Matsɛmɛ II, 23 - BAIBLO ALOO NGMAMI KLƆUKLƆU Ɔ

Yosia gu amaga jami

¹ Matsɛ Yosia tsɔ ya kpee Yuda kɛ Yerusalem ma nimeli ɔmɛ tsuo kɛ ba;

² nɛ a kɛ mɛ, kɛ osɔfo ɔmɛ, kɛ ma a tsuo, nimli wawihi kɛ nimli nguahi ho Yawɛ we ɔ ya. Matsɛ ɔ ya kane mlaa womi ɔ nɛ a na a ngɛ lejɛ ɔ.

³ E ya da titima a kasa nya, nɛ e kɛ Yawɛ so. E ka lɛ kita ke e maa bu lɛ tue, nɛ e maa ye e mlaa amɛ a nɔ kɛ e tsui tsuo, kɛ e klaa tsuo; nɛ níhi nɛ a ngma ngɛ mlaa womi ɔ mi ɔ, e maa pee lɛ tsuo pɛpɛɛpɛ. Kɛkɛ nɛ ma a tsuo wo si kaa a maa ye somi ɔ nɔ.

⁴ Enɛ ɔ se ɔ, Matsɛ Yosia fa osɔfo nɔkɔtɔma pe kulaa Hilkia, kɛ osɔfo wawi ɔmɛ, kɛ Yawɛ we ɔ agbo nya buli ɔmɛ ke a ya je níhi tsuo nɛ a kɛ jaa Baal, kɛ yo mawu Ashera, kɛ dodoehi ngɛ Yawɛ we ɔ kɛ ba. Matsɛ ɔ ya sã ní nɛ ɔmɛ tsuo ngɛ Yerusalem ma a nya ngɛ Kidron kɔ̃ ɔ kasa nya, nɛ e ha a muɔ la zu ɔ kɛ ho Betel ya.

⁵ Osɔfohi nɛ Yuda matsɛmɛ ɔmɛ wo nɛ a sãã tsopa kɛ e he via ngɛ jami he ɔmɛ, ngɛ Yuda ma amɛ a mi, kɛ hehi nɛ bɔle Yerusalem kɛ kpe ɔ, Yosia kpa mɛ tsuo pɛpɛɛpɛ. Ni nɛmɛ nɛ sãã tsopa kɛ e he via kɛ haa Baal, pu, hlami, huɛhi, kɛ dodoehi hu e pee mɛ ja nɔuu.

⁶ E je amaga a nɛ a puɛ ngɔ ha yo mawu ɔ nɛ a tsɛɛ Ashera a kɛ je Yawɛ we ɔ, nɛ e ya sã lɛ ngɛ Kidron kɔ̃ ɔ mi ngɛ Yerusalem ma a nya. E wɛɛ jakati ɔ nɛ piɛ ɔ bukɔbukɔ kaa la zu, nɛ e ngɔ kɛ ya fĩa gɔ ɔ mi.

⁷ E ywia ajuama amɛ a hi he ɔmɛ ngɛ Yawɛ we ɔ. Tade klɔii ɔmɛ nɛ a woɔ kɛ jaa Ashera a, lejɛ ɔ ji he nɛ yi ɔmɛ loɔ ngɛ.

⁸ E ya ngɔ osɔfo ɔmɛ tsuo kɛ je Yuda ma amɛ a mi kɛ ba Yerusalem, nɛ a ba ble jami he ɔmɛ, hehi nɛ a sãã tsopa kɛ e he via ngɛ ɔ, kɛ je Geba kɛ ya si Beersheba. Jehanɛ, e gbɛ jami hehi nɛ ngɛ Yoshua nɛ ye amlaalo ngɛ Yerusalem ɔ e we ɔ agbo ɔ nya a.

⁹ Jamɛ a osɔfo ɔmɛ lɛɛ a ba sɔmɔ we ngɛ Yawɛ bɔ sami la tɛ ɔ he ngɛ Yerusalem, se kɛ̃ ɔ, a kɛ a nyɛmimɛ osɔfo ɔmɛ yeɔ abolo kplolo ɔ.

¹⁰ Jehanɛ se hu, Matsɛ Yosia ya ble Tofet, nɛ ji jami he ɔ nɛ ngɛ Hinom kɔ̃ ɔ mi ɔ, bɔ nɛ pee nɛ nɔ ko nɛ ko ya sã e binyumu, loo e biyo bɔ kɛ ha Molek ngɛ lejɛ ɔ hu.

¹¹ Jehanɛ, okpɔngɔhi nɛ Yuda matsɛmɛ ɔmɛ hla ngɔ to kɛ ha pu jami ɔ, e je mɛ kɛ je Yawɛ we ɔ agbo ɔ nya; nɛ e sã zugba lɛhi nɛ a kɛ jaa kikɛmɛ a jami nɛ ɔ. A toɔ ní nɛ ɔmɛ ngɛ Yawɛ we ɔ agbo ɔ nya, ngɛ tsɔlɔ nɔkɔtɔma Natan Melek we ɔ kasa nya.

¹² Bɔ sami la tɛhi nɛ Yuda matsɛmɛ ɔmɛ puɛ ngɔ ma Ahaz hiɔwe tsu ɔ yi mi, kɛ bɔ sami la tɛhi nɛ Manase puɛ ngɔ ma kue enyɔ ɔmɛ a mi ngɛ Yawɛ we ɔ, Matsɛ Yosia ku mɛ dukuduku ngɔ pue si; nɛ e muɔ zu ɔ ya wo Kidron kɔ̃ ɔ mi.

¹³ Yosia ble bɔ sami la tɛhi nɛ Matsɛ Salomo puɛ ngɛ Yerusalem beleku je kɛ yaa Oliv yo ɔ leneyi je kɛ ha yakayaka amaga nɛ ɔmɛ ɔ: Sidon bi ɔmɛ a yo mawu ɔ nɛ a tsɛɛ Astarte ɔ, Moab bi ɔmɛ a mawu ɔ nɛ a tsɛɛ Kemosh ɔ, kɛ Amon bi ɔmɛ a mawu ɔ nɛ a tsɛɛ Milkom ɔ.

¹⁴ Matsɛ Yosia ywia tɛ titimahi, kɛ amagahi nɛ a puɛ ha yo mawu Ashera a dukuduku; nɛ e ya muɔ nimli a wuhi kɛ ba pue a ma he ɔmɛ.

¹⁵ Jehanɛ, bɔ sami la tɛ ɔ nɛ ngɛ Betel ɔ, kɛ jami he ɔ nɛ Nebat binyumu Yeroboam nɛ ha Israel pee yayami ɔ ma a, Yosia ku jamɛ a bɔ sami la tɛ ɔ; e mɛ jami he ɔ he la, nɛ e ywia tɛ ɔmɛ dukuduku. Amaga a nɛ a puɛ kɛ ha Ashera a hu e mɛ he la.

¹⁶ Jehanɛ, Yosia plɛ e he, nɛ e na yɔkɔ komɛ ngɛ yoku ɔ nɔ ngɛ lejɛ ɔ. E ha a ya muɔ wuhi ngɛ yɔkɔ ɔmɛ a mi, nɛ a ba sã ngɛ bɔ sami la tɛ ɔ nɔ. E pee nɔ́ nɛ ɔ kɛ ble bɔ sami la tɛ ɔ ngɛ Yawɛ munyu ɔ nya kaa bɔ nɛ Mawu nɔmlɔ ɔ gba kɛ to benɛ Matsɛ Yeroboam daa si ngɛ bɔ sami la tɛ ɔ he jamɛ a nyami ligbi ɔ. Benɛ Matsɛ Yosia hɛ gba Mawu nɔmlɔ ɔ nɛ gba ní nɛ ɔmɛ kɛ to ɔ e yɔkɔ ɔ nɔ ɔ, e bi ke,

¹⁷ “Mɛnɔ yɔkɔ i ngɛ hyɛe ngɛ lejɛ ɔ?” Betel ma mi bi ɔmɛ he nɔ ke, “Mawu nɔmlɔ ɔ nɛ je Yuda a e yɔkɔ ji lɔ ɔ nɛ. Lɛ ji nɔ nɛ gba ní nɛ ɔmɛ nɛ o pee bɔ sami la tɛ nɛ ɔ ngɔ to ɔ nɛ.”

¹⁸ Yosia fa mɛ ke, “Nyɛ ha nɛ e hi si; nɔ ko nɛ ko ta e wu ɔmɛ a he.” Lɔ ɔ he ɔ, a si e kɛ gbalɔ ɔ nɛ je Samaria a a wu ɔmɛ ngɛ lejɛ ɔ.

¹⁹ Janu gegu nɛ Israel matsɛmɛ ɔmɛ ma ngɛ Samaria ma amɛ a mi nɛ a kɛ wo Yawɛ mi mi la a, Yosia gbɛ mɛ tsuo, nɛ e pee bɔ sami la tɛhi ngɛ lejɛ ɔ kaa bɔ nɛ e pee Betel nɔ́ ɔ pɛpɛɛpɛ.

²⁰ E gbe osɔfo ɔmɛ tsuo nɛ ngɛ lejɛ ɔ ngɛ bɔ sami la tɛ ɔmɛ a nɔ he nɛ a jaa ngɛ ɔ, nɛ e sã nimli a wuhi ngɛ bɔ sami la tɛ tsuaa bɔ sami la tɛ nɔ. Enɛ ɔ se ɔ, e kpale kɛ ho Yerusalem ya.

Yosia ye Hetsɔmi ɔ

²¹ Matsɛ Yosia fa ma a tsuo ke, “Nyɛɛ ye Hetsɔmi ɔ nɛ nyɛ kɛ wo Yawɛ, nyɛ Mawu ɔ hɛ mi nyami kaa bɔ nɛ a ngma ngɛ mlaa womi nɛ ɔ mi ɔ.”

²² A yi Hetsɔmi nyami be ko nɛ sɔ kaa kikɛ nɛ ɔ hyɛ kɛ je be nɛ ma nya dali ɔmɛ ba hyɛ Israel ma a nɔ ɔ. Jehanɛ, Israel matsɛmɛ ɔmɛ, kɛ Yuda matsɛmɛ ɔmɛ a be ɔmɛ a mi hu, a yi Hetsɔmi nyami ligbi ko hyɛ nɛ sɔ kaa enɛ ɔ.

²³ Se Matsɛ Yosia yi nɔ jeha nɛ ji nyɔngma kɛ kpaanyɔ ɔ mi ɔ, a ye Hetsɔmi nɛ ɔ ngɛ Yerusalem kɛ wo Yawɛ hɛ mi nyami.

Tsakemi kpahi nɛ Yosia pee

²⁴ Jehanɛ se hu, Matsɛ Yosia gu kpade tsɛmi, klaami, amagahi nɛ a kpɛ́, wɔhi, kɛ níhi nɛ a hiee tsuo a jami ngɛ Yerusalem kɛ Yuda ma kpa amɛ a mi. E pee nɔ́ nɛ ɔ, bɔ nɛ pee nɛ mlaa amɛ nɛ a ngma ngɛ womi ɔ nɛ osɔfo Hilkia ya na ngɛ Yawɛ we ɔ, ma a nɛ a ye nɔ.

²⁵ Bɔ nɛ Yosia sɔmɔ Yawɛ kɛ e tsui tsuo, kɛ e klaa tsuo, kɛ e he wami tsuo, nɛ e ye Mose mlaa amɛ tsuo a nɔ ɔ, matsɛmɛ ɔmɛ nɛ sɛ e hlami, kɛ ni nɛmɛ nɛ nyɛɛ e se ɔ, a ti nɔ ko kɛ lɛ sɔɛ.

²⁶ Se kɛ̃ ɔ, Yawɛ mi mi fu Yuda wawɛɛ nitsɛ ngɛ níhi nɛ Manase pee ɔ a he; nɛ kɛ ba si jamɛ a be ɔ, e mi mi fumi ɔ nya bɛ si.

²⁷ Yawɛ de ke, “Ma kpata Yuda hɛ mi kaa bɔ nɛ i pee Israel ɔ; nɛ ma kua Yerusalem, ma nɛ i hla a, kɛ we ɔ nɛ i de ke lejɛ ɔ ji he nɛ i to nɛ a ja mi ngɛ ɔ.”

Yosia matsɛ yemi ɔ nyagbe

²⁸ Yosia he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

²⁹ Benɛ Yosia ngɛ tsɛ yee ɔ, Egipt matsɛ, Neko hia ta ya je ngmlaa ha Asiria matsɛ ngɛ Yufrate pa a nya. Matsɛ Yosia hia ta nɛ e kɛ Egipt bi ɔmɛ ya bua ngɛ Megido; nɛ e ba mi kaa Matsɛ Neko gbe lɛ ngɛ ta mi ngɛ lejɛ ɔ.

³⁰ E tsɔli ɔmɛ kɛ e gbogboe ɔ wo ta zugba lɛ mi, nɛ a ya pu lɛ ngɛ matsɛmɛ ɔmɛ a yɔkɔ ɔ mi ngɛ Yerusalem. Lɔ ɔ se ɔ, Yuda ma a hla Yosia binyumu Yoahaz, nɛ a pɔ lɛ nu nɛ a wo lɛ matsɛ ngɛ e tsɛ ɔ se.

Yuda matsɛ, Yoahaz

³¹ Yoahaz ye jeha nyingmi enyɔ kɛ etɛ benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ nyɔhiɔ etɛ. E nyɛ biɛ ji Hamutal. Yeremia nɛ je Libna a biyo ji lɛ.

³² E ya wo e nɛmɛ ɔmɛ a nane, nɛ e pee yayami kɛ si Yawɛ.

³³ Egipt matsɛ, Neko wo lɛ tsu ngɛ Ribla, ngɛ Hamat zugba a nɔ, nɛ e tsu tó sika hiɔ kilo akpe etɛ kɛ e nya lafa eywiɛ, kɛ sika tsu kilo nyingmi etɛ kɛ eywiɛ ngɛ Yuda dɛ. Nɔ́ nɛ ɔ ha nɛ Yoahaz matsɛ yemi ɔ se po.

³⁴ Matsɛ Neko wo Yosia binyumu Eliakim matsɛ ngɛ Yosia nane mi, nɛ e tsake e biɛ kɛ pee Yehoyakim. Matsɛ Neko ngɔ Yoahaz kɛ ho Egipt ya, nɛ e ya gbo ngɛ lejɛ ɔ.

Yuda matsɛ, Yehoyakim

³⁵ Matsɛ Yehoyakim tsu sika hiɔ kɛ sika tsu ngɛ ma a dɛ kɛ ha Egipt matsɛ ɔ kaa bɔ nɛ e fa lɛ ɔ. E gba tó nɛ ɔ tsumi kɛ ha ma a tsuo, nɛ e he sika a ngɛ a dɛ kaa bɔ nɛ a po ha nɔ tsuaa nɔ ke e wo ɔ.

³⁶ Yehoyakim ye jeha nyingmi enyɔ kɛ enuɔ benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyɔngma kɛ kake. E nyɛ biɛ ji Zebida. Pedaya nɛ je Ruma a biyo ji lɛ.

³⁷ Yehoyakim ya wo e nɛmɛ ɔmɛ a nane, nɛ e pee yayami kɛ si Yawɛ.