹⁵ “I kpa mo pɛɛ nɛ o bu mi tue! Zugba a he jua ji sika hiɔ yi lafa eywiɛ. Se imi kɛ mo wa kpɛti ɔ, lɔ ɔ tsapi nɔ́ ko kulaa. Yaa nɛ o ya pu o yo ɔ ngɛ lejɛ ɔ.”

¹⁶ Abraham kplɛɛ nɔ, nɛ e ngmɛ sika hiɔ ɔ kaa bɔ nɛ Efron de nɛ Hit bi ɔmɛ nu ɔ: sika hiɔ yi lafa eywiɛ, kaa bɔ nɛ jua yeli ɔmɛ po ngɔ fɔ si ɔ.

¹⁷ Bɔ nɛ ba loko Efron weto ní ɔ nɛ ngɛ Makpela ngɛ Mamre beleku je ɔ, ba plɛ pee Abraham nɔ́ ji nɛ ɔ nɛ. Weto ní nɛ ɔ ji zugba a, kɛ tɛ puɔ ɔ nɛ ngɛ zugba a mi ɔ, kɛ tso ɔmɛ tsuo nɛ ngɛ zugba a mi, hluu kɛ ya ta zugba a nyagbe ɔ.

¹⁸ Hit bi ɔmɛ tsuo nɛ kpe ngɛ ma a agbo ɔ nya a ye odase kaa, niinɛ, zugba a ba plɛ pee Abraham nɔ́.

¹⁹ Enɛ ɔ se ɔ, Abraham ya pu e yo Sara ngɛ jamɛ a tɛ puɔ ɔ mi ngɛ Kanaan zugba a nɔ.

²⁰ Hit bi ɔmɛ ngɔ zugba a kɛ e mi tɛ puɔ ɔ kɛ ha Abraham kaa e weto ní, nɛ e kɛ pee gɔ.