Matsɛmɛ II, 21 - BAIBLO ALOO NGMAMI KLƆUKLƆU Ɔ

Yuda matsɛ, Manase

¹ Manase ye jeha nyɔngma kɛ enyɔ benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyingmi enuɔ kɛ enuɔ. A tsɛɛ e nyɛ biɛ ke Hefziba.

² Je ma amɛ nɛ Yawɛ fie kɛ je Israel bi ɔmɛ a blɔ mi ɔ, Manase ya nyɛɛ a ní yayami ɔmɛ a se, nɛ e pee yayami kɛ si Yawɛ.

³ Jami hehi nɛ e tsɛ Hezekia gbɛ ɔ, e kpale dla mɛ ekohu. E ma bɔ sami la tɛhi kɛ ha Baal, nɛ e puɛ amaga kɛ ha yo mawu ɔ nɛ a tsɛɛ Ashera a kaa bɔ nɛ Israel matsɛ, Ahab pee ɔ. E ja dodoehi hulɔ.

⁴ Yawɛ we ɔ ngɛ Yerusalem, he nɛ Yawɛ ke a ja lɛ pɛ ngɛ ɔ, Manase puɛ bɔ sami la tɛhi ngɛ lejɛ ɔ.

⁵ Jehanɛ, e puɛ bɔ sami la tɛhi ngɔ ma kue enyɔ ɔmɛ nɛ ngɛ Yawɛ we ɔ a mi, konɛ a ja dodoehi ngɛ lejɛ ɔmɛ.

⁶ E ngɔ e binyumu kɛ sã sami bɔ; e kla, nɛ e tsu kunya, nɛ e kɛ kpade tsɛli, kɛ azetsɛmɛ bɔ. E pee yayamihi babauu kɛ si Yawɛ, nɛ e kɛ wo e mi mi la.

⁷ Ashera amaga a nɛ e pee ɔ, e ngɔ ya ma Yawɛ we ɔ. Yawɛ kɛ David, kɛ e binyumu Salomo tu we nɛ ɔ he munyu hyɛ, nɛ e de ke, “I hla we nɛ ɔ ngɛ Yerusalem kɛ je Israel wɛtso ɔmɛ tsuo a kpɛti ngɔ to kaa he nɛ sa nɛ a ja mi ngɛ daa.

⁸ Lɔ ɔ he ɔ, ke Israel bi ɔmɛ maa pee nɔ́ tsuaa nɔ́ nɛ i fa mɛ ke a pee ɔ, nɛ a maa ye mlaa amɛ tsuo nɛ ye tsɔlɔ Mose wo mɛ ɔ a nɔ ɔ, i be hae nɛ a fie mɛ kɛ je zugba a nɛ i ngɔ kɛ ha a nɛmɛ ɔmɛ ɔ nɔ, nɛ́ a kpale ya wo lalaalo hu.”

⁹ Se Yuda ma a bui Yawɛ tue, nɛ Manase mlɔɔ mɛ nɛ a ya pee yayami nɛ kle kulaa pe yayami nɛ je ma amɛ pee loko Yawɛ kpata a hɛ mi kɛ je Israel bi ɔmɛ a blɔ mi ɔ po.

¹⁰ Yawɛ tu munyu kɛ gu e tsɔli nɛ ji gbali ɔmɛ a nɔ, nɛ e de ke,

¹¹ “Yuda matsɛ, Manase tsu musu ní; e pee yayami nɛ nya wa kulaa pe níhi tsuo nɛ Kanaan bi ɔmɛ pee ɔ. Jehanɛ se hu, e ha nɛ Yuda ya ja amaga, nɛ a pee yayami.

¹² Lɔ ɔ he ɔ, imi Yawɛ, Israel Mawu ɔ, i kɛ amanehlu agbo ko maa ba Yerusalem kɛ Yuda a nɔ, nɛ nɔ tsuaa nɔ nɛ maa nu he ɔ, e he mi maa po.

¹³ Bɔ nɛ i gbla Samaria, kɛ Israel matsɛ, Ahab kɛ e we ɔ a tue ɔ, ja nɔuu ma pee Yerusalem. Ma ha nɛ a maa muɔ nimli ɔmɛ tsuo kɛ je Yerusalem, nɛ Yerusalem ma a maa pee falifali kaa kã nɛ a fɔ mi nɛ a plɛ ngɔ bu si.

¹⁴ Ma a nɛ piɛ ɔ, ma kua mɛ, nɛ ma ngɔ mɛ kɛ wo a he nyɛli a dɛ mi. A maa ye a nɔ nɛ a maa ha a níhi;

¹⁵ ejakaa a pee yayami kɛ si mi, nɛ a wo ye mi mi la kɛ je be mi nɛ a nɛmɛ ɔmɛ je Egipt ɔ hluu kɛ ba si mwɔnɛ ɔ.”

¹⁶ Ngɛ yayamihi nɛ Manase ha nɛ Yuda pee kɛ si Yawɛ ɔ se ɔ, e pue nihi babauu nitsɛ nɛ pee we nɔ́ ko a muɔ si; nɛ Yerusalem he tsuaa he hyi kɛ muɔ.

¹⁷ Manase he sane kpahi nɛ piɛ, níhi tsuo nɛ e tsu, kɛ yayami nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

¹⁸ Manase ba gbo, nɛ a pu lɛ ngɛ Uza abɔɔ ɔ mi ngɛ matsɛ we ɔ; nɛ e binyumu Amon ba ye matsɛ ngɛ e se.

Yuda matsɛ, Amon

¹⁹ Amon ye jeha nyingmi enyɔ kɛ enyɔ benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha enyɔ. E nyɛ ji Meshulemet, Haruz nɛ je Yotba biyo ɔ.

²⁰ Amon pee yayami kɛ si Yawɛ kaa bɔ nɛ e tsɛ Manase pee ɔ.

²¹ E ya wo e tsɛ nane ngɛ nɔ́ tsuaa nɔ́ mi, nɛ e ja amagahi nɛ e tsɛ ja a.

²² E kua Yawɛ, e nɛmɛ a Mawu ɔ, nɛ e yi Yawɛ mlaa amɛ a nɔ.

²³ Matsɛ Amon tsɔli ɔmɛ so e yi nɔ nɛ a gbe lɛ ngɛ e we ɔ mi.

²⁴ Se nihi nɛ so Matsɛ Amon yi nɔ nɛ a gbe lɛ ɔ, Yuda bi ɔmɛ gbe mɛ tsuo, nɛ a wo e binyumu Yosia matsɛ ngɛ e se.

²⁵ Ní kpahi tsuo nɛ Amon pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

²⁶ A pu Amon ngɛ e yɔkɔ ɔ mi ngɛ Uza abɔɔ ɔ mi; nɛ e binyumu Yosia ba ye matsɛ ngɛ e se.