Matsɛmɛ II, 19 - BAIBLO ALOO NGMAMI KLƆUKLƆU Ɔ

Matsɛ Hezekia ya bi Yesaya ga womi

¹ Benɛ Matsɛ Hezekia nu amaniɛ ɔ, e kɛ aywilɛho hía e tade ɔmɛ. E bu kpekpe ya bo, nɛ e ho Yawɛ we ɔ mi ya.

² E tsɔ Eliakim, matsɛ we ɔ nɔ hyɛlɔ ɔ, kɛ Shebna, matsɛ pɛdiyo ɔ, kɛ osɔfo nikɔtɔma amɛ kɛ ya gbalɔ Yesaya, Amoz binyumu ɔ ngɔ. Mɛ hu a bu kpekpe ya bo.

³ Sɛ gbi nɛ e ngɔ ha mɛ ke a ya ha Yesaya ji nɛ ɔ nɛ: “Mwɔnɛ ligbi nɛ ɔ, wa yi fi; a jɛ wɔ, nɛ a pue wa hɛ mi si. Wa pee kaa yo nɛ nu kɔɔmi, se e be he wami nɛ e kɛ maa kɛ̃ bi ɔ kɛ je kpo.

⁴ Asiria matsɛ ɔ tsɔ e we asafoatsɛngua a kɛ ba jɛ Mawu hɛ kalɔ ɔ. Wa heɔ yeɔ kaa Yawɛ, o Mawu ɔ nu jɛmi munyu ɔmɛ, nɛ e maa gbla nihi nɛ tu munyu ɔmɛ a tue. Lɔ ɔ he ɔ, moo fa kue ha Yawɛ kɛ ha wa ti ni nɛmɛ nɛ piɛ ngɛ hiɛ ɔ.”

⁵ Benɛ Matsɛ Hezekia tsɔli ɔmɛ kɛ sɛ ɔ ya ha Yesaya a,

⁶ lɛ hu e sɛ mɛ ke a ya de a nyɔmtsɛ ɔ ke, “Yawɛ ke o ko ha nɛ munyu ɔ nɛ Asiria matsɛ ɔ tsɔli ɔmɛ ba tu kɛ si mi ɔ nɛ wo o he gbeye.

⁷ Yawɛ ma ha nɛ Asiria matsɛ ɔ maa nu akeake munyu ko, nɛ nɔ́ nɛ ɔ ma ha nɛ e kpale e se kɛ ho lɛ nitsɛ e ma mi ya, nɛ Yawɛ ma ha nɛ a gbe lɛ ngɛ lejɛ ɔ.”

Asiria bi ɔmɛ tsɔ kɛ ba ekohu

⁸ Asiria asafoatsɛngua a nu kaa Asiria matsɛ ɔ hia kɛ je Lakish nɛ e kɛ Libna bi ya ngɛ ta hwue. Lɔ ɔ he ɔ, e ho nɛ e ya ná lɛ ngɛ lejɛ ɔ.

⁹ Kɛkɛ nɛ gbi ko ba su Asiria matsɛ ɔ kaa Sudan matsɛ, Tirhaka hia ta kɛ nyɛɛ Egipt tabo ɔ hɛ mi kɛ ma nɛ e ba tua lɛ. Benɛ Asiria matsɛ ɔ nu sane nɛ ɔ, e ngma womi nɛ e tsɔ kɛ ya ha Yuda matsɛ, Hezekia.

¹⁰ Bɔ nɛ e ngma ngɛ womi ɔ mi ji nɛ ɔ nɛ: “Ko ha nɛ o Mawu ɔ nɛ o ngɔ o hɛ ngɔ fɔ e nɔ ɔ nɛ mlɔɔ mo ke i be nyɛe ma ngɔ Yerusalem.

¹¹ Mo nitsɛ o nu níhi nɛ Asiria matsɛmɛ ɔmɛ pee zugba amɛ, bɔ nɛ a kpata a hɛ mi butuu. Nɛ moo lɛɛ o susuɔ kaa o maa ye o he lo?

¹² Benɛ nɛnɛmɛ kpata Gozan, Haran, kɛ Rezef ma amɛ a hɛ mi, nɛ a gbe Beteden bi nɛ ngɛ Telasar a, anɛ a mawu ɔmɛ nyɛ a yi wami he lo?

¹³ Jije Hamat, Arpad, Sefarvaim, Hena, kɛ Iva matsɛmɛ ɔmɛ ngɛ?”

¹⁴ Hezekia he womi ɔ ngɛ tsɔli ɔmɛ a dɛ nɛ e kane. Lɔ ɔ se ɔ, e ho Yawɛ we ɔ mi ya nɛ e ya bli womi ɔ mi ngɛ Yawɛ hɛ mi,

¹⁵ nɛ e fa kue ha Yawɛ ke, “Yawɛ, Israel Mawu lee, mo nɛ o hii si ngɛ o matsɛ sɛ ɔ nɔ ngɛ kerub ɔmɛ a yi mi lokoo. Mo nɔ kake too ji Mawu, nɛ je nɛ ɔ mi matsɛ yemi ɔmɛ tsuo ngɛ o sisi. Mo lɛ o bɔ hiɔwe kɛ zugba.

¹⁶ Yawɛ, mo bli o hɛngmɛ nɛ o hyɛ nɔ́ nɛ a ngɛ wɔ pee! Yawɛ, mo ta tue nɛ o nu munyuhi nɛ Senakerib ngɛ tue kɛ ngɛ mo Mawu hɛ kalɔ ɔ, o he guɛ gbee!

¹⁷ Yawɛ, wɔ tsuo wa le kaa Asiria matsɛmɛ ɔmɛ kpata je mahi, kɛ a zugbahi babauu a hɛ mi,

¹⁸ nɛ a sã a mawu ɔmɛ. A kpata a hɛ mi, ejakaa tsa pi mawu nitsɛnitsɛhi ji mɛ; nimlihi a nine nya ní tsumihi, kɛ tsohi kɛ tɛhi kɛkɛ ji mɛ.

¹⁹ Lɔ ɔ he ɔ, Yawɛ, wa Mawu, i kpa mo pɛɛ nɛ o kpɔ wɔ kɛ je Asiria matsɛ ɔ dɛ mi, konɛ je ma amɛ tsuo pɛpɛɛpɛ nɛ a le kaa mo Yawɛ, mo nɔ kake too ji Mawu.”

Yesaya kɛ sɛ gbi mane Matsɛ Hezekia

²⁰ Kɛkɛ nɛ Amoz binyumu Yesaya tsɔ ke a ya de Hezekia ke, “Yawɛ, Israel Mawu ɔ ke, kue nɛ o fa ha lɛ ngɛ Asiria matsɛ, Senakerib he ɔ, e nu.

²¹ Nɔ́ nɛ Yawɛ ngɛ Asiria matsɛ ɔ dee ji nɛ ɔ nɛ: Asiria matsɛ, Zion biyo yomiyo ɔ ngɛ mo muɔe oo! E ngɛ o he fɛu yee. Yerusalem biyo ɔ ngɛ e yi mimiɛe ngɛ o se.

²² Mɛnɔ he fɛu o ye ɔ? Mɛnɔ ahlua o bɔ ɔ? Mɛnɔ nɔ nɛ o wo nya nɔ ngɛ ɔ? Mɛnɔ o bui ɔ? Pi Israel Mawu klɔuklɔu ɔ lo?

²³ O tsɔ o tsɔli kɛ ba ye Yawɛ he fɛu nɛ o de ke, ‘I ngɔ ye ta zugba lɛhi babauu kɛ kuɔ yoku ɔmɛ kɛ ya su Lebanon tɔɔ. I poo Lebanon seda tso gagaá amɛ, kɛ sɛsɛo saminyawiiwi ɔmɛ ngɔ pue si. I sɛ Lebanon hue kusuu ɔ mi kɛ ya tsitsaa lokoo.

²⁴ I tsua vuhi, nɛ i nu ma se zugba nɔ nyu; i ngɔ ye nane sisi kɛ hlui Egipt pa amɛ tsuo a mi nyu ngɔ pue he.’

²⁵ Anɛ o nui kaa i bɔni nɔ́ nɛ ɔ he ní tsumi kɛ je kɛ lo? Nɔ́ nɛ i ngɛ pee nɛ ɔ, i to he ga kɛ je blema lokoo, konɛ mahi nɛ a fia gbogbo ngɔ wo a he ɔ, nyɛɛ pee mɛ ma dokuhi.

²⁶ Nimli nɛ ngɛ ma amɛ a mi ɔ lɛɛ a he wami nɔ gbɔ. A tsui po, nɛ gbigbi gbe mɛ; a pee kaa nga mumu; a pee kaa nga nɔ tsohi, loo nga nɛ pu sãã lɛ nɛ e ngla ngɛ tsu yi kpɛti.

²⁷ I le o he nɔ́ tsuaa nɔ́; o kpo jemi kɛ o mi bami, kɛ bɔ nɛ o kɛ mi tuɔ munyu basabasa.

²⁸ Akɛnɛ o kɛ mi tuɔ munyu basabasa, nɛ i nu o he nɔ womi hu he he je ɔ, ma ngɔ gbowe kɛ wo o gugwɔ mi, ma wo o nya mi dade; nɛ ma kpale mo kɛ maa gu blɔ nɛ o gu nɔ kɛ ba a nɔ.”

²⁹ Jehanɛ, Yesaya de Matsɛ Hezekia ke, “Enɛ ɔ maa pee okadi ha mo: jeha nɛ ɔ mi ɔ, nyɛ maa ye níhi nɛ mɛ nitsɛmɛ a puɛ, níhi nɛ nɔ ko du we. Jeha enyɔne ɔ mi ɔ, nyɛ maa ye níhi nɛ puɛ ngɛ lɔ ɔmɛ a se. Jeha nɛ ji etɛ ɔ mi ɔ lɛɛ nyɛ ma du ní nɛ nyɛ ma kpa ní; nyɛ maa pee wai ngmɔhi nɛ nyɛ maa ye a yiblii ɔmɛ.

³⁰ Yuda we ɔ, ni nɛmɛ nɛ a yi ma na wami ɔ, a ma plɔke kaa tsohi; a ma tsɛ̃ sipoku kɛ ya zu mi ekohu, nɛ a maa wo yiblii.

³¹ Ni komɛ maa piɛ kɛ̃, nɛ a maa je Yerusalem kɛ Zion yo ɔmɛ a nɔ kɛ ba; ejakaa Yawɛ ma tsu nɔ́ nɛ ɔ kɛ hɛdɔ.

³² “Lɔ ɔ he ɔ, bɔ nɛ Yawɛ de ngɛ Asiria matsɛ ɔ he ji nɛ ɔ nɛ: ‘E be ma nɛ ɔ mi sɛe, nɛ e be kɛ̃ɛ̃ ko hu tsɛ̃e kɛ ba hiɛ ɔ. Ta buli nɛ hɛɛ tsɛi be ma a he sue, nɛ a be kpoku ko fiae kɛ wo ma a he.

³³ Blɔ nɛ e gu kɛ ba a, jamɛ a blɔ ɔ nɔuu nɛ e maa gu kɛ kpale kɛ ho; se ma nɛ ɔ mi lɛɛ e be sɛe. Imi, Yawɛ lɛ i de.

³⁴ Ngɛ ye biɛ ɔ he, kɛ si nɛ i wo ye tsɔlɔ David he je ɔ, ma bu ma nɛ ɔ he; nɛ nɔ́ ko nɔ́ ko be a he sae.’ ”

³⁵ Jamɛ a nyɔ ɔ mi nɔuu ɔ, Yawɛ bɔfo ko ya gbe ta buli akpe lafa kɛ nyingmi kpaanyɔ kɛ enuɔ ngɛ Asiria ta a mi. E nɔ jena makɛ ɔ, ne mɛ nɛ a gbo kɛ pueɔ si.

³⁶ Kɛkɛ nɛ Asiria matsɛ, Senakerib hia kɛ je lejɛ ɔ, nɛ e kpale kɛ ho Nineve ya.

³⁷ Ligbi ko ɔ, benɛ e ngɛ e mawu ɔ nɛ a tsɛɛ Nisrok ɔ jae ngɛ e mawu ɔ we ɔ, e binyumuhi enyɔ, Adramelek kɛ Sharezer ya gbe lɛ kɛ klaate, nɛ a tu fo kɛ ho Ararat zugba a nɔ ya. E binyumu kpa nɛ a tsɛɛ lɛ Esarhadon ba ye matsɛ ngɛ e se.