Mose I, 10 - BAIBLO ALOO NGMAMI KLƆUKLƆU Ɔ

Noa bimɛ ɔmɛ a nina

¹ Noa binyumuhi, Shem, Ham, kɛ Yafet ɔ, a binyumuhi nɛ a fɔ ngɛ nyu kpekpemi ɔ se ji nɛ ɔmɛ nɛ.

² Yafet bimɛ ji Gomer, Magog, Madai, Yavan, Tubal, Meshek, kɛ Tiras bi.

³ Gomer nina ji Ashkenaz, Rifat, Togarma bi.

⁴ Yavan nina ji Elisha, Spania, Kipro, kɛ Rodo bi.

⁵ Nihi nɛ ngɛ wo nya zugba amɛ kɛ wo kpɔ ɔmɛ a nɔ ɔ, a nɛmɛ ji ni nɛ ɔmɛ nɛ. Yafet nina ji mɛ tsuo. A ngɛ mɛ nitsɛmɛ a zugbahi a nɔ wɛtso nya wɛtso nya, nɔ tsuaa nɔ kɛ e ma mi gbi.

⁶ Ham bimɛ ji Kush, Egipt, Libia, kɛ Kanaan bi.

⁷ Kush nina ji Seba, Havila, Sabta, Raama, kɛ Sabteka bi. Raama nina ji Sheba kɛ Dedan bi.

⁸ Kush binyumu ji Nimrod, nɛ Nimrod nɛ ɔ ji kekleekle tatsɛ kpanaa ngɛ je ɔ mi.

⁹ Yawɛ gbaa lɛ nɛ e ba pee detsɛ ngua. Enɛ ɔ he je ɔ, a kɛ e biɛ buu abɛ ke, “Yawɛ nɛ ha nɛ o ba pee detsɛ ngua kaa Nimrod!”

¹⁰ Kekleekle ɔ, Nimrod nɔ yemi he ɔmɛ ji Babilon, Erek, kɛ Akad ngɛ Babilonia zugba a nɔ.

¹¹ Se e je lejɛ ɔ kɛ ya Asiria, nɛ e ya po mahi ngɛ Nineve, Rehobot Ir, Kala,

¹² kɛ Resen nɛ ngɛ Nineve kɛ ma ngua a nɛ a tsɛɛ Kala a kpɛti ɔ.

¹³ Egipt bi a nina ji Lidia, Anam, Lehab, Naftu,

¹⁴ Patrus, Kaslu (he nɛ Filisti bi ɔmɛ je ɔ), kɛ Kaftor bi.

¹⁵ Kanaan bitɛte ji Sidon, kɛ e senɔ nyumu Het.

¹⁶ Kanaan nina ji Yebus bi, Amor bi, Girgash bi,

¹⁷ Hiv bi, Ark bi, Sin bi,

¹⁸ Arvad bi, Zemar bi, kɛ Hamat bi. Pee se ɔ, Kanaan wɛtso slɔɔto ɔmɛ gbɛ fĩa.

¹⁹ Kanaan bi ɔmɛ a zugba a ngɛ kɛ je Sidon kɛ gu Gera hluu kɛ ya pi Gaza. Jehanɛ, zugba a ya gu Sodom, Gomora, Adma, kɛ Zeboiim blɔ, kɛ ya pi Lasha.

²⁰ Ham nina ji nɛ ɔmɛ nɛ; nɔ tsuaa nɔ kɛ e wɛtso, kɛ ma mi he nɛ e je, kɛ gbi nɛ e tuɔ.

²¹ Yafet wetsɛ Shem ji Hebri bi ɔmɛ tsuo a nɛ̃.

²² Shem binyumuhi ji Elam, Ashur, Arpakshad, Lud kɛ Aram.

²³ Aram binyumuhi ji Uz, Hul, Geter, kɛ Meshek.

²⁴ Arpakshad ji Shela tsɛ, nɛ Shela ji Eber tsɛ.

²⁵ Eber ngɛ binyumuhi enyɔ; a wo e bitɛte ɔ biɛ ke Peleg, ejakaa jamɛ a be ɔ mi ɔ, a gba nyu dɔ ngɛ zugba a mi; Peleg senɔ ɔ biɛ ji Yoktan.

²⁶ Yoktan nina ji nɛ ɔmɛ nɛ: Almodad bi, Shelef bi, Hazarmavet bi, Yera bi,

²⁷ Hadoram bi, Uzal bi, Dikla bi,

²⁸ Obal bi, Abimael bi, Sheba bi,

²⁹ Ofir bi, Havila bi, kɛ Yobab bi; Yoktan nina ji ni nɛ ɔmɛ tsuo.

³⁰ A sihi he ngɛ kɛ je Mesha kɛ ya Sefar ngɛ yoku zugba a nɛ ngɛ beleku je ɔ nɔ.

³¹ Ni nɛ ɔmɛ ji Shem nina; nɔ tsuaa nɔ kɛ e wɛtso, kɛ ma mi he nɛ e je, kɛ gbi nɛ e tuɔ.

³² Ni nɛ ɔmɛ tsuo kulaa ji Noa nina, ngɛ mahi kɛ wekuhi a mi hehi nɛ a je ɔ. Nyu kpekpemi ɔ se ɔ, ni nɛ ɔmɛ a mi je ma amɛ tsuo je gbɛ fĩa je ɔ mi tsuo.