Matsɛmɛ II, 10 - BAIBLO ALOO NGMAMI KLƆUKLƆU Ɔ

A gbe Ahab bimɛ ɔmɛ

¹ Ahab ngɛ binyumuhi nyingmi kpaago ngɛ Samaria. Yehu ngma womi nɛ e tsɔ nɛ a kɛ ya ha Samaria ma nɔ yeli ɔmɛ, ma nimeli ɔmɛ, kɛ Ahab binyumu ɔmɛ a nɔ hyɛli ɔmɛ. Nɔ́ nɛ e ngma ngɛ womi ɔ mi ji,

² “Nyɛ nyɔmtsɛ ɔ binyumu ɔmɛ a nɔ hyɛli ji nyɛ; nɛ nyɛ ngɛ ta zugba lɛhi, okpɔngɔhi, ta hwumi níhi, kɛ ma nɛ a fia gbogbo ngɔ wo he. Lɔ ɔ he ɔ, ke nyɛ nine su womi nɛ ɔ nɔ pɛ,

³ nyɛɛ hyɛ nyɛ nyɔmtsɛ ɔ binyumu ɔmɛ a kpɛti nɔ nɛ hi, nɛ e hɛ mi hu wa pe mɛ tsuo, nɛ nyɛɛ ngɔ lɛ kɛ hi e tsɛ sɛ ɔ nɔ, nɛ nyɛɛ hwu ta kɛ fa nyɛ nyɔmtsɛ ɔ we ɔ he.”

⁴ Samaria ma nɔ yeli ɔmɛ a tsui po wawɛɛ nitsɛ, nɛ a de ke, “Nyɛɛ hyɛ! Matsɛmɛ enyɔ ɔmɛ po nyɛ we Yehu hɛ mi nɛ a da; kɛ wɔɔ wa maa pee kɛ da e hɛ mi kɛɛ?”

⁵ Lɔ ɔ he ɔ, matsɛ we ɔ nɔ hyɛlɔ ɔ, amlaalo ɔ nɛ ngɛ ma a mi ɔ, ma nimeli ɔmɛ, kɛ matsɛ binyumu ɔmɛ a nɔ hyɛli ɔmɛ tsɔ ya de Yehu ke, “O tsɔli ji wɔ; nɛ nɔ́ tsuaa nɔ́ nɛ o ma de wɔ ke waa pee ɔ, wa maa pee. Wɔɔ lɛɛ wa be nɔ ko nɔ ko matsɛ woe; nɔ́ nɛ sa o hɛ mi ɔ, moo pee.”

⁶ Yehu ngma mɛ womi enyɔne ke, “Ke nyɛ ngɛ ye se, nɛ nyɛ maa bu mi tue ɔ, lɛɛ hwɔɔ maa pee be nɛ ɔ mi ɔ, nyɛɛ ngɔ nyɛ nyɔmtsɛ ɔ binyumu ɔmɛ a yi koklodohi kɛ ba ha mi ngɛ Yezreel.” Matsɛ Ahab binyumu ɔmɛ a hiɛmi ji nyingmi kpaago, nɛ ma nɔ hyɛli ɔmɛ, kɛ ma nimeli ɔmɛ ji ni nɛmɛ nɛ ngɛ a nɔ hyɛe.

⁷ Benɛ Yehu womi ɔ ba su Samaria ma nimeli ɔmɛ a dɛ ɔ, a nuu matsɛ binyumu nyingmi kpaago ɔmɛ nɛ a gbe mɛ. Lɔ ɔ se ɔ, a ngɔ a yi koklodo ɔmɛ kɛ wo kusiihi a mi; nɛ a tsɔ nɛ a kɛ ya ha Yehu ngɛ Yezreel.

⁸ Benɛ tsɔlɔ ɔ ya de Yehu ke a ngɔ matsɛ binyumu ɔmɛ a yi koklodo ɔmɛ kɛ ba a, Yehu fa ke a to mɛ kuukuu enyɔ ngɛ ma a agbo ɔ nya kɛ yaa si mɔtu.

⁹ E nɔ jena mɔtu ɔ, Yehu ho ya da ma a agbo ɔ nya; nɛ e de ma a tsuo ke, “Imi ji nɔmlɔ nɛ so matsɛ Yoram yi nɔ, nɛ imi nɔuu lɛ i gbe lɛ; nyɛɛ lɛɛ nyɛ yi fɔ. Se ni nɛ ɔmɛ lɛɛ mɛnɔ ji nɔ nɛ gbe mɛ tsuo?

¹⁰ Lɔ ɔ he ɔ, nyɛ ná nɛ nyɛɛ le kaa nɔ́ tsuaa nɔ́ nɛ Yawɛ de ngɛ Ahab we ɔ he ɔ, ekoeko be yaka pee. Nɔ́ nɛ Yawɛ de kɛ gu e tsɔlɔ Eliya nɔ ke e maa pee ɔ, lɔ ɔ e pee nɛ ɔ nɛ.”

¹¹ Enɛ ɔ se ɔ, Yehu gbe nihi tsuo pɛpɛɛpɛ nɛ piɛ ngɛ Ahab we ɔ mi ngɛ Yezreel, nimli ngua amɛ, e huɛmɛ kpakpa amɛ, kɛ osɔfo ɔmɛ tsuo; e píɛ a ti nɔ kake po.

A gbe matsɛ Ahazia nyɛmimɛ ɔmɛ

¹² Jehanɛ Yehu je Yezreel kɛ ho Samaria ya. Benɛ e ya su he ko nɛ a tsɛɛ “To hyɛli a hwɔ he” ɔ,

¹³ e kɛ Yuda matsɛ, Ahazia nyɛmimɛ ɔmɛ kpe. E bi mɛ ke, “Mɛnɔmɛ ji nyɛ?” A he nɔ ke, “Ahazia nyɛmimɛ ji wɔ. Wa yaa nɛ wa ya slaa matsɛ binyumu ɔmɛ, kɛ manyɛ binyumu ɔmɛ.”

¹⁴ Yehu de e we bi ɔmɛ ke, “Nyɛɛ nuu mɛ hɛ ngmengmle!” A nuu mɛ hɛ ngmengmle, nɛ a gbe mɛ ngɛ muɔ ko kasa nya ngɛ lejɛ ɔ. A gbe nimli nyingmi eywiɛ kɛ enyɔ sɔuu; nɔ kake po píɛ.

A gbe Ahab nyɛmimɛ ɔmɛ tsuo nɛ piɛ ɔ

¹⁵ Benɛ Yehu je lejɛ ɔ, e kɛ Rekab binyumu Yehonadab ya kpe ngɛ blɔ ɔ nɔ. Yehu nga lɛ, nɛ e bi lɛ ke, “Bɔ nɛ ye tsui mi ngɛ faa ngɛ o he ɔ, ja mo hu o nɔ́ ɔ ngɛ lo?” Yehonadab he nɔ ke, “Ee, ye tsui mi ngɛ faa.” Yehu de lɛ ke, “Ke ja a, lɛɛ moo ta ye dɛ mi.” A ta a sibi a dɛ mi, nɛ Yehu ngɔ lɛ kɛ wo e ta zugba lɛ ɔ mi;

¹⁶ nɛ e de lɛ ke, “Ha waa ho nɛ o ya hyɛ kɛ o hɛngmɛ níhi nɛ i pee ha Yawɛ.” Nɛ e kɛ lɛ hi ta zugba lɛ ɔ mi kɛ ho Samaria ya.

¹⁷ Benɛ a ya su lejɛ ɔ, Yehu gbe Ahab nyɛmimɛ ɔmɛ tsuo nɛ piɛ ngɛ lejɛ ɔ. E kpata mɛ tsuo pɛpɛɛpɛ a hɛ mi; nɔ kake ngmelu po píɛ. Nɔ́ nɛ Yawɛ de Eliya ke e maa ba mi ji nɛ ɔ nɛ.

A gbe Baal jali ɔmɛ

¹⁸ Enɛ ɔ se ɔ, Yehu bua ma a tsuo nya nɛ e de mɛ ke, “Ahab ja Baal bɔɔ pɛ; se imi Yehu lɛɛ ma ja lɛ wawɛɛ nitsɛ.

¹⁹ Lɔ ɔ he ɔ, nyɛɛ ya nɛ nyɛ ya kpee Baal gbali ɔmɛ, Baal jali ɔmɛ, kɛ Baal wɔnɔ ɔmɛ tsuo pɛpɛɛpɛ kɛ ba ha mi; a ko si nɔ ko nɔ ko. I ma nɛ ma ba sã bɔ ngua ko ha Baal; nɔ nɛ bɛ ɔ, a maa gbe lɛ.” (Blɔɔ ga nɛ Yehu to nɛ e kɛ ma kpata Baal jali ɔmɛ a hɛ mi ji nɛ ɔ nɛ.)

²⁰ Jehanɛ, Yehu fa ke a fiɛ nɛ a kɛ kpee ma a kɛ ba ye nyami ligbi pɔtɛɛ ko kɛ wo Baal hɛ mi nyami; nɛ a pee ja.

²¹ Yehu tsɔ nɛ a ya kpee Israel ma a, kɛ Baal jali ɔmɛ tsuo kɛ ba Baal piɛ ɔ mi. Baal piɛ ɔ mi hyi tɔ kɛ nimli; e piɛ nɔ ko nɛ bɛ.

²² Kɛkɛ nɛ Yehu de nɔ nɛ hyɛɛ tade ɔmɛ a nɔ ɔ ke, “Je tade ɔmɛ kpo, nɛ o dla kɛ ha Baal jali ɔmɛ tsuo!”

²³ Enɛ ɔ se ɔ, Yehu kɛ Rekab binyumu Yehonadab sɛ Baal piɛ ɔ mi; nɛ Yehu de Baal jali ɔmɛ ke, “Nyɛɛ hyɛ nɛ Yawɛ tsɔlɔ ko nɛ ko ba futu nyɛ ngɛ hiɛ ɔ, kaa ja Baal jali ɔmɛ pɛ.”

²⁴ Jehanɛ e kɛ Yehonadab ya bɔni bɔhi, kɛ sami bɔhi sami. Jamɛ a be ɔ, Yehu ngɔ nimli nyingmi kpaanyɔ kɛ to kpo ɔ nya, nɛ e de mɛ ke, “Nimli nɛ ɔmɛ nɛ i ngɔ kɛ wo nyɛ dɛ ɔ, nyɛɛ gbe mɛ tsuo pɛpɛɛpɛ. Ke a ti nɔ ko ma fo ɔ, a maa gbe nɔ nɛ ha nɛ e je ɔ ngɔ to nya.”

²⁵ Benɛ a dla bɔ sami ní ɔmɛ ta a, Yehu de buli ɔmɛ, kɛ asafoatsɛmɛ ɔmɛ ke, “Nyɛɛ ya nɛ nyɛ ya gbe mɛ tsuo; nyɛ ko ha nɛ nɔ ko nɛ je kpo!” Kɛkɛ nɛ buli ɔmɛ, kɛ asafoatsɛmɛ ɔmɛ kɛ klaate gbe ni ɔmɛ, nɛ a sake mɛ kɛ pue kpo ɔ nɔ. Lɔ ɔ se ɔ, a ya sɛ Baal wɔ tsu ɔ mi,

²⁶ nɛ a ya muɔ amagahi nɛ ngɛ lejɛ ɔ, nɛ a sã mɛ.

²⁷ A ku Baal amaga a ngɔ pue si, nɛ a gbɛ piɛ ɔ; nɛ a ngɔ lejɛ ɔ kɛ pee agbotso kɛ ba si mwɔnɛ ɔ.

²⁸ Bɔ nɛ Yehu pee nɛ e gu Baal jami ngɛ Israel ji nɛ ɔ nɛ.

²⁹ Se lɛ hu e ya wo Matsɛ Yeroboam, Nebat binyumu ɔ nane; nɛ e pee yayami. Lɔ ɔ ji sika tsu na bi ɔmɛ nɛ Yeroboam pee kɛ ma Betel kɛ Dan nɛ e ha Israel ja mɛ, nɛ lɔ ɔ plɛ yayami ha mɛ ɔ, Yehu hu ya nɔ nɛ e ja mɛ ja nɔuu.

³⁰ Yawɛ de Yehu ke, “Nɔ́ tsuaa nɔ́ nɛ o pee ɔ sa ye hɛ mi; bɔ nɛ i to nɛ ma pee Ahab we ɔ, ja o pee ɔ nɛ. Enɛ ɔ he ɔ, o bimɛ maa hi Israel matsɛ sɛ ɔ nɔ kɛ yaa si yi nɔ eywiɛne ɔ.”

³¹ Se Yehu yi Yawɛ, Israel Mawu ɔ mlaa a nɔ kɛ e tsui tsuo. Mohu ɔ, e ya wo Yeroboam, nɔ nɛ ha Israel pee yayami ɔ nane.

Yehu gbenɔ

³² Jamɛ a be ɔ, Yawɛ bɔni Israel zugba a he pomi. Siria matsɛ, Hazael ye Israel zugba a tsuo nɔ,

³³ kɛ je Yordan pa a beleku je kɛ ya si Aroer, ngɛ Arnon pa a nya, ngɛ omleyi je tɔɔ. Enɛ ɔ ji Gilead bi, kɛ Bashan bi a zugba a hehi nɛ Gad wɛtso ɔ, Ruben wɛtso ɔ, kɛ Manase nɔ́ fa a hi ɔ nɛ.

³⁴ Yehu he sane kpahi, e kã, kɛ níhi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

³⁵ Yehu ba gbo nɛ a pu lɛ ngɛ Samaria; nɛ e binyumu Yehoahaz ba ye matsɛ ngɛ e se.

³⁶ Yehu ye Israel nɔ matsɛ ngɛ Samaria jeha nyingmi enyɔ kɛ kpaanyɔ.