Matsɛmɛ II, 13 - BAIBLO ALOO NGMAMI KLƆUKLƆU Ɔ

Israel matsɛ, Yehoahaz

¹ Yuda matsɛ, Yoash, Ahazia binyumu ɔ yi nɔ jeha nɛ ji nyingmi enyɔ kɛ etɛ ɔ mi ɔ, Yehu binyumu Yehoahaz bɔni tsɛ yemi ngɛ Israel ma a nɔ. E hi Samaria kɛ ye matsɛ jeha nyɔngma kɛ kpaago.

² Yehoahaz pee yayami kɛ si Yawɛ. Yayamihi nɛ Nebat binyumu Yeroboam ha nɛ Israel pee ɔ, e ngmɛɛ we he; se e tsa nɔ mohu.

³ Enɛ ɔ he je ɔ, Yawɛ mi mi fu Israel, nɛ e ngɔ mɛ kɛ wo Siria matsɛ, Hazael kɛ e binyumu Benhadad a dɛ mi si abɔ.

⁴ Kɛkɛ nɛ Yehoahaz fa kue ha Yawɛ, nɛ Yawɛ bu lɛ tue; ejakaa e na haomi nɛ Siria matsɛ ɔ ngɛ Israel bi ɔmɛ haoe ɔ.

⁵ Yawɛ je kpɔlɔ ko ha Israel, nɛ e ba kpɔ mɛ kɛ je Siria bi ɔmɛ a dɛ mi. Nɔ́ nɛ ɔ ha Israel bi ɔmɛ na he jɔmi, nɛ a hi mɛ nitsɛmɛ a wehi a mi ekohu kaa sa a.

⁶ Se yayamihi nɛ Matsɛ Yeroboam ha nɛ Israel pee ɔ, a ngmɛɛ we he; a tsa nɔ mohu. Jehanɛ, yo mawu Ashera amaga a hu maa si ngɛ Samaria kɛ mwɔɔ.

⁷ Siria matsɛ ɔ kpata Matsɛ Yehoahaz tabo ɔ hɛ mi, nɛ nɔ́ nɛ ɔ ha nɛ a he wami nɔ gbɔ. Matsɛ Yehoahaz ta buli tsuo nɛ piɛ ha lɛ ji okpɔngɔ ta buli nyingmi enuɔ, ta zugba lɛ nyɔngma, kɛ nane nyɛɛli akpe nyɔngma.

⁸ Yehoahaz he sane kpahi, kã, kɛ níhi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

⁹ Yehoahaz ba gbo, nɛ a pu lɛ ngɛ Samaria, nɛ e binyumu Yehoash ba ye matsɛ ngɛ e se.

Israel matsɛ, Yehoash

¹⁰ Yuda matsɛ, Yoash yi nɔ jeha nɛ ji nyingmi etɛ kɛ kpaago ɔ, Yehoahaz binyumu Yehoash bɔni tsɛ yemi ngɛ Israel ma a nɔ. E hi Samaria kɛ ye matsɛ jeha nyɔngma kɛ ekpa.

¹¹ Lɛ hu e pee yayami kɛ si Yawɛ. Yayamihi tsuo nɛ Nebat binyumu Yeroboam ha nɛ Israel pee ɔ, Yehoash ngmɛɛ we he; se mohu e tsa nɔ.

¹² Yehoash he sane kpahi, kã nɛ e pee benɛ e kɛ Yuda matsɛ, Amazia hwu ta, kɛ níhi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

¹³ Yehoash ba gbo, nɛ a pu lɛ ngɛ Israel matsɛmɛ ɔmɛ a yɔkɔ ɔ mi ngɛ Samaria, nɛ Yeroboam ba ye e se.

Elisha gbenɔ

¹⁴ Ligbi ko, benɛ gbalɔ Elisha fɔɔ si kɛ gbenɔ hiɔ ɔ, Israel matsɛ, Yehoash ba slaa lɛ, nɛ e fo ya pue e nɔ; nɛ e de ke, “Tsaatsɛ! Tsaatsɛ! Mo ji Israel he falɔ kpanaa!”

¹⁵ Elisha de lɛ ke, “Yaa nɛ o ya ngɔ kɛ̃ɛ̃ kɛ kɛ̃ɛ̃ mi bihi kɛ ba!” Benɛ Israel matsɛ ɔ ngɔ ní ɔmɛ kɛ ba a,

¹⁶ Elisha de lɛ ke e pee kɛ̃ɛ̃ ɔ klaalo; nɛ e pee ja. Kɛkɛ nɛ Elisha nu matsɛ ɔ nine enyɔ ɔmɛ,

¹⁷ nɛ e de lɛ ke, “Bli saflɛ ɔ nɛ hyɛɛ beleku je ɔ!” Nɛ e pee ja. Jehanɛ Elisha de lɛ ke, “Tsɛ̃ kɛ̃ɛ̃ ɔ!” Benɛ matsɛ ɔ tsɛ̃ kɛ̃ɛ̃ ɔ pɛ kɛkɛ nɛ Elisha de ke, “Yawɛ kɛ̃ɛ̃ mi bi nɛ e kɛ maa ye Siria nɔ kunimi ji nɛ ɔ nɛ! O kɛ Siria bi ɔmɛ maa hwu ta ngɛ Afek hluu kɛ yaa si o ma kpata a hɛ mi butuu!”

¹⁸ Enɛ ɔ se ɔ, Elisha de Israel matsɛ ɔ ke e kukuɔ kɛ̃ɛ̃ mi bi kpa amɛ, nɛ e tsɛ̃ mɛ kɛ wo zu mi. Matsɛ ɔ tsɛ̃ kɛ̃ɛ̃ ɔmɛ kɛ wo zu mi si etɛ, nɛ e kpa.

¹⁹ Kɛkɛ nɛ Mawu nɔmlɔ ɔ mi mi fu lɛ nɛ e de lɛ ke, “Kaa o tsɛ̃ kɛ̃ɛ̃ ɔ si enuɔ, loo si ekpa jinɛ o maa fia Siria bi ɔmɛ ní hluu kɛ yaa si o ma kpata a hɛ mi butuu. Bɔ nɛ e ba nɛ ɔ lɛɛ si etɛ pɛ o maa ye Siria nɔ kunimi.”

²⁰ Elisha ba gbo, nɛ a pu lɛ. Daa jeha sisije ɔ, Moab ojo fiali baa nɛ a ba tuaa Israel zugba a.

²¹ Ligbi ko, benɛ a yaa nɛ a ya pu nyumu ko ɔ, a na ojo fiali a kuu nɛ ɔ nɛ ma. Kɛkɛ nɛ a sake gbogboe ɔ ngɔ fɔ Elisha yɔkɔ ɔ mi. Benɛ gbogboe ɔ he ya sa Elisha wuhi a he pɛ, nɔ ɔ hɛ tsɛ, nɛ e te da si.

Israel kɛ Siria hwu ta

²² Siria matsɛ, Hazael wa Israel bi ɔmɛ yi mi Yehoahaz matsɛ yemi be ɔ tsuo;

²³ se kɛ̃ ɔ, Yawɛ dloomi kɛ e mɔbɔ nami ngɛ a nɔ. Somi ɔ nɛ Yawɛ kɛ Abraham, kɛ Isak, kɛ Yakob so ɔ he je ɔ, e piɛ a he, nɛ e ha we nɛ a hɛ mi nɛ kpata; nɛ kɛ ba si mwɔnɛ ɔ hu e hɛ ji e ma a nɔ.

²⁴ Benɛ Siria matsɛ, Hazael gbo ɔ, e binyumu Benhadad ba ye matsɛ ngɛ e se.

²⁵ Israel matsɛ, Yehoash ye Benhadad nɔ kunimi si etɛ, nɛ e kpɔ mahi nɛ Benhadad ngɔ benɛ lɛ, Yehoash ɔ tsɛ, Yehoahaz ngɛ matsɛ yee ngɛ Israel ɔ.