Mose I, 2 - BAIBLO ALOO NGMAMI KLƆUKLƆU Ɔ

¹ Bɔ nɛ Mawu pee nɛ e kɛ bɔ hiɔwe kɛ zugba, kɛ nɔ́ tsuaa nɔ́ nɛ ngɛ je ɔ mi ji nɛ ɔ nɛ.

² Mawu tsu ní ligbi ekpa, nɛ ligbi nɛ ji kpaago ɔ, e jɔɔ e he.

³ E gbaa ligbi nɛ ji kpaago ɔ, nɛ e pee lɛ ligbi klɔuklɔu; jamɛ a ligbi ɔ nɛ e bɔ je ɔ gbe nya, nɛ e jɔɔ e he, ejakaa ní tsumi nɛ e tsu kɛ bɔ je ɔ, e gbe nya.

⁴ Sane nɛ ɔ gbaa wɔ bɔ nɛ Yawɛ Mawu bɔ je ɔ. Benɛ Yawɛ Mawu bɔ je ɔ,

Ngmɔ ɔ nɛ ngɛ Eden ɔ

⁵ tso ko tso ko be zugba a nɔ, nɛ nga ko hu puɛ́ ngɛ nɔ; ejakaa e ha we nɛ hiɔmi nɛ nɛ ngɔ pue zugba a nɔ lolo; nɛ nɔ ko hu be nɛ ngɛ zugba a nɔ hue.

⁶ Se ke pee ɔ, nyu jeɔ zugba a mi kɛ ba pɔɔ zugba a hɛ mi tsuo.

⁷ Jamɛ a be ɔ mi ɔ, Yawɛ Mawu ngɔ zugba zu kɛ puɛ nɔmlɔ, nɛ e mu mumi nɛ haa nɔ wami ngɔ wo nɔmlɔ gugwɔ puɔ mi; nɛ nɔmlɔ pee adesa hɛngmengmletsɛ.

⁸ Yawɛ Mawu pee ngmɔ ko ngɛ Eden, ngɛ beleku je, nɛ lejɛ ɔ e ngɔ nɔmlɔ nɛ e puɛ ɔ ngɔ to.

⁹ E ha tso slɔɔtoslɔɔtohi puɛ ngɛ ngmɔ ɔ mi: tsohi nɛ ngɛ fɛu, kɛ ní nɛmɛ nɛ woɔ yiblii nɛ a yeɔ. Tso nɛ haa nɔ wami, kɛ tso nɛ haa nɔ leɔ kpakpa kɛ yayami maa si ngɛ ngmɔ ɔ kpɛti tutuutu.

¹⁰ Pa ko je Eden kɛ ba gu ngmɔ ɔ mi, nɛ e haa ngmɔ ɔ nyu. Kɛ je lejɛ ɔ, pa a gba kɔni eywiɛ.

¹¹ A tsɛɛ kekleekle kɔni ɔ ke Pishon. Lɛ ji pa nɛ bɔle Havila zugba a tsuo, he nɛ a naa sika tsu ngɛ ɔ.

¹² A naa sika tsu ngmingmiingmi, nu kɛ e he via, kɛ tɛhi nɛ a he jua wa ngɛ lejɛ ɔ.

¹³ Pa kɔni enyɔne ɔ biɛ ji Gihon; lɛ ji pa nɛ bɔle Kush zugba a tsuo.

¹⁴ Pa kɔni etɛne ɔ biɛ ji Tigris; e bee ngɛ Asiria beleku je. Kɔni eywiɛne ɔ ji Yufrate.

¹⁵ Jehanɛ Yawɛ Mawu ngɔ nɔmlɔ ɔ kɛ ya to Eden ngmɔ ɔ mi, konɛ e hu mi nɛ e hyɛ nɔ.

¹⁶ E wo lɛ mlaa ke, “Tso ɔmɛ nɛ ngɛ ngmɔ ɔ mi ɔ, o ma nyɛ maa ye eko tsuaa eko yiblii faa,

¹⁷ ja tso ɔ nɛ haa nɔ leɔ kpakpa kɛ yayami ɔ pɛ. Koo ye jamɛ a tso ɔ yiblii; ligbi nɛ o maa ye eko ɔ, o ma gbo.”

¹⁸ Enɛ ɔ se ɔ, Yawɛ Mawu de ke, “E hí kaa nyumu ɔ nɔ kake too nɛ hi si; ma ha lɛ he piɛlɔ nɛ sa lɛ.”

^19-20 Yawɛ Mawu de nɔ́ nɛ ɔ, ejakaa benɛ e ngɔ zugba zu kɛ puɛ je nɛ ɔ mi lohwe ɔmɛ tsuo gbe nya a, ekoeko be nɛ sa nɔmlɔ kaa e he piɛlɔ. Nɔmlɔ ɔ wo lohwe ɔmɛ tsuo biɛ: we mi lohwehi, pu mi lohwehi, kɛ lohwe pɛlitsɛmɛ. Bɔ tsuaa bɔ nɛ e tsɛ eko ɔ, jã pee e biɛ. Se lɛ nɔmlɔ ɔ nitsɛ lɛɛ a na we he piɛlɔ nɛ sa we lɛ lolo.

²¹ Lɔ ɔ he ɔ, Yawɛ Mawu ha mahe vii ko ba nɔ nyumu ɔ nɔ, nɛ benɛ e ngɛ mahe ɔ mi kɛ mwɔɔ ɔ, Mawu je nyumu ɔ kasa wu kake nɛ e kɛ he lo tsi lejɛ ɔ.

²² Yawɛ Mawu ngɔ kasa wu ɔ nɛ e je ngɛ nyumu ɔ he ɔ kɛ pee yo, nɛ e ngɔ lɛ ba ha nyumu ɔ.

²³ Nyumu ɔ de ke, “Ɛhɛɛ! Jehanɛ lɛɛ i na ye henɔ tutuutu: imi nitsɛ ye muɔ ji nɛ ɔ nɛ. A je lɛ kɛ je nyumu mi; a ma tsɛ lɛ yo.”

²⁴ Enɛ ɔ he je nɛ nyumu siɔ e tsɛ kɛ e nyɛ, nɛ e ngɔɔ e he ya mɛtɛɛ e yo he nɛ a peeɔ nɔ kake ɔ nɛ.

²⁵ Nyumu ɔ kɛ e yo ɔ tsuo hɛɛ a he gu, se zo pee we mɛ.