Mose I, 19 - BAIBLO ALOO NGMAMI KLƆUKLƆU Ɔ

Sodom he yayami ɔ

¹ Benɛ Yawɛ bɔfo enyɔ ɔmɛ ba su Sodom jamɛ a gbɔkuɛ ɔ, Lot hii si ngɛ ma a agbo ɔ nya. Benɛ e na mɛ pɛ, e te si nɛ e ya kpee mɛ. E kpla si nɛ e kɛ e hɛ mi bu si,

² nɛ e de ke, “Ye nyɔmtsɛmɛ, i kpa nyɛ pɛɛ, nyɛ gba ye we ɔ mi nɛ nyɛ ba to mi. Nyɛ ba fɔ nyɛ nanehi a he nɛ nyɛɛ hwɔ hiɛ ɔ, konɛ nyɛɛ te si makɛ nɛ nyɛ tsa nyɛ nyɛɛmi ɔ nɔ.” Se a he nɔ ke, “Dɛbi, wa maa hwɔ ma nɔ hiɛmɛ nɛ ɔ kɛkɛ.”

³ Lot kɛ mɛ tu munyu hluu kɛ ya si a kplɛɛ, nɛ a kɛ lɛ ho e we ɔ mi ya. Lot ha a sã abolo kplolo nɛ a kɛ pee niye ní ha nibwɔ ɔmɛ, nɛ a ye.

⁴ Benɛ nibwɔ ɔmɛ na we nɛ a hwɔ si lolo ɔ, Sodom nyumu ɔmɛ tsuo, nihewi, kɛ nikɔtɔmahi ba bɔle we ɔ kɛ kpe.

⁵ A tsɛ Lot nɛ a bi lɛ ke, “Nyumu ɔmɛ nɛ ba to mo gbɔkuɛ nɛ ɔ, jije a ngɛ? Je mɛ kpo ha wɔ nɛ waa kɛ mɛ nɛ hwɔ!”

⁶ Lot je kpo kɛ ba a ngɔ, nɛ e ngmɛ sinya a mi,

⁷ nɛ e de mɛ ke, “Ye nyɛmimɛ, i kpa nyɛ pɛɛ, nyɛ ko pee nɔ́ yayami ko kaa kikɛ nɛ ɔ!

⁸ I ngɛ biyihi enyɔ nɛ li nyumu. Ma je mɛ kpo ha nyɛ nɛ nyɛɛ pee mɛ bɔ nɛ nyɛ suɔ. Nyumu nɛ ɔmɛ lɛɛ nyɛ ko pee mɛ nɔ́ ko; ye nibwɔhi ji mɛ, nɛ e sa kaa ma baa a yi.”

⁹ Se a de ke, “Moo je lejɛ! Mo nubwɔ ɔ, mo lɛ o maa tsɔɔ wɔ nɔ́ nɛ da, kɛ nɔ́ nɛ dɛ peemi lo? Ke o ha we wɔ blɔ ɔ, nɔ́ nɛ wa maa pee mo ɔ nya maa wa pe a nɔ́ ɔ po!” A tsitsɛɛ Lot kɛ ya se, nɛ a hɛ mɛ kɛ ba a hɛ mi, konɛ a ba ywia sinya a.

¹⁰ Se nyumuhi enyɔ ɔmɛ nɛ ngɛ tsu ɔ mi ɔ gbla Lot kɛ wo tsu ɔ mi, nɛ a ngmɛ sinya a mi.

¹¹ Lɔ ɔ se ɔ, a ha nɛ ni ɔmɛ nɛ daa si ngɛ sinya a nya a tsuo a hɛ yu, nɛ a nɛ tsu ɔ nya blɔ hu.

Lot je Sodom

¹² Enɛ ɔ se ɔ, nyumu enyɔ ɔmɛ de Lot ke, “Anɛ o ngɛ ni komɛ ngɛ ma nɛ ɔ mi kaa binyumuhi, aloo biyihi, aloo ngatsɛmɛ, aloo weku li kpa komɛ lo? Ke ja a, je mɛ kɛ je hiɛ ɔ,

¹³ ejakaa wa yaa kpata ma a hɛ mi. Yawɛ nu ma nɛ ɔ mi a he sane yayamihi babauu nitsɛ, nɛ lɔ ɔ he ɔ, e tsɔ wɔ konɛ wa ba kpata Sodom hɛ mi.”

¹⁴ Lot je kpo nɛ e ya de e ngatsɛmɛ ɔmɛ nɛ ba bi e biyi ɔmɛ a si ɔ ke, “Nyɛɛ pee esɔ nɛ nyɛɛ je hiɛ ɔ; Yawɛ yaa kpata ma a hɛ mi.” Se e pee e ngatsɛmɛ ɔmɛ kaa nɔ́ nɛ pe e kɛ mɛ ngɛ fiɛe.

¹⁵ Makɛ ɔ, bɔfo ɔmɛ kɛ he hiami de Lot ke, “Tee si esɔ, nɛ o kɛ o yo ɔ, kɛ o biyihi enyɔ ɔmɛ nyɛɛ je hiɛ ɔ; ke nyɛ pee we ja, nɛ a gbla ma a tue ɔ, nyɛ hu nyɛ hɛ mi ma kpata.”

¹⁶ Lot bɔni tsle tomi. Se akɛnɛ Yawɛ na lɛ mɔbɔ he je ɔ, nyumu ɔmɛ ya nu e kɛ e yo ɔ, kɛ e biyi ɔmɛ a nine si pani nya, nɛ a gbla mɛ kɛ je ma a mi.

¹⁷ Lɔ ɔ se ɔ, bɔfo ɔmɛ a ti nɔ kake de ke, “Nyɛɛ tu fo esɔesɔ nɛ nyɛ kɛ he nyɛ yi wami! Nyɛ ko plɛ nyɛ se, nɛ nyɛ ko da si ngɛ kɔ̃ ɔ mi he ko he ko. Nyɛɛ tu fo kɛ ho yoku ɔmɛ a nɔ ya, bɔ nɛ pee nɛ nyɛ hɛ mi ko kpata.”

¹⁸ Se Lot he nɔ ke, “Ye nyɔmtsɛ, dɛbi, i kpa mo pɛɛ, ko ha nɛ waa tu fo kɛ ya tsitsaa lejɛ ɔ.

¹⁹ O na mi mɔbɔ agbo, nɛ o he ye yi wami. Se yoku ɔmɛ a he kɛ tsɔ; sane yobu ma ya ye mi, nɛ ye yi maa ta ngɛ blɔ ɔ nɔ loko ma su lejɛ ɔ.

²⁰ O nɛ, ma bɔbɔyoo ko ji nɛ ɔ nɛ, e kɛ hiɛ ɔ kɛ we kulaa. Ha ma tu fo ya sa we ngɛ lejɛ ɔ. E ji ma bɔbɔyoo kɛkɛ, nɛ ye yi ma na wami ngɛ lejɛ ɔ.”

²¹ Bɔfo ɔ he nɔ ke, “Saminya, i kplɛɛ. I be jamɛ a ma a hɛ mi kpatae.

²² Tuu fo kɛ ya lejɛ ɔ esɔ! I be nɔ́ ko pee kaa ja o ya su lejɛ ɔ lolo.” Akɛnɛ Lot de ke ma bɔbɔyoo ji ma a he je ɔ, a wo ma a biɛ ke Zoar.

A kpata Sodom kɛ Gomora a hɛ mi

²³ Benɛ Lot su Zoar a, pu gba.

²⁴ Tlukaa a, Yawɛ ha nɛ la nɛ ngɛ tsoe gegeege je hiɔwe pue Sodom kɛ Gomora a nɔ.

²⁵ Nɛ Yawɛ kpata ma nɛ ɔmɛ, kɛ kɔ̃ ɔ, kɛ nimli tsuo nɛ ngɛ lejɛ ɔ, kɛ nɔ́ tsuaa nɔ́ nɛ puɛ ngɛ zugba a nɔ ɔ a hɛ mi.

²⁶ Se Lot yo ɔ plɛ hyɛ e se, nɛ e plɛ pee ngo kpɔ.

²⁷ E nɔ jena mɔtu kpla a, Abraham kpale kɛ ho he nɛ e da si ngɛ ngɛ Yawɛ hɛ mi ɔ ya.

²⁸ E hyɛ Sodom kɛ Gomora, kɛ kɔ̃ ɔ mi tsuo, nɛ e na la su ku nɛ ngɛ zugba a jee kaa flɔɔnɔɔ nguaa ko mi la su ku.

²⁹ Lɔ ɔ he ɔ, benɛ Mawu kpata ma amɛ nɛ ngɛ kɔ̃ ɔ mi ɔ a hɛ mi ɔ, e kai Abraham, nɛ e ha nɛ Lot tu fo kɛ je ma amɛ a mi he nɛ e ngɛ ɔ, nɛ e kɛ he e yi wami.

Moab bi kɛ Amon bi a je he

³⁰ Lot ye gbeye kaa e maa hi Zoar, lɔ ɔ he ɔ, e kɛ e biyi enyɔ ɔmɛ hia kɛ ho yoku ɔmɛ a nɔ ya nɛ a ya hi tɛ puɔ ko mi.

³¹ Kɛkɛ nɛ e bi Dede ɔ de e senɔ ɔ ke, “Wa tsɛ bwɔ, nɛ nyumuhi be zugba nɛ ɔ nɔ nɛ maa ngɔ wɔ konɛ wa fɔ bimɛ.

³² Ba nɛ wa ha wa tsɛ dã nɛ e nu konɛ waa kɛ lɛ nɛ hwɔ nɛ wa fɔ, bɔ nɛ pee nɛ weku kpa a se ko po.”

³³ Jamɛ a nyɔ ɔ mi ɔ, a ha a tsɛ ɔ wai nɛ e nu, nɛ Dede ɔ ho nɛ e kɛ lɛ ya hwɔ. Se Lot tɔ dã saminya, nɛ e li nɔ́ nɛ ya nɔ: e li be nɛ e biyo ɔ ba hwɔ e se, kɛ be nɛ e te si kɛ je.

³⁴ E nɔ jena a, Dede ɔ de e senɔ ɔ ke, “Hiɛ nyɔ mi ɔ, i kɛ tsaatsɛ ya hwɔ. Ha nɛ wa ha lɛ dã ekohu nyɔ nɛ ɔ mi, nɛ mo hu o kɛ lɛ ya hwɔ, konɛ wɔ tsuo waa kɛ wa tsɛ nɛ fɔ, bɔ nɛ pee nɛ weku kpa a se ko po.”

³⁵ Lɔ ɔ he ɔ, jamɛ a nyɔ ɔ mi ɔ, a ha a tsɛ ɔ wai ekohu, nɛ Kɔkɔ ɔ hu ho nɛ e kɛ lɛ ya hwɔ. Nɛ kaa bɔ nɛ e ba mi kekle ɔ, Lot tɔ dã saminya, nɛ e li nɔ́ nɛ ya nɔ: e li be nɛ e biyo ɔ ba hwɔ e se, kɛ be nɛ e te si kɛ je.

³⁶ Bɔ nɛ e ba loko Lot biyi enyɔ ɔmɛ kɛ mɛ nitsɛmɛ a tsɛ na mi ji nɛ ɔ nɛ.

³⁷ Dede ɔ ba fɔ binyumu, nɛ e wo lɛ biɛ ke Moab. Lɛ ji mwɔnɛmwɔnɛ ɔ Moab bi ɔmɛ a nɛ̃.

³⁸ Kɔkɔ ɔ hu ba fɔ binyumu, nɛ e wo lɛ biɛ ke Benami. Lɛ ji mwɔnɛmwɔnɛ ɔ Amon bi ɔmɛ a nɛ̃.