Matsɛmɛ II, 12 - BAIBLO ALOO NGMAMI KLƆUKLƆU Ɔ

Yuda matsɛ, Yoash

¹ Israel matsɛ, Yehu yi nɔ jeha nɛ ji kpaago ɔ, Yoash ba bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyingmi eywiɛ. E nyɛ biɛ ji Zibia, nɛ e je Beersheba ma a mi.

² Yoash pee Yawɛ suɔmi nya ní e wami be ɔ tsuo, ejakaa osɔfo Yehoyada ji nɔ nɛ tsɔse lɛ.

³ Se wɔ jami he ɔmɛ ɔ, e puɛ we mɛ; enɛ ɔ he je ɔ, ma a sãã bɔ, kɛ tsopa kɛ e he via ngɛ lejɛ ɔmɛ kɛ mwɔɔ.

⁴ Ligbi ko ɔ, Yoash de osɔfo ɔmɛ ke sika tsuo pɛpɛɛpɛ nɛ ma a kɛ baa Yawɛ we ɔ kaa nike ní klɔuklɔu ɔ, a ngɔ kɛ to. Lɔ ɔ ji sika nɛ nyumu tsuaa nyumu haa be mi nɛ a kane lɛ, sika nɛ nɔ tsuaa nɔ haa kɛ kpɔɔ e susuma, kɛ sika nɛ nɔ ko haa kɛ jeɔ lɛ nitsɛ e tsui mi.

⁵ Osɔfo tsuaa osɔfo nɛ e he sika a ngɛ lɛ nitsɛ e we asafo bi a dɛ, konɛ be tsuaa be nɛ e maa hia kaa a dla Yawɛ we ɔ, a ngɔ sika a kɛ dla lɛ.

⁶ Se kɛ ba si Matsɛ Yoash tsɛ yemi jeha nɛ ji nyingmi enyɔ kɛ etɛ ɔ, osɔfo ɔmɛ dla we Yawɛ we ɔ he ko he ko.

⁷ Lɔ ɔ he ɔ, Matsɛ Yoash tsɛ osɔfo Yehoyada, kɛ osɔfo kpa amɛ nɛ e de mɛ ke, “Mɛni he je nɛ nyɛ dla we Yawɛ we ɔ? Jehanɛ, nyɛ ko ngɔ sika ko ngɛ nyɛ asafo bi ɔmɛ a dɛ hu; sika tsuaa sika nɛ nyɛ nine maa su nɔ ɔ, nyɛɛ ngɔ kɛ ba nɛ a kɛ dla Yawɛ we ɔ.”

⁸ Osɔfo ɔmɛ kplɛɛ kaa a be sika ko ngɔe ngɛ ma a dɛ hu; mɛ nitsɛmɛ hu a be Yawɛ we ɔ dlae.

⁹ Osɔfo Yehoyada ngɔ daka ko ya ma bɔ sami la tɛ ɔ kasa nya, nɛ e gu puɔ ngɛ nya nɔ́ ɔ yi mi. Ke o yaa Yawɛ we ɔ, daka a ngɛ o hiɔ nɔ. Osɔfohi nɛ buɔ agbo ɔ nya a ngɔɔ sika tsuo nɛ ma a kɛ baa Yawɛ we ɔ kɛ woɔ daka nɛ ɔ mi.

¹⁰ Ke a na kaa sika a hiɛ ngɛ daka a mi ɔ, matsɛ pɛdiyo ɔ, kɛ osɔfo nɔkɔtɔma pe kulaa a maa ya Yawɛ we ɔ, nɛ a ma ya kane sika nɛ a na ngɛ lejɛ ɔ. Kɛkɛ a fi kɛ wo kotokuhi a mi.

¹¹ Lɔ ɔ se ɔ, a maa tu sika a kɛ wo Yawɛ we ɔ ní tsuli ɔmɛ a nɔ hyɛli ɔmɛ a dɛ. Mɛ hu a kɛ sika a maa wo tso he ní tsuli, tsu mali,

¹² gbogbo fiali, kɛ tɛ koli nɛ tsuɔ ní ngɛ Yawɛ we ɔ hiɔ. A kɛ sika nɛ ɔ eko ma he tso kɛ tɛ nɛ a kó, nɛ a kɛ ma dla Yawɛ we ɔ. A kɛ eko hu maa wo Yawɛ we ɔ dlami hiɔ kpahi.

¹³ Sika nɛ a kɛ baa Yawɛ we ɔ, a ngɔɛ eko kɛ pee we sika hiɔ kpluhi, la gbemi níhi, kahi kɛ titimatihi, aloo sika tsu níhi, aloo sika hiɔ ní kpa komɛ kɛ ha Yawɛ we ɔ.

¹⁴ Se mohu, a kɛ haa ní tsuli ɔmɛ, nɛ mɛ hu a kɛ dlaa Yawɛ we ɔ.

¹⁵ Ni nɛmɛ nɛ a kɛ sika a woɔ a dɛ loko mɛ hu a ngɔɔ kɛ haa ní tsuli ɔmɛ ɔ, a kɛ mɛ pee we sika a he akɔtaa; ejakaa a yeɔ anɔkuale saminya.

¹⁶ Fɔ yemi bɔ sika a, kɛ yayami pami bɔ sika a lɛɛ a ngɔɛ kɛ bɛ Yawɛ we ɔ; osɔfo ɔmɛ a nɔ ji lɔ ɔ nɛ.

¹⁷ Jamɛ a be ɔ, Siria matsɛ, Hazael ya tua Gat, nɛ e ngɔ ma a; nɛ e to e yi mi kaa e ma ya tua Yerusalem hulɔ.

¹⁸ Nike ní klɔuklɔuhi tsuo nɛ Yehoshafat, Yehoram, kɛ Ahazia, nɛ ji Yuda matsɛmɛ nɛ nyɛɛ Yoash hɛ mi ɔ gbaa nɔ kɛ ha Yawɛ ɔ, Matsɛ Yoash ngɔ. E kɛ lɛ nitsɛ e ní klɔuklɔu ɔmɛ, kɛ sika tsuo nɛ a na ngɛ Yawɛ we ɔ, kɛ matsɛ we ɔ nito he ɔmɛ piɛ he, nɛ e tsɔ nɛ a ngɔ ya ha Siria matsɛ, Hazael. Kɛkɛ nɛ Hazael kpale e se kɛ je Yerusalem.

¹⁹ Matsɛ Yoash he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

^20-21 Matsɛ Yoash tsɔli ɔmɛ so e yi nɔ nɛ a ti nihi enyɔ gbe lɛ ngɛ Milo we ɔ, ngɛ blɔ ɔ nɛ a guu kɛ yaa Sila a nɔ. Shimeat binyumu Yozakar, kɛ Shomer binyumu Yehozabad ji ni nɛmɛ nɛ gbe lɛ ɔ nɛ. A pu Yoash ngɛ matsɛmɛ ɔmɛ a yɔkɔ ɔ mi ngɛ David ma a mi, nɛ e binyumu Amazia ba ye matsɛ ngɛ e se.