Matsɛmɛ II, 8 - BAIBLO ALOO NGMAMI KLƆUKLƆU Ɔ

Shunem yo ɔ kpale kɛ ba

¹ Elisha de Shunem yo ɔ nɛ e binyumu ɔ gbo, nɛ lɛ, Elisha a tle lɛ si ɔ ke, “Moo mia nɛ o kɛ o we mi bi ɔmɛ nyɛɛ ho nɛ nyɛ ya to nubwɔ ngɛ he tsuaa he nɛ nyɛ ma na; ejakaa Yawɛ ma ha nɛ hwɔ maa ba zugba a nɔ jeha kpaago.”

² Yo ɔ dla, nɛ kaa bɔ nɛ Mawu nɔmlɔ ɔ de lɛ ɔ, e kɛ e we mi bi ɔmɛ pue nɔ kɛ ho Filisti bi ɔmɛ a zugba a nɔ ya; nɛ a ya to nubwɔ ngɛ lejɛ ɔ jeha kpaago.

³ Jeha kpaago ɔ se, benɛ yo ɔ kpale e se kɛ je Filisti bi ɔmɛ a zugba a nɔ kɛ ba a, e ya nɛ́ e ya kpa matsɛ ɔ pɛɛ konɛ e kpale e we ɔ, kɛ e zugba a nɛ a kpɔ ɔ kɛ ha lɛ.

⁴ E ya na Mawu nɔmlɔ Elisha tsɔlɔ Gehazi nɛ e kɛ matsɛ ɔ ngɛ ní sɛɛe. Matsɛ ɔ de Gehazi ke, “Moo gba mi nyakpɛ níhi tsuo nɛ Elisha pee ɔ.”

⁵ Benɛ Gehazi ngɛ matsɛ ɔ gbae bɔ nɛ Elisha tle gbogboe ko si ɔ, yo ɔ nɛ e binyumu ɔ gbo nɛ a tle lɛ si ɔ, ba fa kue ha matsɛ ɔ ngɛ e we ɔ, kɛ e zugba a he. Kɛkɛ nɛ Gehazi de ke, “Ye nyɔmtsɛ matsɛ, yo ɔ ji nɛ ɔ nɛ; nɛ e binyumu ɔ nɛ Elisha tle si ɔ hu ji nɛ ɔ nɛ.”

⁶ Matsɛ ɔ bi yo ɔ e nya mi gbi, nɛ e gba lɛ e sane ɔ. Kɛkɛ nɛ matsɛ ɔ tsɛ e tsɔlɔ ko nɛ e de lɛ ke, “Moo kpale yo ɔ nɔ́ tsuaa nɔ́ kɛ ha lɛ. Jehanɛ, jeha kpaago ɔ nɛ e be hiɛ ɔ, niba ní tsuo nɛ ba ngɛ e zugba a nɔ ɔ, a bu nya nɛ a wo lɛ he hiɔ.”

Elisha kɛ Siria matsɛ, Benhadad

⁷ Elisha ya Damasko; nɛ jamɛ a be ɔ, Siria matsɛ, Benhadad be he wami. Benɛ a ya bɔ matsɛ ɔ amaniɛ ke Mawu nɔmlɔ ɔ ba lejɛ ɔ,

⁸ matsɛ ɔ de e tsɔli ɔmɛ a ti nɔ kake nɛ a tsɛɛ Hazael ke, “Moo ngɔ nike ní kɛ ya ha Mawu nɔmlɔ ɔ, nɛ o bi Yawɛ ní ngɛ e ngɔ ha mi kaa hiɔ nɛ i ngɛ nue nɛ ɔ, ma na he wami lo?”

⁹ Kɛkɛ nɛ Hazael pue nɔ kɛ ho Elisha ngɔ ya. E hɛɛ nike níhi nɛ ji Damasko ní kpakpa amɛ tsuo eko tsuaa eko afukpɔngɔ nyingmi eywiɛ yi tlomi kɛ ho. Benɛ e ya na Elisha a, e de lɛ ke, “O binyumu Benhadad, Siria matsɛ ɔ tsɔ mi ke ma ba bi mo ke hiɔ nɛ e ngɛ nue nɛ ɔ, e ma na he wami lo?”

¹⁰ Elisha de lɛ ke, “Yawɛ je tsɔɔ mi kaa e ma gbo; se kɛ̃ ɔ, yaa nɛ o ya de lɛ ke e ma na he wami.”

¹¹ Kɛkɛ nɛ Elisha dɔ e hɛngmɛ ngɔ fɔ Hazael nɔ, nɛ e hyɛ lɛ gaa, hluu kɛ ya si Hazael hao. Kɛkɛ nɛ Mawu nɔmlɔ ɔ fo ya.

¹² Hazael bi lɛ ke, “Ye nyɔmtsɛ, mɛni he je o ngɛ ya foe ɔ?” Elisha he nɔ ke, “Ejakaa i le ní yayamihi nɛ o maa pee Israel ma a. O maa mɛ a mɔ ɔmɛ a he la; o kɛ klaate maa gbe a nihewi ɔmɛ; o maa ngɔ a bimɛ tsɔwitsɔwi ɔmɛ kɛ fia si, nɛ a maa ku dukuduku. Yihɔyi ɔmɛ lɛɛ o ma gba a muklii ɔmɛ.”

¹³ Hazael bi lɛ ke, “Imi o tsɔlɔ nɛ i ngɛ kaa gbe kɛkɛ ɔ, mɛnɔ ji mi nɛ ma tsu nɔ́ nguaa kaa kikɛ nɛ ɔ?” Elisha he nɔ ke, “Yawɛ lɛ je tsɔɔ mi kaa mo lɛ o ma ba ye tsɛ ngɛ Siria ma a nɔ.”

¹⁴ Hazael kpale e se kɛ ho e nyɔmtsɛ Benhadad ngɔ ya. E nyɔmtsɛ ɔ bi lɛ ke, “Kɛ Elisha de mo kɛɛ?” Hazael he nɔ ke, “E ke o ma na he wami.”

¹⁵ Se e nɔ jena a, Hazael ngɔ sa nɔ bo kɛ wo nyu mi nɛ e kɛ ha matsɛ ɔ hɛ mi kɛ ya si e mumi nya ta nɛ e gbo. Nɛ Hazael ba ye matsɛ ngɛ e se.

Yuda matsɛ, Yehoram

¹⁶ Israel matsɛ, Yoram, Ahab binyumu ɔ yi nɔ jeha enuɔ ɔ mi ɔ, Yehoshafat binyumu Yehoram ba bɔni matsɛ yemi ngɛ Yuda.

¹⁷ E ye jeha nyingmi etɛ kɛ enyɔ nɛ e bɔni matsɛ yemi; nɛ e hi Yerusalem kɛ ye matsɛ jeha kpaanyɔ.

¹⁸ E ngɔ Ahab biyo; nɛ kaa bɔ nɛ Ahab we ɔ pee ɔ, lɛ hu e ya wo Israel matsɛmɛ ɔmɛ a nane, nɛ e pee yayami kɛ si Yawɛ.

¹⁹ Se Yawɛ sume kaa e ma kpata Yuda hɛ mi, ejakaa e wo e tsɔlɔ David si kaa e nina maa ye matsɛ kɛ maa ya neneene.

²⁰ Yehoram yi nɔ ɔ, Edom tsɔ Yuda hɛ mi atuã, nɛ mɛ nitsɛmɛ a ya wo matsɛ kɛ ha a he.

²¹ Lɔ ɔ he ɔ, Yehoram kɛ e ta zugba lɛ ɔmɛ tsuo pue nɔ kɛ ho Zair ya; se Edom bi ɔmɛ sa a yi. Nyɔ mi ɔ, e kɛ e ta zugba lɛ ɔmɛ a nya asafoatsɛmɛ ɔmɛ te si konɛ a fia Edom bi ɔmɛ nɛ bɔle mɛ ɔ ní; se e ta buli ɔmɛ gbɛ fĩa, nɛ a tu fo kɛ ya sɛ a bo tsu ɔmɛ a mi.

²² Kɛ je jamɛ a ligbi ɔ, Edom tsɔ e he kɛ je Yuda nɔ yemi ɔ sisi kɛ ba si mwɔnɛ ɔ. Jamɛ a be ɔ nɔuu lɛ Libna ma a hu tsɔ atuã.

²³ Yehoram he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

²⁴ Yehoram ba gbo nɛ a pu lɛ ngɛ matsɛmɛ ɔmɛ a yɔkɔ ɔ mi ngɛ David ma a mi, nɛ e binyumu Ahazia ba ye matsɛ ngɛ e se.

Yuda matsɛ, Ahazia

²⁵ Israel matsɛ, Yoram, Ahab binyumu ɔ yi nɔ jeha nyɔngma kɛ enyɔ ɔ mi ɔ, Yehoram binyumu Ahazia bɔni matsɛ yemi ngɛ Yuda.

²⁶ Ahazia ye jeha nyingmi enyɔ kɛ enyɔ benɛ e bɔni matsɛ yemi; nɛ e hi Yerusalem kɛ ye matsɛ jeha kake. E nyɛ, nɛ ji Israel matsɛ Omri bibi ɔ, e biɛ ji Atalia.

²⁷ Ahazia ngatsɛ ji matsɛ Ahab. Nɛ kaa bɔ nɛ Ahab we ɔ pee ɔ, Ahazia hu ya wo Israel matsɛmɛ ɔmɛ a nane, nɛ e pee yayami kɛ si Yawɛ.

²⁸ Matsɛ Ahazia ya piɛ Israel matsɛ, Yoram, Ahab binyumu ɔ he nɛ a kɛ Siria matsɛ, Hazael ya hwu ta ngɛ Ramot nɛ ngɛ Gilead ɔ. Nɛ Siria bi ɔmɛ plaa Yoram.

²⁹ Matsɛ Yoram kpale e se kɛ ba Yezreel konɛ e ba tsa e he, nɛ Yuda matsɛ Ahazia, Yehoram binyumu ɔ bu e nɔ nɛ e ya slaa lɛ ngɛ lejɛ ɔ.