Mika 3 - BAIBLO ALOO NGMAMI KLƆUKLƆU Ɔ

Mika ka Israel hɛ mi nyɛɛli ɔmɛ a hɛ mi

¹ Nyɛ Israel ma a nɔ yeli, nyɛɛ bu tue! Nyɛ blɔ nya ji kaa nyɛɛ ye dami sane,

² se nyɛ nyɛɛ nɔ́ kpakpa, nɛ nyɛ suɔ yayami mohu. Nyɛ kpɔɔ ye ma mi bi ɔmɛ a he womi hɛ ngmengmle kɛ jeɔ a wuhi a he.

³ Nyɛ yeɔ ye ma mi bi ɔmɛ. Nyɛ kpɔɔ a he womi kɛ jeɔ a he. Nyɛ kuɔ a wuhi, nɛ nyɛ poɔ mɛ kpɔ nya kpɔ nya kaa lo nɛ a kɛ maa wo kutu mi.

⁴ Be ma nɛ nyɛ ma kpa ngmlaa kɛ tsɛ Yawɛ, se e be nyɛ nya mi poe. E be nyɛ kue fami ɔ tue bue, ejakaa nyɛ pee yayami.

⁵ Nyɛ lakpa gbali nɛ nyɛ ngɛ ye ma a sisie! Nyɛ nɛ nyɛ gbaa he jɔmi kɛ haa nihi nɛ haa nyɛ ní nɛ nyɛ yeɔ; nɛ nyɛ woɔ ni nɛmɛ nɛ ha we nyɛ nɔ́ ko ɔ a susuma he gbeye! Bɔ nɛ Yawɛ ngɛ nyɛ dee ji nɛ ɔ nɛ,

⁶ “Nyɛ ligbi ɔ nya ta, nɛ du miɔ nɛ e ma bu nyɛ. Nyɔ mi ɔ, nyɛ be ní nae hu; ke diblii wo ɔ, nyɛ be klaae hu.” Yawɛ lɛ de.

⁷ Zo maa gbe gbali ɔmɛ kɛ klaali ɔmɛ; mɛ tsuo pɛpɛɛpɛ a ma ma a nya. Ke a gba a, e be mi bae fɛɛ, ejakaa a be sɛ gbi ko nae kɛ je Mawu ngɔ hu.

⁸ Se imi lɛɛ Yawɛ ngɔ e mumi ɔ kɛ wo ye mi tɔ. E ha mi he wami, kɛ dami sane yemi, kɛ kã nɛ ma kɛ jaje Israel ma a he yayami ɔ kɛ tsɔɔ mɛ.

⁹ Nyɛ Israel ma nɔ yeli! Nyɛ nihi nɛ nyɛ yi dami sane, nɛ nyɛ plɛɔ dami sane hɛ mi ngɔ buɔ si! Nyɛɛ bu mi tue!

¹⁰ Mawu ma, Yerusalem ɔ nɛ nyɛ ngɛ mae ɔ, muɔ si puemi kɛ yayami peemi lɛ nyɛ kɛ fia.

¹¹ Ma nimeli ɔmɛ heɔ nyɔ mi ní loko a buá sane he; osɔfo ɔmɛ heɔ hiɔwo loko a tsɔɔ mlaa a sisi; gbali ɔmɛ heɔ sika loko a gbaa. Se mɛ tsuo a buɔ Mawu kua pɛɛ nɛ a deɔ ke, “Yawɛ kɛ wɔ ngɛ; nɔ́ ko nɔ ko be wɔ pee!”

¹² Lɔ ɔ he ɔ, nyɛ he ɔ, a maa pee Zion kaa ngmɔ nɛ a hu. Yerusalem maa pee ma doku, nɛ yo ɔ nɔ he nɛ Yawɛ we ɔ maa si ngɛ ɔ maa hɛ, nɛ e maa pee pú.