Matsɛmɛ II, 15 - BAIBLO ALOO NGMAMI KLƆUKLƆU Ɔ

Yuda matsɛ, Uzia

¹ Israel matsɛ, Yeroboam yi nɔ jeha nɛ ji nyingmi enyɔ kɛ kpaago ɔ mi ɔ, Yuda matsɛ, Uzia, Amazia binyumu ɔ bɔni tsɛ yemi ngɛ Yuda ma a nɔ.

² Jamɛ a be ɔ, e ye jeha nyɔngma kɛ ekpa, nɛ e hi Yerusalem kɛ ye matsɛ jeha nyingmi enuɔ kɛ enyɔ. E nyɛ biɛ ji Yekolia, nɛ e je Yerusalem.

³ E pee Yawɛ suɔmi nya ní kaa bɔ nɛ e tsɛ Amazia pee ɔ pɛpɛɛpɛ.

⁴ Se mohu wɔ jami he ɔmɛ lɛɛ e puɛ we mɛ; lɔ ɔ he ɔ, ma a sã bɔ, kɛ tsopa kɛ e he via ngɛ lejɛ ɔmɛ kɛ mwɔɔ.

⁵ Yawɛ ha nɛ matsɛ ɔ nu he womi nɔ hiɔ yaya; nɛ hiɔ nɛ ɔ ngɛ e he kɛ ya si e gbenɔ ligbi. Enɛ ɔ he je ɔ, e klɛ̃ kɛ ya hi we kpa mi, nɛ e binyumu Yotam ba hi matsɛ we ɔ, nɛ e kɛ hyɛ ma a nɔ.

⁶ Uzia he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

⁷ Uzia ba gbo, nɛ a pu lɛ ngɛ matsɛmɛ ɔmɛ a yɔkɔ ɔ mi ngɛ David ma a mi; nɛ e binyumu Yotam ba ye matsɛ ngɛ e se.

Israel matsɛ, Zakaria

⁸ Yuda matsɛ, Uzia yi nɔ, jeha nɛ ji nyingmi etɛ kɛ kpaanyɔ ɔ mi ɔ, Yeroboam binyumu Zakaria ba ye tsɛ ngɛ Israel ma a nɔ. E hi Samaria kɛ ye matsɛ nyɔhiɔ ekpa.

⁹ E pee yayami kɛ si Yawɛ kaa bɔ nɛ matsɛmɛ ɔmɛ nɛ nyɛɛ e hɛ mi ɔ pee ɔ pɛpɛɛpɛ. Yayamihi nɛ Nebat binyumu Yeroboam ha nɛ Israel pee ɔ, e ngmɛɛ we he.

¹⁰ Yabesh binyumu Shalum so Matsɛ Zakaria yi nɔ, nɛ e fia lɛ nɔ́ nɛ e gbe ngɛ Ibleam; nɛ e ye matsɛ ngɛ e se.

¹¹ Ní kpahi tsuo nɛ Zakaria pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

¹² Lɔ ɔ he ɔ, si nɛ Yawɛ wo Matsɛ Yehu ɔ ba mi. Yawɛ de lɛ ke, “O bimɛ maa ye matsɛ ngɛ Israel kɛ yaa si yi nɔ nɛ ji eywiɛ ɔ.”

Israel matsɛ, Shalum

¹³ Yuda matsɛ, Uzia yi nɔ jeha nɛ ji nyingmi etɛ kɛ nɛɛ ɔ mi ɔ, Yabesh binyumu Shalum ba ye tsɛ ngɛ Israel ma a nɔ. E hi Samaria kɛ ye matsɛ nyɔhiɔ kake.

¹⁴ Menahem, Gadi binyumu ɔ je Tirza kɛ ya Samaria nɛ e ya fia Yabesh binyumu Shalum nɔ́ nɛ e gbe ngɛ lejɛ ɔ; nɛ e ye matsɛ ngɛ e se.

¹⁵ Ní kpahi tsuo nɛ Shalum pee, kɛ bɔ nɛ e so Zakaria yi nɔ ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

¹⁶ Benɛ Menahem je Tirza kɛ yaa a, e kpata Tapua ma a, ma mi bi ɔmɛ, kɛ zugbahi nɛ bɔle Tapua ma a a hɛ mi. Yihɔyihi nɛ ngɛ ma a mi po, e ta bimɛ ɔmɛ ngɛ mɛ tsuo pɛpɛɛpɛ a mi mi. Menahem pee nɔ́ nɛ ɔ, ejakaa ma a he we lɛ atuu.

Israel matsɛ, Menahem

¹⁷ Yuda matsɛ, Uzia yi nɔ jeha nɛ ji nyingmi etɛ kɛ nɛɛ ɔ mi ɔ, Gadi binyumu Menahem bɔni tsɛ yemi ngɛ Israel ma a nɔ. E hi Samaria kɛ ye matsɛ jeha nyɔngma.

¹⁸ E pee yayami kɛ si Yawɛ. E wami be ɔ tsuo ɔ, yayamihi nɛ Nebat binyumu Yeroboam ha nɛ Israel pee ɔ, e ngmɛɛ we a he.

¹⁹ Asiria matsɛ, Tiglat Pileser ba tua Israel; nɛ Menahem ha lɛ sika hiɔ kilo akpe nyingmi etɛ kɛ eywiɛ, bɔ nɛ pee nɛ Tiglat Pileser nɛ e piɛ e he, nɛ e matsɛ yemi ɔ nɛ da si.

²⁰ Menahem he sika nɛ ɔ kɛ je Israel niatsɛmɛ ɔmɛ a dɛ; e tsu niatsɛ tsuaa niatsɛ sika hiɔ yi nyingmi enuɔ. Kɛkɛ nɛ Asiria matsɛ ɔ kpale kɛ ho e ma mi ya.

²¹ Menahem he sane kpahi, kɛ níhi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

²² Menahem ba gbo, nɛ a pu lɛ, nɛ e binyumu Pekahia ba ye matsɛ ngɛ e se.

Israel matsɛ, Pekahia

²³ Yuda matsɛ, Uzia yi nɔ jeha nɛ ji nyingmi enuɔ ɔ mi ɔ, Menahem binyumu Pekahia ba bɔni tsɛ yemi ngɛ Israel ma a nɔ. E hi Samaria kɛ ye matsɛ jeha enyɔ.

²⁴ E pee yayami kɛ si Yawɛ. Yayamihi nɛ Nebat binyumu Yeroboam ha nɛ Israel pee ɔ, e ngmɛɛ we he.

²⁵ Pekahia we asafoatsɛ Peka, Remalia binyumu ɔ, kɛ Gilead bi nyingmi enuɔ so Pekahia yi nɔ, nɛ a gbe lɛ ngɛ matsɛ we ɔ mɔ ɔ mi ngɛ Samaria; nɛ Peka ye matsɛ ngɛ e se.

²⁶ Pekahia he sane kpahi, kɛ níhi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

Israel matsɛ, Peka

²⁷ Yuda matsɛ, Uzia yi nɔ jeha nɛ ji nyingmi enuɔ kɛ enyɔ ɔ mi ɔ, Remalia binyumu Peka bɔni tsɛ yemi ngɛ Israel ma a nɔ. E hi Samaria kɛ ye matsɛ jeha nyingmi enyɔ.

²⁸ E pee yayami kɛ si Yawɛ. Yayamihi tsuo nɛ Yeroboam, Nebat binyumu ɔ ha nɛ Israel pee ɔ, e ngmɛɛ we he.

²⁹ Israel matsɛ, Peka yi nɔ ɔ, Asiria matsɛ, Tiglat Pileser ba ngɔ Iyon, Abel Bet Maaka, Yanoa, Kedesh, Hazor, Gilead, kɛ Galilea-Naftali zugba a tsuo; nɛ e ngɔ nimli nɛ ɔmɛ nyɔguɛ kɛ ho Asiria ya.

³⁰ Yuda matsɛ, Yotam, Uzia binyumu ɔ yi nɔ jeha nɛ ji nyingmi enyɔ ɔ mi ɔ, Ela binyumu Hoshea so Matsɛ Peka yi nɔ nɛ e fia lɛ nɔ́ nɛ e gbe; nɛ e ye matsɛ ngɛ e se.

³¹ Peka he sanehi kpahi, kɛ níhi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

Yuda matsɛ, Yotam

³² Israel matsɛ, Peka, Remalia binyumu ɔ yi nɔ jeha enyɔne ɔ mi ɔ, Uzia binyumu Yotam ba bɔni tsɛ yemi ngɛ Yuda ma a nɔ.

³³ Jamɛ a be ɔ, e ye jeha nyingmi enyɔ kɛ enuɔ, nɛ e hi Yerusalem kɛ ye matsɛ jeha nyɔngma kɛ ekpa. E nyɛ ji Zadok biyo Yerusha.

³⁴ E ya wo e tsɛ nane, nɛ e pee Yawɛ suɔmi nya ní.

³⁵ Se jami he ɔmɛ lɛɛ e puɛ we mɛ; lɔ ɔ he ɔ, ma a ya nɔ sã bɔ, kɛ tsopa kɛ e he via ngɛ lejɛ ɔmɛ kɛ mwɔɔ. Yotam ji nɔ nɛ ma Yawɛ we ɔ omleyi je agbo ɔ nɛ.

³⁶ Yotam he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

³⁷ Benɛ Yotam ngɛ matsɛ yee ɔ ji be nɛ Yawɛ bɔni Siria matsɛ, Rezin, kɛ Israel matsɛ, Peka tsɔmi ke a ya tua Yuda.

³⁸ Yotam ba gbo, nɛ a pu lɛ ngɛ Yuda matsɛmɛ ɔmɛ a yɔkɔ ɔ mi ngɛ David ma a mi; nɛ e binyumu Ahaz ba ye matsɛ ngɛ e se.