Matsɛmɛ II, 1 - BAIBLO ALOO NGMAMI KLƆUKLƆU Ɔ

Eliya kɛ Matsɛ Ahazia

¹ Israel matsɛ, Ahab gbenɔ se ɔ, Moab ma a tsɔ Israel hɛ mi atuã.

² Ligbi ko ɔ, Israel matsɛ, Ahazia tsɔ́ kɛ je e hiɔwe tsu nɛ ngɛ Samaria a saflɛ mi kɛ ba nɔ si, nɛ e plaa wawɛɛ nitsɛ. Enɛ ɔ he ɔ, e tsɔ nihi ke a ya bi ní ngɛ Baalzebub ngɔ ha lɛ kaa e yi ma na wami lo. Baalzebub ji mawu nɛ ngɛ Filisti bi ɔmɛ a ma nɛ a tsɛɛ Ekron ɔ nɛ.

³ Se Yawɛ bɔfo ɔ de gbalɔ Eliya nɛ je Tishbe ɔ ke e ya nɛ e kɛ Matsɛ Ahazia tsɔli ɔmɛ ya kpe, nɛ e bi mɛ ke, “Mɛni he je nyɛ yaa bi ní ngɛ Ekron mawu Baalzebub ɔ ngɔ ɔ? Anɛ Mawu be Israel lo?

⁴ Nyɛɛ ya nɛ nyɛ ya de matsɛ ɔ ke, Yawɛ ke, ‘Plaami ɔ nɛ o plaa a, o yi be wami nae; o ma gbo!’ ” Eliya pee kaa bɔ nɛ Yawɛ de lɛ ɔ,

⁵ nɛ tsɔli ɔmɛ kpale a se kɛ ho matsɛ ɔ ngɔ ya. Matsɛ Ahazia bi mɛ ke, “Mɛni he je nyɛ kpale kɛ ba a?”

⁶ A he nɔ ke, “Nyumu ko kɛ wɔ ba kpe ngɛ blɔ ɔ nɔ, nɛ e de wɔ ke waa kpale wa se nɛ wa ba de mo ke, Yawɛ ke, ‘Mɛni he je o tsɔ ke a ya bi ní ngɛ Ekron mawu Baalzebub ɔ ngɔ ɔ? Anɛ Mawu be Israel lo? Plaami ɔ nɛ o plaa a, o yi be wami nae; o ma gbo!’ ”

⁷ Matsɛ ɔ bi mɛ ke, “Nyumu ɔ nɛ kɛ nyɛ kpe nɛ e de nyɛ ní nɛ ɔmɛ ɔ, kɛ e ngɛ kɛɛ?”

⁸ A he nɔ ke, “Bwɔmitsɛ ji lɛ, nɛ e kɛ mlɛ mi fimi nɔ́ nɛ a kɛ lohwe he womi pee fi e mlɛ mi.” Kɛkɛ nɛ matsɛ ɔ de ke, “Lɛ ji Eliya, Tishbe no ɔ!”

⁹ Enɛ ɔ se ɔ, matsɛ ɔ tsɔ asafoatsɛ kake kɛ e we bihi nyingmi enuɔ ke a ya ngɔ Eliya kɛ ba. Asafoatsɛ ɔ ya na lɛ nɛ e hii si ngɛ yoku ko yi mi, nɛ e de lɛ ke, “Mawu nɔmlɔ, matsɛ ɔ ke o kple si nɛ o ba!”

¹⁰ Eliya he nɔ ke, “Ke Mawu nɔmlɔ ji mi ɔ, lɛɛ la nɛ e je hiɔwe ba sã mo kɛ o we bihi nyingmi enuɔ ɔmɛ!” Kɛkɛ nɛ la je hiɔwe ba sã asafoatsɛ ɔ kɛ e we bi nyingmi enuɔ ɔmɛ.

¹¹ Matsɛ ɔ tsɔ asafoatsɛ kpa, kɛ lɛ hu e we bihi nyingmi enuɔ kɛ ho, nɛ a ya de Eliya ke, “Mawu nɔmlɔ, matsɛ ɔ ke o kple si kɛ ba esɔ!”

¹² Eliya he nɔ ke, “Ke Mawu nɔmlɔ ji mi ɔ, lɛɛ la nɛ e je hiɔwe ba sã mo kɛ o we bihi nyingmi enuɔ ɔmɛ!” Kɛkɛ nɛ Mawu la a je hiɔwe ba sã asafoatsɛ ɔ kɛ e we bihi nyingmi enuɔ ɔmɛ.

¹³ Matsɛ Ahazia tsɔ asafoatsɛ etɛne, kɛ lɛ hu e we bihi nyingmi enuɔ. Benɛ asafoatsɛ etɛne nɛ ɔ ya su yoku ɔ nɔ ɔ, e kpla si ngɛ Eliya hɛ mi nɛ e fa kue ha lɛ ke, “Mawu nɔmlɔ, i kpa mo pɛɛ, ha nɛ i kɛ o tsɔli nyingmi enuɔ nɛ ɔmɛ wa wami he nɔ́ nɛ dɔ mo.

¹⁴ Hyɛ, la je hiɔwe ba sã asafoatsɛmɛ enyɔ ɔmɛ kɛ a we bihi nyingmi enuɔɔnuɔ nɛ a sɛ hlami ɔ; i kpa mo pɛɛ nɛ o na imi lɛɛ mɔbɔ.”

¹⁵ Yawɛ bɔfo ɔ de Eliya ke, “Kple si nɛ o kɛ lɛ nɛ ya; koo ye gbeye.” Kɛkɛ nɛ Eliya kɛ asafoatsɛ ɔ ho matsɛ ɔ ngɔ ya,

¹⁶ nɛ e ya de lɛ ke, “Yawɛ ke, ‘Akɛnɛ o tsɔ ya bi ní ngɛ Ekron mawu Baalzebub ɔ ngɔ, kaa nɔ́ nɛ Mawu be Israel nɛ a ma bi lɛ ga womi he je ɔ, o yi be wami nae; o ma gbo!’ ”

¹⁷ Ahazia gbo niinɛ kaa bɔ nɛ Yawɛ gu Eliya nɔ de to ɔ. Nɛ akɛnɛ Ahazia be binyumu he je ɔ, e nyɛminyumu Yoram ba ye matsɛ ngɛ e se ngɛ Yuda matsɛ, Yehoram nɛ ji Yehoshafat binyumu ɔ yi nɔ jeha enyɔne ɔ mi.

¹⁸ Ni kpahi tsuo nɛ Matsɛ Ahazia pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.