Mose I, 12 - BAIBLO ALOO NGMAMI KLƆUKLƆU Ɔ

Mawu tsɛ Abram

¹ Yawɛ de Abram ke, “Jee o zugba a nɔ, kɛ o ma a mi, kɛ o weku li a ngɔ kɛ ya zugba nɛ ma tsɔɔ mo ɔ nɔ.

² Ma ha mo nina babauu, nɛ a maa pee je ma agbo. Ma gbaa mo, nɛ ma ha o ma he biɛ, nɛ a maa gu o nɔ kɛ gbaa nihi babauu.

³ Nihi nɛ gbaa mo ɔ, ma gbaa mɛ. Se ni nɛmɛ nɛ gbiɛɛ mo ɔ, imi hu ma gbiɛ mɛ. O nɔ ma gu kɛ gbaa je ma amɛ tsuo.”

⁴ Abram ye jeha nyingmi kpaago kɛ enuɔ benɛ e hia kɛ je Haran kaa bɔ nɛ Yawɛ de lɛ ke e pee ɔ, nɛ e kɛ Lot ho.

⁵ Abram ngɔ e yo Sarai, kɛ e wɔfase Lot, kɛ weto ní, kɛ nyɔguɛhi nɛ a na ngɛ Haran ɔ, nɛ a pue nɔ kɛ ho Kanaan zugba a nɔ ya. Benɛ a ya su Kanaan ɔ,

⁶ Abram nyɛɛ kɛ be ngɛ zugba a nɔ kɛ ya su tso ngua a nɛ ngɛ More ngɛ Shekem ɔ he. Jamɛ a be ɔ mi ɔ, Kanaan bi ɔmɛ ngɛ zugba a nɔ kɛ mwɔɔ.

⁷ Yawɛ je e he kpo kɛ tsɔɔ Abram nɛ e de lɛ ke, “Zugba a nɛ ma ngɔ kɛ ha o nina a ji nɛ ɔ nɛ.” Lɔ ɔ he ɔ, Abram ma bɔ sami la tɛ ngɛ lejɛ ɔ kɛ ha Yawɛ, nɔ nɛ ba je e he kpo kɛ tsɔɔ lɛ ɔ.

⁸ Lɔ ɔ se ɔ, e hia kɛ je lejɛ ɔ kɛ ho yoku zugba a nɛ ngɛ Betel beleku je ɔ nɔ ya. E ya ma e bo tsu ɔ ngɛ lejɛ ɔ, ngɛ Betel kɛ Ai a kpɛti; Betel ngɛ bonyoku je, nɛ Ai ngɛ beleku je. Lejɛ ɔ hu e ma bɔ sami la tɛ ha Yawɛ nɛ e ja lɛ.

⁹ Pee se ɔ, Abram je lejɛ ɔ, nɛ e tsa e blɔ hiami ɔ nɔ kɛ gu Kanaan leneyi blɔ. Ke e nyɛɛ bɔɔ e to si bɔɔ.

Abram ngɛ Egipt

¹⁰ Jamɛ a be ɔ, hwɔ ba Kanaan zugba a nɔ, nɛ lɔ ɔ he ɔ, Abram pue nɔ kɛ ho Egipt ya nɛ e ya hi lejɛ ɔ be saii.

¹¹ Benɛ e piɛ bɔɔ nɛ a maa su Egipt ɔ, e de e yo Sarai ke, “Sarai, i le kaa yo nɛ he ngɛ fɛu ji mo.

¹² Ke Egipt bi ɔmɛ na mo ɔ, a ma de ke, ‘E yo ji nɛ ɔ nɛ’; kɛkɛ a maa gbe mi, se moo lɛɛ a be mo nɔ́ ko pee.

¹³ Lɔ ɔ he ɔ, de mɛ ke ye nyɛmiyo ji mo. Ke o de mɛ ja a, o he ɔ, a be mi nɔ́ ko pee, nɛ a maa hyɛ ye nɔ saminya.”

¹⁴ Benɛ Abram ba su Egipt ɔ, Egipt bi ɔmɛ na kaa e yo e he ngɛ fɛu saminya.

¹⁵ Egipt matsɛ ɔ he ni komɛ na yo ɔ, nɛ a ya je e yi kɛ ha Farao ɔ; lɔ ɔ he ɔ, a ba ngɔ lɛ kɛ ho matsɛ we ɔ mi ya.

¹⁶ Sarai he ɔ, matsɛ ɔ hyɛ Abram nɔ saminya; Abram na jijɔhi, nahi, tejihi, nyɔguɛhi nyumuhi kɛ yihi, kɛ afukpɔngɔhi babauu.

¹⁷ Abram yo Sarai he je ɔ, Yawɛ ha hiɔ nɛ nya wa ko ba sɛ Farao ɔ kɛ e we mi bi ɔmɛ a kpɛti.

¹⁸ Kɛkɛ nɛ Farao ɔ tsɔ ya tsɛ Abram kɛ ba, nɛ e bi lɛ ke, “Mɛni o pee mi nɛ ɔ? Mɛni he je o de we mi ke o yo ji yo ɔ?

¹⁹ Mɛni he je o de mi ke o nyɛmiyo ji lɛ, nɛ i ngɔ lɛ ngɔ pee ye yo ɔ? Hyɛ, o yo ɔ ji nɛ ɔ nɛ; ngɔɔ lɛ, nɛ o kɛ lɛ nɛ je hiɛ ɔ!”

²⁰ Matsɛ ɔ fa e we bi ɔmɛ nɛ a ha nɛ Abram, kɛ e yo ɔ, kɛ e we mi bi ɔmɛ je ma a mi kɛ a nɔ́ tsuaa nɔ́.