Mose I, 17 - BAIBLO ALOO NGMAMI KLƆUKLƆU Ɔ

Pomi ji somi ɔ he okadi

¹ Benɛ Abram ye jeha nyingmi nɛɛ kɛ nɛɛ ɔ, Yawɛ je e he kpo ngɔ tsɔɔ lɛ, nɛ e de lɛ ke, “Imi ji Mawu Ope ɔ nɛ. Moo bu mi, nɛ o pee nɔ́ nɛ da daa.

² I kɛ mo maa so, nɛ ma ha o nina maa hiɛ babauu nitsɛ.”

³ Abram kpla si nɛ e kɛ e hɛ mi bu si; nɛ Mawu de lɛ ke,

⁴ “I kɛ mo ngɛ soe, nɛ i ngɛ mo si woe kaa o maa pee tsɛ kɛ ha je mahi babauu.

⁵ A be mo tsɛe ke Abram hu; jehanɛ lɛɛ a ma tsɛ mo Abraham, ejakaa i pee mo je mahi babauu a tsɛ.

⁶ Ma ha nɛ o nina maa hiɛ babauu, nɛ a ma ba pee je mahi, nɛ matsɛmɛ po maa je a mi.

⁷ “Si nɛ i wo mo nɛ ɔ maa pee neneene somi; ma ye nɔ ha mo kɛ yaa si yi nɔhi nɛ maa ba ngɛ o se ɔ a nɔ. Ma pee o Mawu kɛ o nina hu a Mawu.

⁸ Zugba nɛ o ba to nubwɔ ngɛ nɔ nɛ ɔ, ma ngɔ kɛ ha mo, kɛ o nina. Kanaan zugba a tsuo maa pee o nina nɔ́ kɛ maa ya neneene, nɛ ma pee a Mawu.”

⁹ Mawu de Abraham ekohu ke, “Moo lɛɛ o kɛ o nina nɛ maa ba ngɛ o se ɔ, nyɛɛ ye somi nɛ i kɛ mo so ɔ nɔ.

¹⁰ Bɔ nɛ o kɛ o nina maa ye ye somi ɔ nɔ ji nɛ ɔ nɛ: nyumu tsuaa nyumu nɛ ngɛ nyɛ kpɛti ɔ, a po lɛ.

^11-12 Kɛ je mwɔnɛ ɔ kɛ yaa a, binyumuyo tsuaa binyumuyo nɛ ye ligbi kpaanyɔ ɔ, a po lɛ: nyɔguɛhi nɛ a fɔ mɛ ngɛ nyɛ we ɔmɛ a mi jio, ni nɛmɛ nɛ a he mɛ ngɛ nibwɔhi a dɛ jio. Enɛ ɔ maa tsɔɔ kaa somi ko ngɛ i kɛ nyɛ wa kpɛti.

¹³ Á po nɔ tsuaa nɔ kɛ tsɔɔ kaa neneene somi ko ngɛ i kɛ nyɛ wa kpɛti.

¹⁴ Nyumu tsuaa nyumu nɛ a pui lɛ ɔ, a je lɛ we nɛ a ko bu lɛ ngɔ piɛ ye ma mi bi ɔmɛ a he hu, ejakaa e yi ye somi ɔ nɔ.”

¹⁵ Mawu de Abraham ekohu ke, “O yo ɔ, ko tsɛ lɛ Sarai hu; kɛ je mwɔnɛ ɔ kɛ yaa a, e biɛ ji Sara,

¹⁶ Ma gbaa lɛ, nɛ ma ha e ma fɔ binyumu ha mo. Ma gbaa lɛ nɛ e maa pee je mahi a nyɛ, nɛ e bimɛ ɔmɛ ekomɛ ma ba pee matsɛmɛ.”

¹⁷ Abraham kpla si nɛ e kɛ e hɛ mi bu si. Se e muɔ nɛ e bi e he ke, “Anɛ nyumu nɛ ye jeha lafa a ma nyɛ fɔ lo? Anɛ Sara hu nɛ e ye jeha nyingmi nɛɛ ɔ ma nyɛ fɔ lo?”

¹⁸ Abraham de Mawu ke, “I na nɛ o ha Ishmael ba pee nɔ nɛ yeɔ ye ní!”

¹⁹ Se Mawu he nɔ ke, “Dɛbi, o yo Sara ma fɔ binyumu ha mo, nɛ o maa wo lɛ biɛ ke Isak. Ma ye ye somi ɔ nɔ kɛ ha lɛ kɛ e nina kɛ maa ya neneene.

²⁰ Nɔ́ nɛ o bi kɛ ha Ishmael ɔ hu i nu; ma gbaa lɛ, nɛ ma ha e ma fɔ bimɛ, nɛ e ma na nina babauu nitsɛ. E maa pee matsɛbinyumuhi nyɔngma kɛ enyɔ a tsɛ, nɛ ma ha e nina ma ba pee je ma agbo.

²¹ Se o binyumu Isak nɛ Sara ma fɔ ha mo hiɛmɛ nɛ ɔ jeha a, ma ma ye somi ɔ nɔ mi ha lɛ.”

²² Benɛ Mawu kɛ Abraham tu munyu ta a, Mawu je e he.

²³ Jamɛ a ligbi ɔ nɔuu ɔ, Abraham bu Mawu tue, nɛ e po e binyumu Ishmael kɛ nyumuhi tsuo nɛ ngɛ e we ɔ mi ɔ: nyɔguɛhi nɛ a fɔ ngɛ we ɔ mi, kɛ ni nɛmɛ nɛ e he tsuo.

²⁴ Abraham ye jeha nyingmi nɛɛ kɛ nɛɛ benɛ a po lɛ nitsɛ,

²⁵ nɛ e binyumu Ishmael lɛɛ e ye jeha nyɔngma kɛ etɛ nɛ a po lɛ.

²⁶ Jamɛ a ligbi ɔ, a po Abraham kɛ e binyumu Ishmael,

²⁷ kɛ nyumuhi tsuo nɛ ngɛ e we ɔ mi ɔ; nyɔguɛhi nɛ a fɔ ngɛ we ɔ mi, kɛ ni nɛmɛ nɛ a he ngɛ nibwɔhi a dɛ tsuo a po mɛ tsuo kulaa jamɛ a ligbi ɔ.