Matsɛmɛ II, 14 - BAIBLO ALOO NGMAMI KLƆUKLƆU Ɔ

Yuda matsɛ, Amazia

¹ Israel matsɛ, Yehoash, Yehoahaz binyumu ɔ yi nɔ jeha nɛ ji enyɔ ɔ, Amazia, Yoash binyumu ɔ ba ye matsɛ ngɛ Yuda ma a nɔ.

² Jamɛ a be ɔ, e ye jeha nyingmi enyɔ kɛ enuɔ, nɛ e hi Yerusalem kɛ ye matsɛ jeha nyingmi enyɔ kɛ nɛɛ. E nyɛ je Yerusalem, nɛ e biɛ ji Yehoadin.

³ E pee nɔ́ nɛ sa Yawɛ hɛ mi, se e be kaa e nɛ̃ David; e ya wo e tsɛ Yoash nane.

⁴ Wɔ jami he ɔmɛ lɛɛ e puɛ we mɛ; lɔ ɔ he ɔ, ma a ya nɔ sã bɔ, kɛ tsopa kɛ e he via ngɛ lejɛ ɔmɛ kɛ mwɔɔ.

⁵ Benɛ Amazia matsɛ yemi ɔ ba da si ɔ, e gbe e tsɔli ɔmɛ nɛ gbe matsɛ ɔ nɛ ji e tsɛ ɔ.

⁶ Se a bimɛ ɔmɛ lɛɛ e gbi mɛ ngɛ mlaa nɛ Yawɛ wo ɔ nya, kaa bɔ nɛ a ngma ngɛ Mose womi ɔ mi ɔ. A ngma ke, “A ko gbe fɔli ngɛ yayami nɛ a bimɛ pee ɔ he, nɛ a ko gbe bimɛ hu ngɛ yayami nɛ a fɔli pee ɔ he; yayami nɛ nɔ nitsɛ e pee ɔ, lɔ ɔ he a gbe lɛ ngɛ.”

⁷ Amazia gbe Edom ta buli akpe nyɔngma ngɛ Ngo kɔ̃ ɔ mi. E kpɔ Sela ma a ngɛ ta mi, nɛ e wo lɛ biɛ ke Yokteel; nɛ ja a tsɛɛ ma nɛ ɔ kɛ ba si mwɔnɛ ɔ.

⁸ Ligbi ko ɔ, Amazia tsɔ ya de Israel matsɛ, Yehoash, Yehu bi Yehoahaz bi ɔ ke e ba nɛ e kɛ lɛ ba kpe ngɛ ta nga nɔ.

⁹ Israel matsɛ, Yehoash hu tsɔ ya de Yuda matsɛ, Amazia ke, “Be ko ɔ, Lebanon mio tso tsɔ ke a ya de Lebanon seda ke, ‘Ngɔɔ o biyo ɔ ngɔ ha ye binyumu ɔ nɛ e ngɔ.’ Kɛkɛ nɛ Lebanon pu mi lohwe ko ba be, nɛ e naa mio tso ɔ nɔ.

¹⁰ Amazia, o gbe Edom bi ɔmɛ; enɛ ɔ he je ɔ, o ngɛ o he nɔ woe. Amlɔ nɛ ɔ, o he biɛ. Lɔ ɔ he ɔ, ha nɛ o bua nɛ jɔ o he nɛ o hi si ngɛ o we mi. Mɛni he je nɛ o ngɛ sane yee kikɛ nɛ ɔ? Anɛ o li kaa nɔ́ nɛ ɔ kɛ haomi maa ba o kɛ Yuda tsuo nyɛ nɔ lo?”

¹¹ Se Amazia tsi e tue. Lɔ ɔ he ɔ, Israel matsɛ, Yehoash hia nɛ e kɛ Yuda matsɛ, Amazia ya kpe hɛ mi kɛ hɛ mi ngɛ ta nga nɔ, ngɛ Yuda ma a nɛ a tsɛɛ Bet Shemesh ɔ.

¹² Israel ye Yuda nɔ kunimi, nɛ Yuda ta buli ɔmɛ tsuo tu fo kɛ ho a wehi a mi ya.

¹³ Israel matsɛ, Yehoash nu Yuda matsɛ, Amazia nyɔguɛ. Lɔ ɔ se ɔ, e ho Yerusalem ya nɛ e ya ku Yerusalem gbogbo ɔ gugue lafa, kɛ je Efraim agbo ɔ nya kɛ ya si kɔ nya agbo ɔ nya.

¹⁴ E muɔ níhi tsuo nɛ e na ngɛ Yawɛ we ɔ, kɛ matsɛ we ɔ junehi kɛ je. E muɔ sika tsu kɛ sika hiɔ tsuo, nɛ e nuu ta nyɔguɛhi hulɔ kɛ ho Samaria ya.

¹⁵ Yehoash he sane kpahi, kã nɛ e pee benɛ e kɛ Yuda matsɛ, Amazia hwu ta, kɛ ní kpahi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

¹⁶ Yehoash ba gbo nɛ a pu lɛ ngɛ Israel matsɛmɛ ɔmɛ a yɔkɔ ɔ mi ngɛ Samaria; nɛ e binyumu Yeroboam ba ye e se.

Yuda matsɛ, Amazia gbenɔ

¹⁷ Israel matsɛ, Yehoash gbenɔ se ɔ, Yuda matsɛ, Amazia hi si jeha nyɔngma kɛ enuɔ loko e gbo.

¹⁸ Ni kpahi nɛ Amazia pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

¹⁹ E ba mi kaa a so Amazia yi nɔ ngɛ Yerusalem kaa a maa gbe lɛ. Lɔ ɔ he ɔ, e tu fo kɛ ho Lakish ya; se a tsɔ nihi kɛ nyɛɛ e se, nɛ a ya gbe lɛ ngɛ lejɛ ɔ.

²⁰ A kɛ e gbogboe ɔ fɔ okpɔngɔ nɔ kɛ ba Yerusalem nɛ a ba pu lɛ ngɛ matsɛmɛ ɔmɛ a yɔkɔ ɔ mi, ngɛ David ma a mi.

²¹ Yuda ma a tsuo wo Uzia matsɛ ngɛ e tsɛ Amazia se. Jamɛ a be ɔ mi ɔ, e ye jeha nyɔngma kɛ ekpa.

²² Benɛ Uzia tsɛ gbo se ɔ, Uzia kpɔ Elat kɛ ha Yuda ekohu, nɛ e dla po ma a.

Israel matsɛ, Yeroboam nɛ ji enyɔ

²³ Yuda matsɛ, Amazia, Yoash binyumu ɔ yi nɔ jeha nɛ ji nyɔngma kɛ enuɔ ɔ, Israel matsɛ, Yehoash binyumu Yeroboam bɔni tsɛ yemi ngɛ Israel ma a nɔ. E hi Samaria kɛ ye matsɛ jeha nyingmi eywiɛ kɛ kake.

²⁴ E pee yayami kɛ si Yawɛ. Yayamihi tsuo nɛ Yeroboam, Nebat binyumu ɔ ha nɛ Israel pee ɔ, e ngmɛɛ we he.

²⁵ Yeroboam kpɔ Israel zugba amɛ nɛ je a dɛ ɔ ekohu, kɛ je Hamat yo kpɛ blɔ ɔ nya, ngɛ omleyi je, kɛ ya si Ngo wo ɔ nya, ngɛ leneyi je. Yawɛ, Israel Mawu ɔ wo nɔ́ nɛ ɔ he si kɛ gu e tsɔlɔ, gbalɔ Yona, Amitai binyumu ɔ nɛ je Gat Hefer ɔ nɔ.

²⁶ Yawɛ ba na kaa amanehlu nɛ Israel bi ɔmɛ ngɛ nae ɔ nya wa tsɔ; nɔ ko nɔ ko na we he jɔmi, nɛ balɔ ko hu be.

²⁷ Se akɛnɛ Yawɛ to we kaa e ma kpata Israel hɛ mi pɛsɛpɛsɛ he je ɔ, e gu Yehoash binyumu Yeroboam nɔ nɛ e kɛ he a yi wami.

²⁸ Yeroboam he sane kpahi, kã nɛ e pee, ta nɛ e hwu, bɔ nɛ e kpɔ Damasko kɛ Hamat kɛ je Yuda dɛ ngɔ ha Israel, kɛ ní kpahi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

²⁹ Yeroboam ba gbo, nɛ a pu lɛ ngɛ Israel matsɛmɛ ɔmɛ a yɔkɔ ɔ mi; nɛ e binyumu Zakaria ba ye matsɛ ngɛ e se.