Matsɛmɛ II, 24 - BAIBLO ALOO NGMAMI KLƆUKLƆU Ɔ

¹ Benɛ Yehoyakim ngɛ tsɛ yee ɔ, Babilonia matsɛ, Nebukadnezar hia ta ba tua Yuda. Yehoyakim sɔmɔ lɛ jeha etɛ, nɛ lɔ ɔ se ɔ, e tsɔ atuã.

² Yawɛ tsɔ Babilonia, Siria, Moab, kɛ Amon ta buli kɛ ho Yehoyakim ngɔ ya, konɛ a ya kpata Yuda zugba a hɛ mi kaa bɔ nɛ Yawɛ gu e tsɔli gbali ɔmɛ a nɔ de to ke e maa pee ɔ.

³ Yawɛ lɛ ha nɔ́ nɛ ɔ ba mi, bɔ nɛ pee nɛ e je Yuda ma a we ngɛ yayamihi nɛ Manase pee ɔ a he,

⁴ titli ɔ, kaa e pue nihi babauu nɛ pee we nɔ́ yayami ko a muɔ si ngɛ Yerusalem. Yawɛ kɛ nɔ́ nɛ Manase pee nɛ ɔ pɛ́ lɛ.

⁵ Yehoyakim he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

⁶ Yehoyakim ba gbo, nɛ e binyumu Yehoyakin ba ye matsɛ ngɛ e se.

⁷ Jehanɛ Egipt matsɛ ɔ pa nyɛ we nɛ e hia ta kɛ je Egipt hu, ejakaa Babilonia matsɛ ɔ kpɔ zugba amɛ tsuo ngɛ e dɛ, kɛ je Egipt Taku ɔ nya hluu kɛ ya si Yufrate pa a nya.

Yuda matsɛ, Yehoyakin

⁸ Yehoyakin ye jeha nyɔngma kɛ kpaanyɔ benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ nyɔhiɔ etɛ. E nyɛ biɛ ji Nehushta. Elnatan nɛ je Yerusalem ɔ biyo ji lɛ.

⁹ Yehoyakin ya wo e tsɛ nane, nɛ e pee yayami kɛ si Yawɛ.

¹⁰ E yi nɔ ɔ, Babilonia matsɛ, Nebukadnezar tsɔli ɔmɛ hia ta kɛ ya Yerusalem nɛ a ya sa ma a yi.

¹¹ Benɛ a sa ma a yi ɔ, Nebukadnezar nitsɛ ya Yerusalem,

¹² nɛ Yuda matsɛ, Yehoyakin nyɛ ngɔ lɛ nitsɛ e he, e tsɔli ɔmɛ, e ma nimeli ɔmɛ, kɛ matsɛ we ɔ ní tsuli ɔmɛ ngɔ ha Babilonia matsɛ ɔ. Nebukadnezar yi nɔ jeha nɛ ji kpaanyɔ ɔ mi ɔ, e nu Yehoyakin nyɔguɛ,

¹³ nɛ e muɔ junehi tsuo nɛ ngɛ Yawɛ we ɔ, kɛ matsɛ we ɔ kɛ ho Babilon ya. Nɛ kaa bɔ nɛ Yawɛ de to momo ɔ, sika tsu kãhi nɛ Israel matsɛ, Salomo pee nɛ a kɛ tsu ní ngɛ Yawɛ we ɔ, Nebukadnezar ywia mɛ dukuduku.

¹⁴ Nebukadnezar ngɔ Yerusalem ma mi bi ɔmɛ, ganɔ ɔmɛ, kɛ katsɛmɛ ɔmɛ tsuo nyɔguɛ kɛ je; mɛ tsuo pɛpɛɛpɛ a yibɔ ji akpe nyɔngma. E nuu ga ní tsuli, kɛ sɔli tsuo kɛ je; nimli gu ɔmɛ nɛ be nɔ́ ko mi ɔ pɛ ji ni nɛmɛ nɛ piɛ ngɛ Yuda.

¹⁵ Nebukadnezar ngɔ Yehoyakin, kɛ e nyɛ, e yi ɔmɛ, e tsɔli ɔmɛ, kɛ Yuda ma nimeli ɔmɛ nyɔguɛ kɛ ho Babilon ya.

¹⁶ Jehanɛ, Babilonia matsɛ ɔ ngɔ ta buli kpakpahi akpe kpaago, kɛ ga ní tsuli, kɛ sɔli hu akpe kɛ ho. Katsɛmɛ kɛ nihi nɛ su ta yami nya ji nimli nɛ ɔmɛ tsuo kulaa.

¹⁷ Nebukadnezar wo Yehoyakin tsɛko Matania matsɛ ngɛ Yehoyakin nane mi; nɛ e tsake e biɛ ngɔ pee Zedekia.

Yuda matsɛ, Zedekia

¹⁸ Zedekia ye jeha nyingmi enyɔ kɛ kake benɛ e ba bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyɔngma kɛ kake. E nyɛ biɛ ji Hamutal. Yeremia nɛ je Libna a biyo ji lɛ.

¹⁹ Matsɛ Zedekia pee yayami kɛ si Yawɛ kaa bɔ nɛ Yehoyakin pee ɔ pɛpɛɛpɛ.

²⁰ Yawɛ mi mi fu Yuda ma a, kɛ nihi nɛ ngɛ Yerusalem ɔ wawɛɛ nitsɛ kɛ ya si e je e hɛ ngɛ a nɔ.