Mose I, 13 - BAIBLO ALOO NGMAMI KLƆUKLƆU Ɔ

Abram kɛ Lot

¹ Abram kɛ e yo kɛ Lot hia kɛ gu Egipt omleyi je kɛ a nɔ́ tsuaa nɔ́, nɛ a ba pa si ngɛ Kanaan leneyi je.

² Abram na ní kpɔtɔɔ; e ngɛ jijɔ, apletsi, na, sika hiɔ, kɛ sika tsu.

³ Pee se ɔ, e pue nɔ kɛ ho Betel ya. Ke e nyɛɛ bɔɔ, e to si bɔɔ. Kikɛ nɛ ɔ e pee hluu kɛ ya su Betel kɛ Ai a kpɛti he nɛ e to si ngɛ kekle ɔ

⁴ nɛ e ma bɔ sami la tɛ ɔ ngɛ ɔ. Lejɛ ɔ lɛ e ja Yawɛ ngɛ.

⁵ Lot, nɛ e kɛ Abram ho ɔ, lɛ hu e ngɛ jijɔ, apletsi, na, kɛ we bi babauu.

⁶ Se zugba a klee we bɔ nɛ maa kpe Abram kɛ Lot tsuo. A lohwe ɔmɛ hiɛ tsɔ pe lohwe lɛmi he ɔmɛ.

⁷ Enɛ ɔ he je ɔ, pɛ ba sɛ Abram lohwe nɔ hyɛli ɔmɛ kɛ Lot lohwe nɔ hyɛli ɔmɛ a kpɛti. Jamɛ a be ɔ mi ɔ, Kanaan bi ɔmɛ, kɛ Periz bi ɔmɛ ngɛ zugba a nɔ kɛ mwɔɔ.

⁸ Abram de Lot ke, “Nyɛmimɛ ji wɔ; wa ko pɛ, nɛ wa ko ha nɛ pɛ ba sɛ wa lohwe nɔ hyɛli ɔmɛ hu a kpɛti.

⁹ Zugba a tsuo ji tilaa ngɛ o hɛ mi nɛ ɔ nɛ. Moo po zugba a he nɛ o suɔ, konɛ o hi o dɛ he; ke o ngɔ muɔ nɔ je ɔ, ma ngɔ hiɔ nɔ je. Ke hiɔ nɔ je o suɔ jio, imi hu ma ngɔ muɔ nɔ je.”

¹⁰ Lot hyɛ zugba a tsuo kɛ kpe, nɛ e na kaa nyu ngɛ Yordan kɔ̃ ɔ mi tsuo babauu kaa bɔ nɛ Yawɛ Ngmɔ ɔ ngɛ ɔ, aloo kaa bɔ nɛ Egipt zugba a ngɛ kɛ ma Zoar blɔ ɔ. Sane nɛ ɔ ba loko Yawɛ kpata Sodom kɛ Gomora hɛ mi.

¹¹ Lot ngɔ Yordan kɔ̃ ɔ tsuo, nɛ e hia kɛ ho beleku je ya. Bɔ nɛ ba nɛ mɛ ni enyɔ ɔmɛ a mi gba ji nɛ ɔ nɛ.

¹² Abram hi Kanaan zugba a nɔ, se Lot lɛɛ e hi ma amɛ nɛ ngɛ kɔ̃ ɔ mi ɔ a mi, nɛ e ma e bo tsu ɔ ngɛ Sodom.

¹³ Sodom ma a, yiwutsotsɛmɛ ji mɛ, nɛ a pee yayami kɛ si Yawɛ.

Abram hia kɛ ho Hebron ya

¹⁴ Benɛ Lot je Abram he ɔ, Yawɛ de Abram ke, “Kɛ je he nɛ o daa si ngɛ ɔ, moo hyɛ kɛ bɔle si, kɛ je omleyi kɛ ya leneyi, kɛ je beleku kɛ ya bonyoku.

¹⁵ Zugba a nɛ o ngɛ hyɛe ɔ, ma ngɔ lɛ tsuo kɛ ha mo, kɛ o nina, nɛ e maa pee nyɛ nɔ kɛ maa ya neneene.

¹⁶ Ma ha nɛ o nina maa hiɛ babauu kaa tabo zu, nɛ e be hie kanemi; ke nɔ ko nyɛ kane tabo zu ɔ, lɛɛ e ma nyɛ kane o nina.

¹⁷ Yaa nɛ o ya kpa zugba a tsuo nɔ, ejakaa ma ngɔ kɛ wo o dɛ mi.”

¹⁸ Lɔ ɔ he ɔ, Abram gbɛ e bo tsu ɔ, nɛ e ba hi tso ngua amɛ a kasa nya ngɛ Mamre, ngɛ Hebron. Nɛ e ma bɔ sami la tɛ ha Yawɛ, nɛ e ja lɛ ngɛ lejɛ ɔ.