Matsɛmɛ II, 16 - BAIBLO ALOO NGMAMI KLƆUKLƆU Ɔ

Yuda matsɛ, Ahaz

¹ Israel matsɛ Peka, Remalia binyumu ɔ yi nɔ jeha nɛ ji nyɔngma kɛ kpaago ɔ mi ɔ, Yuda matsɛ, Yotam binyumu Ahaz ba bɔni tsɛ yemi ngɛ Yuda ma a nɔ.

² Jamɛ a be ɔ, e ye jeha nyingmi enyɔ, nɛ e hi Yerusalem kɛ ye matsɛ jeha nyɔngma kɛ ekpa. E pee we Yawɛ, e Mawu ɔ suɔmi nya ní kaa bɔ nɛ e nɛ̃ David pee ɔ;

³ se mohu e ya wo Israel matsɛmɛ ɔmɛ a nane. E ngɔ lɛ nitsɛ e binyumu po kɛ sã sami bɔ kaa bɔ nɛ je ma amɛ nɛ Yawɛ fie kɛ je Israel bi ɔmɛ a blɔ ɔ nɔ ɔ a kusumi yayami ɔmɛ ngɛ ɔ.

⁴ Ahaz sã bɔ, kɛ tsopa kɛ e he via ngɛ jami he ɔmɛ, ngɛ yoku ɔmɛ a nɔ, kɛ tsohi nɛ bɔ kusuu ɔ a sisi.

⁵ Jamɛ a be ɔ mi ɔ, Siria matsɛ, Rezin, kɛ Israel matsɛ, Peka, Remalia binyumu ɔ ya tua Yerusalem, nɛ a sa Ahaz yi kɛ wo ma a mi; se a nyɛ we lɛ.

⁶ Jamɛ a be ɔ mi nɔuu ɔ, Edom matsɛ ɔ ya kpɔ Elat kɛ ha Edom, nɛ e fie Yuda bi ɔmɛ kɛ je Elat ma a mi. Edom bi ɔmɛ ba dumɔ Elat, nɛ a ngɛ lejɛ ɔ kɛ ba si mwɔnɛ ɔ.

⁷ Ahaz tsɔ ya de Asiria matsɛ, Tiglat Pileser ke, “O tsɔlɔ kɛ o binyumu ji mi. Siria matsɛ, kɛ Israel matsɛ ba tua mi, lɔ ɔ he ɔ, ba nɛ o ba je ngmlaa ha mi.”

⁸ Ahaz ya ngɔ sika hiɔ, kɛ sika tsu ngɛ Yawɛ we ɔ, kɛ matsɛ we nito he ɔmɛ; nɛ e tsɔ nɛ a kɛ ya ke Asiria matsɛ ɔ.

⁹ Asiria matsɛ ɔ bu lɛ tue, nɛ e hia kɛ ya tua Damasko. E ngɔ ma a, nɛ e gbe Matsɛ Rezin; se ma a mi bi ɔmɛ lɛɛ e nuu mɛ nyɔguɛ kɛ ho Kir ya.

¹⁰ Benɛ Matsɛ Ahaz, kɛ Asiria matsɛ, Tiglat Pileser ya kpe ngɛ Damasko ɔ, e na bɔ sami la tɛ ɔ ngɛ lejɛ ɔ. Matsɛ Ahaz ngɔ bɔ sami la tɛ ɔ henɔ pɛpɛɛpɛ kɛ mane osɔfo Uria.

¹¹ Nɛ loko Matsɛ Ahaz je Damasko kɛ ba a, osɔfo Uria puɛ bɔ sami la tɛ nɛ henɔ ngɛ kaa nɔ́ nɛ Matsɛ Ahaz ngɔ kɛ mane lɛ kɛ je Damasko ɔ pɛpɛɛpɛ.

¹² Benɛ Matsɛ Ahaz je Damasko kɛ ba a, e na kaa a puɛ bɔ sami la tɛ ɔ ta.

¹³ E sã sami bɔ, kɛ niye ní bɔ ngɛ nɔ. E sã wai bɔ, nɛ lohwe ɔ nɛ e kɛ sã tue mi jɔmi bɔ ɔ, e fĩa e muɔ kɛ pue bɔ sami la tɛ ɔ nɔ.

¹⁴ Lɔ ɔ se ɔ, e je akɔblee bɔ sami la tɛ momo ɔ nɛ maa Yawɛ hɛ mi ɔ kɛ je e ma he ɔ ngɛ Yawɛ we ɔ, kɛ e bɔ sami la tɛ he ɔ a kpɛti ɔ, nɛ e kɛ ya ma e bɔ sami la tɛ he ɔ we omleyi je.

¹⁵ Kɛkɛ nɛ Matsɛ Ahaz fa osɔfo Uria ke, “Moo sã mɔtu sami bɔ, gbɔkuɛ niye ní bɔ, matsɛ sami bɔ, e niye ní bɔ, kɛ zugba a nɔ bimɛ tsuo a sami bɔ ɔmɛ, kɛ a niye ní bɔ ɔmɛ ngɛ bɔ sami la tɛ ngua nɛ ɔ nɔ. Moo sã wai bɔ ngɛ lejɛ ɔ, nɛ o ngɔ lohwehi nɛ a kɛ ba sã sami bɔ, kɛ bɔ kpa amɛ a muɔ kɛ fĩa nɔ. Se akɔblee bɔ sami la tɛ ɔ lɛɛ mo si ha mi nɛ ma bi ní ngɛ lejɛ ɔ.”

¹⁶ Osɔfo Uria pee kaa bɔ nɛ Matsɛ Ahaz fa lɛ ke e pee ɔ pɛpɛɛpɛ.

¹⁷ Matsɛ Ahaz pee sisi daka amɛ a nɔ dami ní ɔmɛ, nɛ e je tsesi ɔmɛ ngɛ a nɔ. Jehanɛ, e je akɔblee nyu nɔ́ ngua a kɛ je akɔblee na ku ɔmɛ a se mi kɛ ma tɛ nɔ ngɛ zugba.

¹⁸ Ahaz je nɔ́ ɔ nɛ a kɛ matsɛ sɛ ɔ maa nɔ ɔ ngɛ Yawɛ we ɔ hulɔ. E pee nɔ́ nɛ ɔ nɛ e kɛ sa Asiria matsɛ ɔ hɛ mi.

¹⁹ Ahaz he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

²⁰ Ahaz ba gbo, nɛ a pu lɛ ngɛ matsɛmɛ ɔmɛ a yɔkɔ ɔ mi ngɛ David ma a mi; nɛ e binyumu Hezekia ba ye matsɛ ngɛ e se.