Matsɛmɛ II, 18 - BAIBLO ALOO NGMAMI KLƆUKLƆU Ɔ

Yuda matsɛ, Hezekia

¹ Israel matsɛ, Hoshea, Ela binyumu ɔ yi nɔ jeha nɛ ji etɛ ɔ mi ɔ, Yuda matsɛ, Ahaz binyumu Hezekia ba bɔni tsɛ yemi ngɛ Yuda ma a nɔ.

² Jamɛ a be ɔ, e ye jeha nyingmi enyɔ kɛ enuɔ, nɛ e hi Yerusalem kɛ ye matsɛ jeha nyingmi enyɔ kɛ nɛɛ. E nyɛ ji Zakaria biyo Abiya.

³ Hezekia ya wo e nɛ̃ David nane, nɛ e ní peepee sa Yawɛ hɛ mi.

⁴ E gbɛ jami he ɔmɛ, nɛ e ywia amaga a nɛ a puɛ kɛ ha yo mawu ɔ nɛ a tsɛɛ Ashera a, kɛ amaga kpa amɛ tsuo. Akɔblee sinɔ ɔ nɛ Mose pee, nɛ a tsɛɛ lɛ Nehushtan ɔ, lɔ ɔ hu e ywia lɛ tsɔkɔtsɔkɔ; ejakaa kɛ ba si jamɛ a be ɔ mi ɔ, Israel bi ɔmɛ jɔɔ we tsopa kɛ e he via sami kɛ ha akɔblee sinɔ ɔ.

⁵ Hezekia ngɔ e hɛ ngɔ fɔ Yawɛ, Israel Mawu ɔ nɔ; enɛ ɔ he je ɔ, Yuda matsɛmɛ ɔmɛ nɛ nyɛɛ e hɛ mi, kɛ ni nɛmɛ nɛ nyɛɛ e se ɔ, a ti nɔ ko nɔ ko kɛ lɛ sɔɛ.

⁶ E ngɔ e he ngɔ fɔ Yawɛ nɔ; e ye lɛ anɔkuale, nɛ mlaahi nɛ Yawɛ wo Mose ɔ, e ye lɛ tsuo pɛpɛɛpɛ nɔ.

⁷ Enɛ ɔ he je ɔ, Yawɛ hu piɛ e he, nɛ e yeɔ manye ngɛ nɔ́ tsuaa nɔ́ mi. E tsɔ́ Asiria matsɛ ɔ hɛ mi atuã, nɛ e kua lɛ sɔmɔmi.

⁸ E gbe Filisti bi ɔmɛ kɛ ya pue Gaza kɛ e huza amɛ a nɔ tɔɔ, nɛ e kpata ma wawihi, kɛ ma nguahi tsuo a hɛ mi.

⁹ Yuda matsɛ, Hezekia yi nɔ jeha eywiɛne nɛ ji Israel matsɛ, Hoshea, Ela binyumu ɔ yi nɔ jeha nɛ ji kpaago ɔ mi ɔ, Asiria matsɛ, Shalmaneser ba tua Samaria, nɛ e sa ma a yi.

¹⁰ Jeha etɛ se ɔ, e ngɔ ma a. Benɛ a ngɔ Samaria a, jamɛ a be ɔ mi ɔ, Hezekia ná jeha ekpa momo ngɛ e sɛ ɔ nɔ, nɛ Israel matsɛ, Hoshea hu na jeha nɛɛ.

¹¹ Asiria matsɛ ɔ nuu Israel bi ɔmɛ nyɔguɛ kɛ ho Asiria ya. E ngɔ ni komɛ ya to Hala, e ngɔ ni komɛ ya to Habor pa a nya ngɛ Gozan zugba a nɔ, nɛ e ngɔ ni komɛ hu ya to Media bi ɔmɛ a ma amɛ a mi.

¹² Nɔ́ nɛ ha nɛ a ngɔ Samaria ji, Israel bi ɔmɛ bui Yawɛ, a Mawu ɔ tue. Somi nɛ Yawɛ kɛ mɛ so, kɛ mlaahi nɛ e tsɔlɔ Mose wo mɛ ɔ, a tɔ lɛ tsuo pɛpɛɛpɛ. A bui Mawu tue, nɛ e mlaa amɛ hu a yi nɔ.

Asiria wo Yerusalem he gbeye

¹³ Matsɛ Hezekia yi nɔ jeha nɛ ji nyɔngma kɛ eywiɛ ɔ mi ɔ, Asiria matsɛ, Senakerib ba tua Yuda mahi tsuo nɛ a fia gbogbo ngɔ wo a he ɔ, nɛ e ngɔ ma amɛ.

¹⁴ Yuda matsɛ, Hezekia tsɔ ya de Asiria matsɛ ɔ ngɛ Lakish ke, “I tɔ o nɔ. I kpa mo pɛɛ nɛ o je ye zugba a nɔ; tue gblami saisaa nɛ o ma ha mi ɔ, ma pee.” Asiria matsɛ ɔ sɛ ke a ya de Yuda matsɛ, Hezekia ke e ba ha lɛ sika hiɔ kilo akpe nyɔngma, kɛ sika tsu kilo akpe.

¹⁵ Hezekia ngɔ sika hiɔ nɛ e na ngɛ Yawɛ we ɔ, kɛ nɔ́ nɛ e na ngɛ matsɛ we nito he ɔ tsuo kɛ mane lɛ.

¹⁶ Jehanɛ se hu, Hezekia kplɔ sika tsu ngɛ Yawɛ we ɔ sinya amɛ a he, kɛ nɔ́ nɛ lɛ Matsɛ Hezekia nitsɛ ngɔ kɛ ha sinya tso ɔmɛ a he ɔ, nɛ e kɛ mane Asiria matsɛ ɔ.

¹⁷ Asiria matsɛ ɔ wo ta buli babauu blɔ kɛ je Lakish kɛ ya tua Hezekia ngɛ Yerusalem. Senakerib we asafoatsɛmɛ kpanakpanaa etɛ ji a nyatsɛmɛ. Benɛ a su Yerusalem ɔ, a ya da si ngɛ blɔ ɔ nɔ he nɛ bo loli ɔmɛ tsuɔ ní ngɛ ɔ. Nyu dɔ ko ngɛ lejɛ ɔ, nɛ e mi lɛ nyu nɛ jee taku ɔ mi ngɛ yiti je ɔ guɔ.

¹⁸ Benɛ a bi Matsɛ Hezekia si ɔ, matsɛ ɔ tsɔli etɛ je kpo nɛ a kɛ mɛ ba kpe. Mɛ ji Eliakim, Hilkia binyumu ɔ nɛ hyɛɛ matsɛ we ɔ nɔ ɔ, Shebna, matsɛ pɛdiyo ɔ, kɛ Yoa, Asaf binyumu ɔ nɛ ngmaa sanehi kɛ too ɔ.

¹⁹ Asiria asafoatsɛmɛ ɔmɛ a ti nɔ kake de mɛ ke matsɛ ngua nɛ ji Asiria matsɛ ɔ ngɛ hlae nɛ e le nɔ́ nɛ he je nɛ Matsɛ Hezekia heɔ e he yeɔ kikɛ nɛ ɔ.

²⁰ E bi ke, “O susu kaa nya puu nɛ a kɛ peeɔ ga kɛ hwuu ta lo? Mɛnɔ nɔ o ngɔ o hɛ ngɔ fɔ loko o tsɔ ye hɛ mi atuã a?

²¹ Ke o ngɛ blɔ hyɛe kaa Egipt ma ba piɛ o he ɔ, o ngɛ kaa nɔ ko nɛ e kɛ gla pee e dɛma tso; gla a maa ku nɛ e maa gbɔ e dɛ mi. Kikɛ nɛ ɔ Egipt matsɛ ɔ ngɛ, nɛ nɔ tsuaa nɔ nɛ ngɔɔ e hɛ ngɔ fɔɔ e nɔ ɔ, nɔ́ nɛ baa e nɔ ji nɛ ɔ nɛ.”

²² Asiria asafoatsɛ ɔ ya nɔ nɛ e de ke, “Aloo o ma de mi ke o ngɔ o hɛ ngɔ fɔ Yawɛ, o Mawu ɔ nɔ? Anɛ pi Yawɛ jami he ɔmɛ, kɛ bɔ sami la tɛ ɔmɛ nɛ Hezekia ywia, benɛ e de Yuda kɛ Yerusalem ke a ya ja Mawu ngɛ bɔ sami la tɛ ɔ nɛ ngɛ Yerusalem ɔ pɛ e hɛ mi ɔ lo?

²³ I kɛ mo maa po nga ngɛ ye nyɔmtsɛ, Asiria matsɛ ɔ biɛ mi. Ma ha mo okpɔngɔ akpe enyɔ kaa o ma na mo nitsɛ o nihi nɛ a hi a nɔ lo.

²⁴ O ngɛ blɔ hyɛe nɛ Egipt ba ha mo ta zugba lɛhi, kɛ okpɔngɔ tatsɛmɛ, be mi nɛ ye nyɔmtsɛ ɔ we asafoatsɛ nyafii pe kulaa a po o be lɛ nyɛe.

²⁵ O susu kaa loko ma ba tua ma nɛ ɔ nɛ ma kpata e hɛ mi ɔ, Yawɛ li he nɔ́ ko lo? Yawɛ nitsɛ lɛ e de mi ke ma ba tua ma a, nɛ ma kpata ma a hɛ mi.”

²⁶ Kɛkɛ nɛ Eliakim, Hilkia binyumu ɔ, kɛ Shebna, kɛ Yoa de Asiria matsɛ ɔ we asafoatsɛ ɔ ke, “Wa kpa mo pɛɛ nɛ o kɛ wɔ o tsɔli ɔmɛ nɛ tu Aram gbi, ejakaa wa nuɔ. O kɛ wɔ ko tu Hebri gbi, ejakaa ma a nɛ ngɛ gbogbo ɔ yi mi ɔ ngɛ wɔ tue bue.”

²⁷ Se asafoatsɛ ɔ de mɛ ke, “Ye nyɔmtsɛ ɔ tsɔɛ mi nyɛɛ kɛ nyɛ nyɔmtsɛ ɔ kɛkɛ nyɛ ngɔ kɛ munyu nɛ ɔ. Nimli nɛ pueɔ si ngɛ gbogbo ɔ nɔ ɔ, mɛ hu munyu nɛ ɔ kɔɔ a he; ejakaa a maa ye mɛ nitsɛmɛ a fĩ, nɛ a maa nu mɛ nitsɛmɛ a zami kaa nyɛ nɔuu.”

²⁸ Kɛkɛ nɛ asafoatsɛ ɔ te da si, nɛ e kpa ngmlaa ngɛ Hebri gbi mi ke, “Nyɛɛ bu nɔ́ nɛ matsɛ kpetekpleenyɛ, nɛ ji Asiria matsɛ ɔ ngɛ dee ɔ tue!

²⁹ E ke, nyɛ ko ha nɛ Hezekia nɛ sisi nyɛ; ejakaa Hezekia be nyɛe ma kpɔ nyɛ ngɛ e dɛ mi.

³⁰ Nyɛ ko ha nɛ Hezekia nɛ mlɔɔ nyɛ nɛ nyɛɛ ngɔ nyɛ hɛ kɛ fɔ Yawɛ nɔ. Nyɛ ko susu kaa Yawɛ ma he nyɛ yi wami, nɛ e be hae nɛ Asiria matsɛ ɔ nɛ ngɔ nyɛ ma a.

³¹ Nyɛ ko bu Hezekia tue. Asiria matsɛ ngua a ngɛ nyɛ dee ke nyɛɛ kɛ lɛ ba kpata. Kɛkɛ ɔ, nyɛ maa ye nyɛ he, nɛ nɔ tsuaa nɔ maa ye lɛ nitsɛ e wai kɛ ngmɔkɔ yiblii, nɛ nɔ tsuaa nɔ maa nu lɛ nitsɛ e vu mi nyu

³² kɛ yaa si be nɛ matsɛ ngua a ma kpaka nyɛ kɛ ya zugba ko nɛ ngɛ kaa nyɛ nitsɛmɛ nyɛ zugba a nɔ. Wai ngmɔhi ngɛ lejɛ ɔ nɛ nyɛɛ kɛ maa pee wai; blɛfo ngɛ lejɛ ɔ nɛ nyɛɛ kɛ maa pee abolo; oliv tsohi ngɛ lejɛ ɔ nɛ nyɛɛ kɛ maa pee nu; hwo gbakuhi hu ngɛ lejɛ ɔ nɛ nyɛɛ kɛ maa pee hwo. Ke Hezekia mlɔɔ nyɛ nɛ e de nyɛ ke Yawɛ ma he nyɛ yi wami ɔ, nyɛ ko bu lɛ tue.

³³ Anɛ je ma amɛ a mawu ɔmɛ eko nyɛ kpɔ e ma kɛ je Asiria dɛ mi hyɛ lo?

³⁴ Jije Hamat kɛ Arpad mawu ɔmɛ ngɛ? Jije Sefarvaim, Hena, kɛ Iva mawu ɔmɛ ngɛ? Anɛ a nyɛ kpɔ Samaria lo?

³⁵ Je ma amɛ tsuo a mawu ɔmɛ eko nyɛ kpɔ e ma kɛ je Asiria matsɛ ɔ dɛ mi hyɛ lo? Lɛɛ mɛni haa nɛ o susuɔ kaa Yawɛ ma nyɛ ma kpɔ Yerusalem mɔ?”

³⁶ Se ma a pee dii, nɛ a de we nɔ́ ko, kaa bɔ nɛ Matsɛ Hezekia fa mɛ ke a pee ɔ.

³⁷ Kɛkɛ nɛ Eliakim, Hilkia binyumu ɔ nɛ hyɛɛ matsɛ we ɔ nɔ ɔ, kɛ Shebna, matsɛ pɛdiyo ɔ, kɛ Yoa, Asaf binyumu ɔ nɛ ji sanehi ngmalɔ ɔ kɛ aywilɛho hía tade ɔmɛ ngɛ a he; nɛ a ho ya bɔ Matsɛ Hezekia níhi tsuo nɛ Asiria matsɛ ɔ we asafoatsɛ ɔ de ɔ.