Matsɛmɛ II, 5 - BAIBLO ALOO NGMAMI KLƆUKLƆU Ɔ

A tsa Naeman

¹ Siria matsɛ ɔ tatsɛ Naeman ji nɔ ko nɛ e nyɔmtsɛ ɔ buu lɛ saminya kaa nɔmlɔ agbo; ejakaa Yawɛ gu Naeman nɔ kɛ ha Siria ye kunimi. Katsɛ kpanaa ji lɛ; se he womi nɔ hiɔ yaya ngɛ e he.

² Be ko mi nɛ Siria bi ɔmɛ ba tua Israel ɔ, a nu Israel yiheyo wayoo ko nyɔguɛ kɛ ho, nɛ e ya sɔmɔ Naeman yo ɔ.

³ Ligbi ko ɔ, e de e nyɛ ɔ ke, “I ná nɛ ye nyɔmtsɛ ɔ ya gbalɔ ɔ nɛ ngɛ Samaria a ngɔ, jinɛ e ma tsa e hiɔ ɔ ha lɛ.”

⁴ Benɛ Naeman nu he ɔ, e ho ya bɔ matsɛ ɔ nɔ́ nɛ yiheyo ɔ nɛ je Israel ɔ de ɔ.

⁵ Siria matsɛ ɔ de lɛ ke, “Yaa nɛ o ya na Israel matsɛ ɔ; ma ha mo womi nɛ o hɛɛ kɛ ya ha lɛ.” Kɛkɛ nɛ Naeman pue nɔ kɛ ho. Benɛ e yaa a, e hɛɛ sika hiɔ yi akpe nyingmi etɛ, sika tsu yi akpe ekpa, kɛ he dlami tade saminyawiiwi nyɔngma kɛ ho.

⁶ Womi ɔ nɛ e hɛɛ kɛ ya ha Israel matsɛ ɔ, nɔ́ nɛ a ngma ngɛ mi ji, “Ke womi nɛ ɔ su o dɛ ɔ, na nɛ o le kaa i ngɛ ye tsɔlɔ Naeman o ngɔ tsɔe, nɛ o tsa e he womi nɔ hiɔ yaya a ha lɛ.”

⁷ Benɛ Israel matsɛ ɔ kane womi ɔ, e hao wawɛɛ nɛ e hia e tade ɔ nɛ e de ke, “Anɛ Mawu ji mi? Anɛ i ngɛ gbenɔ kɛ wami nɔ he wami loko nyumu nɛ ɔ maa tsɔ nɔ kɛ ba ye ngɔ nɛ ma tsa e he womi nɔ hiɔ yaya a ha lɛ lo? E fɔɔ si paa kaa munyu kɛkɛ lɛ e ngɛ hlae ngɛ ye he!”

⁸ Benɛ Mawu nɔmlɔ Elisha nu sane nɛ ba a, e tsɔ ya de matsɛ ɔ ke, “Mɛni he je o hao kikɛ nɛ ɔ? Ha nɛ nyumu ɔ nɛ ba ye ngɔ, nɛ e maa na kaa gbalɔ ko ngɛ Israel.”

⁹ Kɛkɛ nɛ Naeman kɛ e we okpɔngɔ ɔmɛ, kɛ zugba lɛ ɔmɛ ho nɛ a ya da si ngɛ Elisha we ɔ agbo ɔ nya.

¹⁰ Elisha tsɔ ya de lɛ ke, “Yaa nɛ o ya du o he ngɛ Yordan pa a mi si kpaago, kɛkɛ o he womi maa hi ekohu, nɛ o he ma tsɔ!”

¹¹ Se Naeman mi mi fu, nɛ e je lejɛ ɔ. Benɛ e yaa a, e de ke, “Hyɛ, i susu kaa e ma ba da si ngɛ ye kasa nya nɛ e ma tsɛ Yawɛ e Mawu ɔ biɛ; nɛ e maa fɔ̃ e nine ngɛ hiɔ nɔ kɛ ya kɛ ba, nɛ e ma tsa mi.

¹² Damasko pahi, Abana kɛ Farpar a, anɛ a hí pi pa amɛ tsuo ngɛ Israel lo? Anɛ i ko du we ngɛ lɔ ɔmɛ a mi nɛ ye he nɛ tsɔ lo?”

¹³ E tsɔli ɔmɛ ba e ngɔ nɛ a ba de lɛ ke, “Tsaatsɛ! Nɔ́ nguaa ko nɛ gbalɔ ɔ fa mo ke o pee jinɛ o ko pee we lo? Mɛni he je mɔ nɛ o be nyɛe nɛ o ya du o he kɛkɛ kaa bɔ nɛ e de ɔ, konɛ a tsa mo ɔ?”

¹⁴ Kɛkɛ nɛ Naeman pue nɔ kɛ ho Yordan pa a mi ya, nɛ e mu kɛ ya nyu ɔ sisi si kpaago kaa bɔ nɛ Mawu nɔmlɔ ɔ fa lɛ ɔ. Nɛ a tsa lɛ. E he womi tsake nɛ e pee kaa jokuɛyo he womi ekohu.

¹⁵ Lɔ ɔ se ɔ, e kɛ e we bi ɔmɛ tsuo kpale kɛ ho Mawu nɔmlɔ ɔ ngɔ ya, nɛ e ya de lɛ ke, “Kpaako loko i na kaa Mawu ko Mawu ko be je ɔ mi he ko he ko kaa ja Israel Mawu ɔ ngɛ hiɛmɛ nɛ ɔ. Lɔ ɔ he ɔ, ye nyɔmtsɛ, i kpa mo pɛɛ, nike ní bɔɔ ko nɛ i hɛɛ kɛ ba ha mo ji nɛ ɔ nɛ.”

¹⁶ Elisha he nɔ ke, “I na Mawu nɛ i sɔmɔɔ lɛ ɔ kaa i be nɔ́ ko nɔ́ ko hee!” Naeman nyɛ e nɔ ke e he kɛkɛ; se e kplɛɛ we.

¹⁷ Lɔ ɔ he ɔ, Naeman de ke, “Lɛɛ ke ja a, i kpa mo pɛɛ, ha nɛ a ha mi tabo zu teji okpɔngɔ enyɔ a yi tlomi nɛ ma kɛ ya. Ejakaa kɛ je mwɔnɛ ɔ kɛ yaa a, i be sami bɔ, loo bɔ kpa ko sãe ha mawu kpa komɛ hu kaa ja Yawɛ kɛkɛ.

¹⁸ Lɔ ɔ he ɔ, i heɔ yeɔ kaa ke i nyɛɛ ye nyɔmtsɛ matsɛ se kɛ ya Siria mawu ɔ nɛ a tsɛɛ Rimon ɔ we ɔ, nɛ i ya ja lɛ ɔ, Yawɛ kɛ nɔ́ nɛ ɔ maa pa mi. Niinɛ, Yawɛ kɛ maa pa mi.”

¹⁹ Elisha de lɛ ke, “Yaa ngɛ he jɔmi mi.” Benɛ Naeman je ɔ, e kɛ we kulaa

²⁰ nɛ Mawu nɔmlɔ Elisha tsɔlɔ Gehazi de ke, “Hyɛ kaa ye nyɔmtsɛ ngɔ Naeman, Siria no nɛ ɔ he ngɔ ke lɛ; nɔ́ nɛ e hɛɛ kɛ ba a hu, e he we ngɛ e dɛ. I na Mawu, ma tu fo kɛ fie e se nɛ ma ya he nɔ́ ko ngɛ e dɛ.”

²¹ Kɛkɛ nɛ Gehazi nyɛɛ Naeman se. Benɛ Naeman na kaa nɔ ko ma ngɛ e se kɛ fo ɔ, e kple si kɛ je zugba lɛ ɔ mi, nɛ e kɛ lɛ ba kpe. E bi lɛ ke, “Sane ko he je lo?”

²² Gehazi he nɔ ke, “Dɛbi! I hɛɛ we sane yobu ko. Ye nyɔmtsɛ ɔ lɛ tsɔ mi ke ma ba de mo ke amlɔ nɛ ɔ nɔuu nɛ gbali a kuu ɔ mi nihewi enyɔ je Efraim yo ɔ nɔ kɛ ba e ngɔ. Lɔ ɔ he ɔ, e kpa mo pɛɛ nɛ o ha mɛ sika hiɔ yi akpe etɛ, kɛ he dlami tade saminyawiiwi enyɔ.”

²³ Naeman de lɛ ke, “I kpa mo pɛɛ, mo he sika hiɔ yi akpe ekpa.” E nyɛ e nɔ, nɛ e fi sika hiɔ yi akpe ekpa a kɛ wo kotoku enyɔ a mi; nɛ e ngɔ he dlami tade saminyawiiwi enyɔ ngɔ piɛ he ngɔ tloo e tsɔli enyɔ kɛ nyɛɛ Gehazi hɛ mi.

²⁴ Benɛ a ya su yoku ɔ he ɔ, Gehazi he ní ɔmɛ ngɛ tsɔli ɔmɛ a dɛ kɛ ya to we ɔ mi; nɛ e wo mɛ blɔ.

²⁵ Benɛ Gehazi kpale kɛ ba we ɔ mi ɔ, e nyɔmtsɛ ɔ bi lɛ ke, “Jije o je?” Nɛ e he nɔ ke, “Ye nyɔmtsɛ, i kpa mo pɛɛ, i yɛ he ko he ko.”

²⁶ Se Elisha de lɛ ke, “Anɛ benɛ nyumu ɔ kple si kɛ je e zugba lɛ ɔ mi nɛ e kɛ mo ba kpe ɔ, i be lejɛ ɔ ngɛ mumi mi lo? Anɛ be nɛ a kɛ heɔ sika, loo tadehi, loo oliv abɔɔhi, loo wai ngmɔhi, loo tohi, loo nahi, loo mawahi ji nɛ ɔ lo?

²⁷ Lɔ ɔ he ɔ, Naeman he womi nɔ hiɔ yaya a ma ba pue o he, nɛ o kɛ o nina maa nu hiɔ nɛ ɔ kɛ maa ya neneene.” Benɛ Gehazi je lejɛ ɔ, he womi nɔ hiɔ yaya pue e he, nɛ e he womi pee patapata kaa ngo.