Matsɛmɛ II, 7 - BAIBLO ALOO NGMAMI KLƆUKLƆU Ɔ

¹ Se Elisha de ke, “Nyɛɛ bu Yawɛ munyu tue! Yawɛ ke, hwɔɔ maa pee be nɛ ɔ mi ɔ, a maa jua ngma mamu bukɔbukɔ kilo etɛ, sika hiɔ yi kake; nɛ a ma he blɛfo kilo ekpa hu sika hiɔ yi kake ngɛ Samaria ma a agbo ɔ nya.”

² Matsɛ ɔ we asafoatsɛngua a de Mawu nɔmlɔ ɔ ke, “Ke Yawɛ nitsɛ ma ha hiɔmi maa nɛ tlukaa po, nɔ́ nɛ ɔ be mi bae.” Elisha he nɔ ke, “Mo nitsɛ o maa na nɔ́ nɛ ɔ kɛ o hɛngmɛ, se o be ní ɔ eko yee!”

Siria tabo ɔ je Samaria

³ Nyumuhi eywiɛ komɛ nɛ he womi nɔ hiɔ yaya ngɛ a he hi Samaria ma a agbo ɔ nya. Ligbi ko ɔ, a de a he ke, “Mɛni he je wa maa hi si ngɛ hiɛmɛ nɛ ɔ kɛ yaa si wa ma gbo ɔ?

⁴ Ke wa ke wa maa sɛ ma a mi ɔ, hwɔ maa gbe wɔ ngɛ lejɛ ɔ. Ke wa hii si ngɛ hiɛ ɔ hu, wa ma gbo. Lɔ ɔ he ɔ, nyɛ ha nɛ waa je kɛ ho Siria bi ɔmɛ a ma sito he ɔ ya. Ke a he wa yi wami ɔ, wa maa tlɔ je mi; ke a gbe wɔ hu gbenɔ kake ɔ kɛ̃.”

⁵ Lɔ ɔ he ɔ, gbɔkuɛ nya si benɛ du maa ho bumi ya a, a te si nɛ a pue blɔ kɛ yaa Siria ta a mi. Se benɛ a su lejɛ ɔ, a nɛ nɔ ko nɔ ko.

⁶ Yawɛ ha nɛ Siria bi ɔmɛ nububuubui ko he kaa nɔ́ nɛ tabo agbo ko hia kɛ ma, kɛ okpɔngɔhi, kɛ ta zugba lɛhi; nɛ Siria bi ɔmɛ susu kaa Israel matsɛ ɔ ya bɔ Hit bi a matsɛmɛ ɔmɛ, kɛ Egipt bi ɔmɛ a matsɛmɛ ɔmɛ apaa nɛ a ba tua mɛ.

⁷ Lɔ ɔ he ɔ, benɛ du maa ho bumi ya a, Siria bi ɔmɛ ngɔ gbenɔ kɛ kã kɛ tu fo kɛ je a bo tsu ɔmɛ, okpɔngɔ ɔmɛ, kɛ teji yi ɔmɛ a he; nɛ a si a ma sito he ɔ kaa bɔ nɛ e ngɛ ɔ.

⁸ Benɛ he womi nɔ hiɔ yaya nuli ɔmɛ ba su ma sito he ɔ nya a, a sɛ bo tsu kake mi, nɛ a ya ye ní nɛ a nu ní. Lɔ ɔ se ɔ, a muɔ sika hiɔ, sika tsu, kɛ bohi kɛ je lejɛ ɔ kɛ ya to he ko. A kpale a se kɛ ba ekohu ba sɛ bo tsu kpa mi, nɛ a muɔ níhi ngɛ lejɛ ɔ hulɔ kɛ ya to.

⁹ Kɛkɛ nɛ a de a sibi ke, “Nɔ́ nɛ wa ngɛ pee nɛ ɔ hí! Wa ye manye mwɔnɛ ligbi nɛ ɔ. Ke wa pee dii nɛ wa mlɛ kɛ ya si mɔtu loko wa ya de ɔ, a maa gbla wa tue. Lɔ ɔ he ɔ, nyɛ ha waa ho nɛ wa ya bɔ matsɛ we ɔ amaniɛ.”

¹⁰ Kɛkɛ nɛ a ho nɛ a ya tsɛ ma agbo nya buli ɔmɛ nɛ a de mɛ ke, “Wa ya Siria bi ɔmɛ a ma sito he ɔ, se wa nɛ nɔ ko nɔ ko ngɛ lejɛ ɔ; wa nui nɔ ko nɔ ko nya hulɔ. A fi okpɔngɔ ɔmɛ, kɛ teji ɔmɛ kɛ muɔ si, nɛ bo tsu ɔmɛ fɔɔ si kaa bɔ nɛ a si mɛ ɔ.”

¹¹ Kɛkɛ nɛ agbo nya buli ɔmɛ he ose; nɛ a ho ya bɔ matsɛ we ɔ amaniɛ.

¹² Matsɛ ɔ te si nyɔ ɔ mi nɔuu, nɛ e de e tsɔli ɔmɛ ke, “Ma tsɔɔ nyɛ ga nɛ Siria bi nɛ ɔmɛ to ngɔ wo wa he ɔ. A le kaa hwɔ ngɛ wɔ yee; lɔ ɔ he ɔ, a je a ma sito he ɔ nɛ a ya laa a he ngɛ nga a nɔ. A susu kaa ke a pee ja a, wa maa je ma a mi, kɛkɛ a ma ba sɛ ma a mi nɛ a nuu wɔ hɛ ngmengmle.”

¹³ E tsɔli ɔmɛ a ti nɔ kake wo ga ke, “Nimli nɛ piɛ ngɛ ma nɛ ɔ mi ɔ, hɛ nɔ kami ko be ha mɛ; a ngɛ kaa Israel ma kpekpemi ɔ nɛ mɛɛ a gbo momo ɔ kɛ̃. Lɔ ɔ he ɔ, nyɛ ha waa tsɔ ni komɛ nɛ a ngɔ okpɔngɔ ɔmɛ nɛ a piɛ ɔ enuɔ kɛ ya, nɛ a ya hyɛ kaa mɛni tutuutu lɛ ba Siria ta buli ɔmɛ a nɔ lo.”

¹⁴ A hla ni komɛ, nɛ matsɛ ɔ tsɔ mɛ kɛ ta zugba lɛ enyɔ kɛ a nya okpɔngɔhi. E de mɛ ke a ya nɛ a ya hyɛ kaa mɛni lɛ ba Siria bi ɔmɛ a ta buli ɔmɛ a nɔ lo.

¹⁵ Tsɔli ɔmɛ nyɛɛ Siria bi ɔmɛ a se kɛ ya su Yordan pa a nya tɔɔ. Benɛ a yaa a, a na tadehi, kɛ ní kpa komɛ nɛ Siria bi ɔmɛ sake ngɔ pue blɔ ɔ tue benɛ a ngɛ fo tue esɔesɔ ɔ. Tsɔli ɔmɛ kpale a se kɛ ba nɛ a ba bɔ matsɛ ɔ amaniɛ.

¹⁶ Kɛkɛ nɛ Samaria bi ɔmɛ ho nɛ a ya ha ní ngɛ Siria bi ɔmɛ a ma sito he ɔ. Nɛ, kaa bɔ nɛ Yawɛ de ɔ, a jua mamu bukɔbukɔ kilo etɛ sika hiɔ yi kake, kɛ blɛfo kilo ekpa hu sika hiɔ yi kake.

¹⁷ E ba mi kaa Israel matsɛ ɔ ngɔ e we asafoatsɛngua a kɛ to ma a agbo ɔ nya. Se ma a naa e nɔ ngɛ agbo ɔ nya nɛ e gbo kaa bɔ nɛ Mawu nɔmlɔ ɔ de benɛ matsɛ ɔ ba e ngɔ ɔ.

¹⁸ Benɛ Mawu nɔmlɔ ɔ de matsɛ ɔ ke, “Hwɔɔ, maa pee be nɛ ɔ mi ɔ, a maa jua blɛfo kilo ekpa, aloo ngma mamu bukɔbukɔ kilo etɛ sika hiɔ yi kake ngɛ Samaria” a,

¹⁹ asafoatsɛ ɔ he nɔ ke, “Ke Yawɛ nitsɛ ma ha hiɔmi maa nɛ tlukaa po, nɔ́ nɛ ɔ be mi bae.” Elisha de lɛ ke, “Mo nitsɛ o maa na nɔ́ nɛ ɔ kɛ o hɛngmɛ, se o be ní ɔ eko yee!”

²⁰ Jamɛ a nɔ́ ɔ ji nɔ́ nɛ ba mi nɛ ɔ nɛ. Ma a naa e nɔ nɛ e gbo ngɛ ma a agbo ɔ nya.