Matsɛmɛ II, 11 - BAIBLO ALOO NGMAMI KLƆUKLƆU Ɔ

Yuda manyɛ, Atalia

¹ Benɛ Matsɛ Ahazia nyɛ Atalia na le kaa a gbe e binyumu ɔ, e ha nɛ a kpata matsɛ we mi bimɛ ɔmɛ tsuo a hɛ mi.

² Ahazia binyumu Yoash pɛ ji nɔ nɛ nine sui e nɔ. Bɔ nɛ e ba ji, Matsɛ Yehoram biyo Yehosheba, Ahazia nyɛmiyo ɔ, kú Yoash kɛ je matsɛ bimɛ ɔmɛ nɛ a ma mɛ gbemi ɔ a kpɛti. E ngɔ lɛ kɛ e bimɛanyɛ ɔ ya to se tsu ko mi ngɛ Yawɛ we ɔ kɛ laa Atalia; nɛ a gbi lɛ.

³ Yehosheba ngɔ jokuɛ nyumuyo ɔ kɛ laa ngɛ Yawɛ we ɔ jeha ekpa, be mi nɛ Atalia ngɛ manyɛ yee ngɛ zugba a nɔ ɔ.

⁴ Jeha nɛ ji kpaago ɔ mi ɔ, osɔfo Yehoyada tsɔ nɛ a ya kpee asafoatsɛmɛ ɔmɛ nɛ ngɛ matsɛ he buli ɔmɛ, kɛ matsɛ we bi a tabo ɔ nya a kɛ ba Yawɛ we ɔ. E kɛ mɛ so nɛ e ha a ka lɛ kita ngɛ Yawɛ we ɔ; nɛ e kɛ matsɛ binyumu ɔ tsɔɔ mɛ.

⁵ Lɔ ɔ se ɔ, e fa mɛ ke, “Bɔ nɛ nyɛ maa pee ji nɛ ɔ nɛ: nyɛ ni nɛmɛ nɛ nyɛ ma tsu ní Hejɔɔmi ligbi ɔ, nyɛ mi dlami etɛ mi kake ma ya bu ngɛ matsɛ we ɔ,

⁶ mi dlami etɛ mi kake maa bu Sur agbo ɔ nya; nɛ mi dlami etɛ mi kake hu maa bu agbo ɔ nɛ ngɛ buli ɔmɛ a se ɔ hu nya.

⁷ Asafo kuu enyɔ ɔmɛ nɛ ji nihi tsuo nɛ a be ní tsumi yae Hejɔɔmi ligbi ɔ, mɛɛ lɛɛ a maa bu matsɛ ɔ he ngɛ Yawɛ we ɔ.

⁸ Nyɛɛ po klaangma kɛ bɔle Matsɛ Yoash, nɛ́ nɔ tsuaa nɔ nɛ hɛɛ e ta hwumi níhi ngɛ e dɛ mi. He tsuaa he nɛ matsɛ ɔ yaa a, nyɛɛ kɛ lɛ nɛ ya. Ke nɔ ko hɛ lɛ kɛ su nyɛ he haa a, a gbe lɛ.”

⁹ Asafoatsɛmɛ ɔmɛ pee kaa bɔ nɛ osɔfo Yehoyada fa mɛ ɔ pɛpɛɛpɛ, nɛ nɔ tsuaa nɔ ngɔ e we bihi kɛ ba osɔfo Yehoyada ngɔ, ni nɛmɛ nɛ maa ba ní tsumi Hejɔɔmi ligbi ɔ, kɛ ni nɛmɛ nɛ ba tsu ní momo nɛ a kpa.

¹⁰ Osɔfo Yehoyada dla Matsɛ David akplɔhi nɛ ngɛ Yawɛ we ɔ kɛ ha asafoatsɛmɛ ɔmɛ.

¹¹ Buli ɔmɛ a ti nɔ tsuaa nɔ hɛɛ e ta hwumi níhi, nɛ a ya da a blɔ hehi, kɛ je Yawɛ we ɔ omleyi je kɛ ya si leneyi je ngɛ bɔ sami la tɛ ɔ, kɛ we ɔ hɛ mi; nɛ a bɔle matsɛ ɔ kɛ kpe.

¹² Jehanɛ, Yehoyada je matsɛbi ɔ kpo, nɛ e fi lɛ jlasi, nɛ e ngɔ mlaa womi ɔ kɛ wo e dɛ mi. Lɔ ɔ se ɔ, a pɔ Yoash nu, nɛ a wo lɛ matsɛ. Ni ɔmɛ fia a dɛ, nɛ a hwɔ lele, nɛ a de ke, “Matsɛ yi nɛ na wa!”

¹³ Benɛ manyɛ Atalia nu ngmlaa a nɛ buli ɔmɛ, kɛ ma mi bi ɔmɛ ngɛ kpae ɔ, e ba Yawɛ we ɔ he nɛ ma a bua a he nya ngɛ ɔ.

¹⁴ Benɛ e maa hyɛ ɔ, matsɛ ɔ ji nɛ ɔ nɛ daa si ngɛ titima a he kaa bɔ nɛ kusumi ɔ ngɛ ɔ. Asafoatsɛmɛ ɔmɛ, kɛ titimati kpali ɔmɛ daa si ngɛ e kasa nya, nɛ ma mi bi ɔmɛ tsuo ngɛ nyae nɛ a ngɛ titimati kpae. Kɛkɛ nɛ Atalia hía tade ɔmɛ ngɛ e he, nɛ e kpa ngmlaa nɛ e de ke, “Nyɛ tsɔ atuã! Nyɛ tsɔ atuã!”

¹⁵ Osɔfo Yehoyada sume kaa a gbe Atalia ngɛ Yawɛ we ɔ. Lɔ ɔ he ɔ, e fa tabo ɔ nya asafoatsɛmɛ ɔmɛ ke, “Nyɛ je lɛ kpo kɛ gu buli ɔmɛ a kpɛti; nɔ nɛ maa ka kaa e ma kpɔ lɛ ɔ, a gbe lɛ!”

¹⁶ A nu Atalia, nɛ a hɛɛ lɛ kɛ ya gu blɔ ɔ nɛ okpɔngɔ ɔmɛ guu nɔ kɛ yaa matsɛ we ɔ mi ɔ, nɛ a ya gbe lɛ ngɛ lejɛ ɔ.

Tsakemihi nɛ Yehoyada kɛ ba

¹⁷ Yehoyada ha Matsɛ Yoash, kɛ ma a kɛ Yawɛ so kaa a maa pee Yawɛ ma. Jehanɛ, e ha nɛ matsɛ ɔ kɛ ma a hu so.

¹⁸ Lɔ ɔ se ɔ, ma mi bi ɔmɛ tsuo ya sɛ Baal jami he ɔ, nɛ a gbɛ lɛ kɛ pue si. A ku bɔ sami la tɛ ɔmɛ, kɛ amaga amɛ dukuduku, nɛ a gbe Baal osɔfo ɔ nɛ a tsɛɛ lɛ Matan ɔ ngɛ bɔ sami la tɛ ɔmɛ a hɛ mi. Osɔfo Yehoyada ngɔ buli ya to Yawɛ we ɔ.

¹⁹ Lɔ ɔ se ɔ, e kɛ asafoatsɛmɛ ɔmɛ, matsɛ we ɔ buli ɔmɛ, matsɛ he buli ɔmɛ, kɛ ma a tsuo kpaka matsɛ ɔ kɛ je Yawɛ we ɔ kɛ ya gu buli agbo ɔ mi kɛ ya sɛ matsɛ we ɔ mi. Nɛ Yoash ya hi matsɛ sɛ ɔ nɔ.

²⁰ Ma mi bi ɔmɛ tsuo pɛpɛɛpɛ na bua jɔmi; nɛ kɛ je be nɛ a kɛ klaate gbe Atalia ngɛ matsɛ we ɔ mi se ɔ, ma a mi jɔ.

²¹ Yoash ye jeha kpaago benɛ e bɔni matsɛ yemi ngɛ Yuda ma a nɔ.