Mika 4 - BAIBLO ALOO NGMAMI KLƆUKLƆU Ɔ

Yawɛ maa ye matsɛ ngɛ tue mi jɔmi mi

¹ Nyagbe be ɔ mi ɔ, yo ɔ nɛ Yawɛ we ɔ maa si ngɛ nɔ ɔ ma ba pee yo nɛ he biɛ pe yo ɔmɛ tsuo. Je mahi babauu ma ba hyɛ,

² nɛ a ma de a sibi ke, “Nyɛ ha waa kuɔ Yawɛ ɔ kɛ ya Israel Mawu ɔ we ɔ. E maa tsɔɔ wɔ nɔ́ nɛ e suɔ kaa waa pee, nɛ wa maa nyɛɛ e blɔ ɔmɛ a nɔ. Ejakaa Yawɛ mlaa a maa je Zion; e kɛ e ma a maa tu munyu kɛ je Yerusalem.”

³ E ma dla je ma nguanguahi babauu a kpɛti, ni nɛmɛ nɛ a he kɛ we, kɛ ni nɛmɛ nɛ ngɛ tsitsaa lokoo. A kɛ a klaate ɔmɛ maa sɔ̃ kpakplaahi nɛ akplɔ ɔmɛ hu, a kɛ maa sɔ̃ tso he suami hahi. Je ma amɛ be ta hwue hu gblegbleegble; a be dlae kɛ ha ta hu kɔkɔɔkɔ.

⁴ Nɔ tsuaa nɔ maa hi si ngɛ he jɔmi mi ngɛ e wai tso, loo e ngmɔkɔ tso sisi, nɛ nɔ ko be nɔ ko he gbeye woe. Yawɛ, Tabohiatsɛ ɔ lɛ de.

⁵ Je ma amɛ a ti nɔ tsuaa nɔ jaa lɛ nitsɛ e mawu. Se wɔɔ lɛɛ Yawɛ, wa Mawu ɔ, ji nɔ nɛ wa ma sɔmɔ kɛ maa ya neneene.

Israel maa kpale kɛ je nyɔguɛ si himi mi kɛ ba

⁶ Yawɛ ke, “Nihi nɛ i gbla a tue, nɛ a na nɔ́ ngɛ nyɔguɛ si himi mi ɔ, be ma, nɛ ma bua jamɛatsɛmɛ ɔmɛ a nya ekohu.

⁷ Akpaketsɛmɛ ɔmɛ, kɛ ni nɛmɛ nɛ ngɛ ma se lokoo ɔ, ma kpale mɛ kɛ ba we ekohu; nɛ ma pee mɛ ma agbo. Ma hi Zion Yo ɔ nɔ kɛ ye matsɛ ngɛ a nɔ, kɛ maa je jamɛ a be ɔ mi, kɛ maa ya neneene.” Yawɛ lɛ de.

⁸ Nɛ mo Yerusalem, he nɛ Mawu hii nɛ e kɛ hyɛɛ e ma a nɔ kaa to hyɛlɔ ɔ, o he wami kɛ o blɔ nya nɛ o hɛɛ kaa matsɛ ma a, o maa kpale na ekohu. Mawu lɛ de.

⁹ Mɛni he je o ngɛ ngmlaa kpae wawɛɛ kikɛ nɛ ɔ? Mɛni he je o pee kaa yo nɛ nu kɔɔmi ɔ? Anɛ matsɛ be o dɛ lo? Anɛ o ga woli ɔmɛ gbo lo?

¹⁰ Nyɛ Yerusalem ma mi bi, nyɛɛ kɛ nyɛ he nɛ wuwlua si, nɛ nyɛ kɛmɛ kaa yo nɛ ngɛ kɔe. Ejakaa jehanɛ lɛɛ nyɛ maa je ma a mi kɛ ya hi nga nɔ. A maa ngɔ nyɛ kɛ ya Babilon tɔɔ. Se Yawɛ ma kpɔ nyɛ kɛ je nyɛ he nyɛli ɔmɛ a dɛ mi ngɛ lejɛ ɔ.

¹¹ Je mahi babauu ba bua ngɔ wo nyɛ he konɛ a tua nyɛ. A ke, “Ja wa kpata Yerusalem hɛ mi! Wa maa na kɛ wa hɛngmɛ kaa ma nɛ ɔ pee ma doku!”

¹² Se je ma nɛ ɔmɛ li Yawɛ yi mi, loo ga nɛ e to. A li tete kaa Yawɛ bua a nya konɛ e gbla a tue kaa bɔ nɛ a gbeeɔ blɛfo ngɛ tso mi ɔ.

¹³ Yawɛ ke, “Nyɛ Yerusalem bi, nyɛɛ ya nɛ nyɛ ya gbla nyɛ he nyɛli ɔmɛ a tue! Ma ha nyɛ dade tso nyɛ, kɛ dade tso mi bihi nɛ nyɛɛ kɛ maa gbee je mahi babauu. Nyɛ ma kpata a hɛ mi, nɛ níhi nɛ a kpɔ pani nya ngɛ nihi a dɛ ɔ, nyɛ maa ngɔ kɛ ba ha imi, je ɔ tsuo Nyɔmtsɛ ɔ.” Mawu lɛ de.