Matsɛmɛ II, 2 - BAIBLO ALOO NGMAMI KLƆUKLƆU Ɔ

A ngɔ Eliya kɛ ho hiɔwe ya

¹ Benɛ e piɛ bɔɔ nɛ Yawɛ maa ngɔ Eliya kɛ ho hiɔwe ya ngɛ lasiogblee mi ɔ, jamɛ a be ɔ, Eliya kɛ Elisha ngɛ nyɛɛe kɛ je Gilgal.

² Ngɛ blɔ ɔ nɔ ɔ, Eliya de Elisha ke, “Yawɛ tsɔ mi Betel; lɔ ɔ he ɔ, i kpa mo pɛɛ nɛ o mlɛ mi ngɛ hiɛ ɔ.” Se Elisha de lɛ ke, “I na Mawu, nɛ i na mo nitsɛ o nane kaa i be o he jee.” Lɔ ɔ he ɔ, mɛ ni enyɔ ɔmɛ a pue nɔ kɛ ho Betel ya.

³ Kɛkɛ nɛ gbali a kuu ɔ nɛ ngɛ Betel ɔ ba Elisha ngɔ, nɛ a ba bi lɛ ke, “Anɛ o le kaa mwɔnɛ ligbi nɛ ɔ, Yawɛ maa ngɔ o nyɔmtsɛ ɔ kɛ je o he lo?” Elisha he nɔ ke, “Ee, i le; nyɛ ma nyɛ nya!”

⁴ Eliya de Elisha ke, “Yawɛ tsɔ mi Yeriko; lɔ ɔ he ɔ, i kpa mo pɛɛ nɛ o mlɛ mi ngɛ hiɛ ɔ.” Se Elisha de lɛ ke, “I na Mawu, nɛ i na mo nitsɛ o nane kaa i be o he jee.” Lɔ ɔ he ɔ, mɛ ni enyɔ ɔmɛ a pue nɔ kɛ ho Yeriko ya.

⁵ Kɛkɛ nɛ gbali a kuu ɔ nɛ ngɛ Yeriko ɔ ba Elisha ngɔ, nɛ a ba bi lɛ ke, “Anɛ o le kaa mwɔnɛ ligbi nɛ ɔ, Yawɛ maa ngɔ o nyɔmtsɛ ɔ kɛ je o he lo?” Elisha he nɔ ke, “Ee, i le; nyɛ ma nyɛ nya!”

⁶ Eliya de Elisha ekohu ke, “Yawɛ tsɔ mi Yordan pa a nya; lɔ ɔ he ɔ, i kpa mo pɛɛ nɛ o mlɛ mi ngɛ hiɛ ɔ.” Se Elisha de lɛ ke, “I na Mawu, nɛ i na mo nitsɛ o nane kaa i be o he jee.” Lɔ ɔ he ɔ, mɛ ni enyɔ ɔmɛ tsuo a pue nɔ kɛ ho Yordan pa a nya ya,

⁷ nɛ gbali a kuu ɔ mi nihi nyingmi enuɔ nyɛɛ a se. Eliya kɛ Elisha ya da si ngɛ Yordan pa a nya, nɛ gbali nyingmi enuɔ ɔmɛ hu ho ya da si ngɛ a se, nɛ blɔ bɔɔ ngɛ a kpɛti.

⁸ Kɛkɛ nɛ Eliya je e tade ɔ, nɛ e koklo lɛ, nɛ e kɛ fia nyu ɔ mi. Nyu ɔ mi gba kɛ ya hiɛ kɛ hiɛ; nɛ mɛ ni enyɔ ɔmɛ tsuo a nyɛɛ zugba gbigbli nɔ kɛ be.

⁹ Benɛ a po pa a, Eliya bi Elisha ke, “Mɛni o suɔ nɛ ma pee ha mo loko a ba ngɔ mi kɛ je o he?” Elisha he nɔ ke, “I kpa mo pɛɛ, ha mi o mumi he wami ɔ totoe enyɔ.”

¹⁰ Eliya de lɛ ke, “O bi nɔ ko nɛ he wa; se kɛ̃ ɔ, ke o na nɛ a ngɔ mi kɛ je o ngɔ kɛ yaa a, nɔ́ nɛ o bi ɔ maa ba mi ha mo. Se ke o nɛ mi ɔ, lɛɛ e be mi bae.”

¹¹ Benɛ a ngɛ ní sɛɛe kɛ yaa a, ta zugba lɛ nɛ la okpɔngɔhi ngɛ gblae ba gba mɛ ni enyɔ ɔmɛ a kpɛti; nɛ lasiogblee sá Eliya kɛ ho hiɔwe ya.

¹² Benɛ Elisha na nɔ́ nɛ ɔ, e kpa ngmlaa nɛ e de ke, “Tsaatsɛ! Tsaatsɛ! Israel ta zugba lɛhi kɛ a we okpɔngɔ ta buli!” Nɛ e nɛ lɛ hu. Lɔ ɔ se ɔ, Elisha gba lɛ nitsɛ e tade ɔmɛ a mi enyɔ.

¹³ E ngɔ Eliya tade ɔ nɛ je e he nɔ si ɔ, nɛ e kpale ya da si ngɛ Yordan pa a tue.

¹⁴ E kɛ Eliya tade ɔ fia nyu ɔ mi, nɛ e bi ke, “Jije Yawɛ, Eliya Mawu ɔ ngɛ?” E ngɔ tade ɔ kɛ fia nyu ɔ mi ekohu, nɛ nyu ɔ mi gba kɛ ya hiɛ kɛ hiɛ; nɛ e nyɛɛ kɛ be.

¹⁵ Benɛ gbali a kuu ɔ nɛ ngɛ Yeriko ɔ na lɛ ɔ, a de ke, “Eliya mumi ɔ ba Elisha nɔ.” A ya nɛ a ya kpee lɛ, nɛ a kpla si ngɛ e hɛ mi;

¹⁶ nɛ a de lɛ ke, “Hyɛ, nyumuhi katsɛmɛ nyingmi enuɔ sɔuu ji wɔ ngɛ hiɛ ɔ. Wa kpa mo pɛɛ, ha nɛ waa ya nɛ wa ya hla o nyɔmtsɛ ɔ, kaa alini Yawɛ mumi ɔ nu lɛ nɛ e ya sake lɛ ngɔ fɔ yo ko nɔ, aloo kɔ́ ko mi lo.” Elisha he nɔ ke, “Dɛbi, nyɛ ko ya!”

¹⁷ Se a hao lɛ hluu kɛ ya si nɔ́ ɔ ba pee lɛ ahuto, nɛ e de mɛ ke, “Yoo, nyɛɛ tsɔ kɛ ya!” Lɔ ɔ he ɔ, mɛ nyumuhi nyingmi enuɔ ɔmɛ a ho ya hla Eliya ligbi etɛ sɔuu; se a nɛ lɛ.

¹⁸ Kɛkɛ nɛ a kpale a se kɛ ba Elisha ngɔ ngɛ Yeriko, he nɛ e hii si ngɛ mɛ mlɛe ngɛ ɔ. Nɛ e de mɛ ke, “Anɛ i de we nyɛ ke nyɛ ko ya lo?”

Nyakpɛ ní komɛ nɛ Elisha pee

¹⁹ Ligbi ko ɔ, Yeriko ma mi bi ɔmɛ ba de Elisha ke, “Wa nyɔmtsɛ! Kaa bɔ nɛ o le ɔ, wa ma nɛ ɔ ngɛ fɛu saminya. Se mohu ɔ, wa nyu ɔ hí; e haa yihi a mi saneɔ.”

²⁰ Elisha de mɛ ke, “Nyɛɛ ngɔ ngo kɛ wo ka ehe mi nɛ nyɛ kɛ ba ha mi.” A ngɔ ba ha lɛ,

²¹ nɛ e je kpo kɛ ho he nɛ nyu ɔ jeɔ kɛ baa a ya, nɛ e ya plɛ ngo ɔ ngɔ pue pa a mi. E de ke, “Bɔ nɛ Yawɛ de ji nɛ ɔ nɛ: ‘I tsukɔ nyu nɛ ɔ he; kɛ je mwɔnɛ ɔ kɛ yaa a, gbenɔ, aloo mi sanemi ko be mi jee kɛ ba hu.’ ”

²² Nɛ kɛ je jamɛ a ligbi ɔ kɛ ba si mwɔnɛ ɔ, nyu ɔ tsake pee kaa bɔ nɛ Elisha de ɔ pɛpɛɛpɛ.

²³ Elisha je Yeriko kɛ ho Betel ya. Benɛ e ngɛ blɔ ɔ nɔ kɛ yaa a, jokuɛwi nyumuwi komɛ je ma a mi ba ye e he fɛu. A ye e he fɛu, nɛ a de ke, “Yi kpɛti kpalokpalotsɛ, moo kuɔ kɛ ba!”

²⁴ Elisha plɛ hyɛ mɛ, nɛ e tsɛ Yawɛ biɛ kɛ gbiɛ mɛ. Kɛkɛ nɛ osisiblisi eyo enyɔ je nga mi kɛ ba, nɛ a ba tsɔtslɔɔ jokuɛwi nyumuwi ɔmɛ a kpɛti nimli nyingmi eywiɛ kɛ enyɔ a mi.

²⁵ Benɛ Elisha je lejɛ ɔ, e pue nɔ kɛ ho Karmel yo ɔ nɔ ya. Pee se ɔ, e kpale e se kɛ ba Samaria.