Mose I, 21 - BAIBLO ALOO NGMAMI KLƆUKLƆU Ɔ

A fɔ Isak

¹ Yawɛ gbaa Sara kaa bɔ nɛ e wo si ɔ.

² Sara ba na mi, nɛ e fɔ binyumuyo ha Abraham benɛ Abraham bwɔ ɔ, ngɛ be nɛ Mawu de to ɔ mi.

³ Abraham wo lɛ biɛ ke Isak,

⁴ nɛ benɛ Isak ye ligbi kpaanyɔ ɔ, Abraham po lɛ, kaa bɔ nɛ Mawu fa lɛ ɔ.

⁵ Abraham ye jeha lafa benɛ a fɔ e bi Isak ɔ.

⁶ Sara de ke, “Mawu ha nɛ muɔ ba ye nya he jehanɛ. Nɔ tsuaa nɔ nɛ maa nu he ɔ, e kɛ mi maa muɔ.

⁷ Mɛnɔ ma de Abraham, be ko nɛ be ɔ, ke Sara ma ba ha bi nyɔ? Se i fɔ binyumu ha lɛ ngɛ e bwɔmi be mi.”

⁸ Jokuɛ ɔ ba wa, nɛ a tsɔ lɛ nyɔ. Ligbi ɔ nɛ a tsɔ Isak nyɔ ɔ, Abraham ngmɛ okplɔɔ ngua ko.

Abraham wo Hagar kɛ Ishmael blɔ

⁹ Ligbi ko ɔ, Sara na kaa Hagar, Egipt no ɔ binyumu Ishmael nɛ e kɛ Abraham fɔ ɔ, kɛ lɛ nitsɛ e binyumu Isak ngɛ fiɛe.

¹⁰ Sara de Abraham ke, “Fie nyɔguɛ yo nɛ ɔ kɛ e binyumu ɔ kɛ je hiɛ ɔ. Yo nɛ ɔ binyumu ɔ kɛ ye bi Isak be ní dlae.”

¹¹ Nɔ́ nɛ ɔ hao Abraham wawɛɛ nitsɛ, ejakaa Ishmael ɔ hu e bi ji lɛ.

¹² Se Mawu de Abraham ke, “Koo hao o he ngɛ jokuɛ nyumuyo ɔ kɛ o nyɔguɛ yo Hagar a he. Pee kaa bɔ nɛ Sara de mo ɔ, ejakaa Isak nɔ lɛ nina nɛ i wo mo si ke ma ha mo ɔ maa gu kɛ ba.

¹³ Nyɔguɛ yo ɔ binyumu ɔ, lɛ hu ma ha lɛ bimɛ babauu nɛ a ma ba pee ma; ejakaa lɛ hu o bi ji lɛ.”

¹⁴ E nɔ jena mɔtu kpla a, Abraham ha Hagar niye ní, kɛ lohwe he womi tɔ nɛ nyu hyi lɛ. E ngɔ jokuɛ nyumuyo ɔ kɛ wo Hagar se mi, nɛ e wo lɛ blɔ. Hagar je lejɛ ɔ, nɛ e ya wo lalaalo ngɛ Beersheba nga a nɔ.

¹⁵ Benɛ nyu ɔ ta tɔ ɔ mi ɔ, Hagar ngɔ jokuɛ ɔ ya fɔ tso ko sisi,

¹⁶ nɛ e ho ya hi si ngɛ he ko banee, maa pee gugue nyingmi enuɔ loo nɔ kɛmi kɛ je he nɛ jokuɛ ɔ ngɛ ɔ. E de ngɛ e yi mi ke, “I be nyɛe nɛ ma hi jokuɛ ɔ hɛ mi hyɛe kɛ yaa si e ma gbo.” Benɛ e hii si ngɛ lejɛ ɔ, e bɔni ya fomi.

¹⁷ Mawu nu nɛ jokuɛ nyumuyo ɔ ngɛ ya foe, nɛ Mawu bɔfo ɔ kɛ Hagar tu munyu kɛ je hiɔwe, nɛ e de ke, “Hagar, mɛni sane? Koo ye gbeye. Mawu nu nɛ jokuɛyo ɔ ngɛ ya foe ngɛ he nɛ e hwɔɔ si ngɛ ɔ.

¹⁸ Tee si nɛ o ya wo lɛ kɛ fɔ o gugue mi, ejakaa ma ha nɛ e nina ma ba pee ma agbo.”

¹⁹ Kɛkɛ nɛ Mawu bli Hagar hɛngmɛ nɛ e na vu ko. E ho nɛ e ya yɛ nyu kɛ wo lohwe he womi tɔ ɔ mi nɛ e hyi, nɛ e ha e bi ɔ nyu ɔ eko nɛ e nu.

^20-21 Mawu gbaa jokuɛ ɔ nɛ e ba wa. E hi Paran nga a nɔ, nɛ e ba pee detsɛ kpanaa. E nyɛ hla yo ha lɛ kɛ je Egipt, nɛ e ngɔ.

Abraham kɛ Abimelek ka a he kita

²² Jamɛ a be ɔ mi ɔ, Abimelek kɛ e tatsɛ Fikol ba Abraham ngɔ. Abimelek de Abraham ke, “Nɔ́ tsuaa nɔ́ nɛ o ngɛ pee ɔ, Mawu piɛɔ o he.

²³ Lɔ ɔ he ɔ, ka mi kita ngɛ Mawu hɛ mi ngɛ hiɛmɛ nɛ ɔ, kaa o be imi, aloo ye bimɛ, aloo ye nina sisie kɔkɔɔkɔ. Kaa bɔ nɛ i kɛ mo hi si saminya a, mo hu o kɛ imi, kɛ zugba a nɛ o ba to nubwɔ ngɛ nɔ ɔ nɛ hi si ja nɔuu.”

²⁴ Abraham he nɔ ke, “I ka kita kaa ma pee ja.”

²⁵ Abraham kɛ Abimelek tu munyu ngɛ vu ko nɛ lɛ Abimelek ɔ tsɔli ɔmɛ ba kpɔ pani nya a he.

²⁶ Abimelek de lɛ ke, “I li nɔ nɛ pee nɔ́ nɛ ɔ. O wui nɔ ta hyɛ nɛ ma nu; kekleekle nɛ i ngɛ nue ji nɛ ɔ nɛ.”

²⁷ Enɛ ɔ se ɔ, Abraham ke Abimelek to kɛ na, nɛ mɛ ni enyɔ ɔmɛ ka a he kita.

²⁸ Abraham je jijɔ kpaago ngɛ e to ɔmɛ a kpɛti, nɛ e ngɔ mɛ ngɔ to he kake.

²⁹ Abimelek bi lɛ ke, “Mɛni he je o je jijɔ kpaago nɛ ɔmɛ ngɔ to he kake ɔ?”

³⁰ Abraham he nɔ ke, “Mo he jijɔ kpaago nɛ ɔmɛ ngɛ ye dɛ, nɛ e pee odase kaa imi nɛ i je vu nɛ ɔ.”

³¹ Enɛ ɔ he nɛ a wo lejɛ ɔ biɛ ke Beersheba a nɛ, ejakaa lejɛ ɔ ji he nɛ mɛ ni enyɔ ɔmɛ ka a he kita ngɛ.

³² Benɛ Abraham kɛ Abimelek ka a he kita ngɛ Beersheba gbe nya a, Abimelek kɛ e tatsɛ Fikol kpale a se kɛ ho Filistia ya.

³³ Enɛ ɔ se ɔ, Abraham du tso ngua ko ngɛ Beersheba, nɛ e ja Yawɛ Mawu nɛ ngɛ daa a ngɛ lejɛ ɔ.

³⁴ Abraham hi Filistia be babauu.