Matsɛmɛ I, 9 - BAIBLO ALOO NGMAMI KLƆUKLƆU Ɔ

Mawu je e he kpo kɛ tsɔɔ Salomo ekohu

¹ Benɛ Salomo gbe Yawɛ we ɔ, kɛ matsɛ we ɔ, kɛ kɛ we kpahi nɛ e suɔ kaa e maa ma a tsuo a nya a,

² Yawɛ je e he kpo ngɔ tsɔɔ lɛ ekohu kaa bɔ nɛ e pee ngɛ Gibeon ɔ.

³ Yawɛ de lɛ ke, “I nu o kue fami ɔ. I pee we nɛ o po nɛ a ja mi ngɛ mi nɛ ɔ klɔuklɔu kɛ yaa neneene. Ma hyɛ we ɔ nɔ, nɛ ma bu he daa.

⁴ Ke o ma sɔmɔ mi kɛ o tsui tsuo, nɛ o maa ye mi anɔkuale kaa bɔ nɛ o tsɛ David pee ɔ; nɛ o maa ye ye mlaa amɛ a nɔ, nɛ o maa pee nɔ́ tsuaa nɔ́ nɛ i fa mo ke o pee ɔ;

⁵ lɛɛ si ko nɛ i wo o tsɛ David ɔ, ma ye nɔ. Imi lɛ i de lɛ ke ma ha e nina maa ye tsɛ ngɛ Israel kɛ maa ya neneene ɔ nɛ.

⁶ Se ke mo, loo o nina jɔɔ ye se nyɛɛmi, ke nyɛ yi mlaa amɛ nɛ i wo nyɛ ɔ, kɛ blɔ nya tomi ɔmɛ a nɔ, nɛ nyɛ ya sɔmɔ mawu kpahi nɛ nyɛ ja mɛ ɔ,

⁷ lɛɛ ma je ye ma, Israel kɛ je zugba a nɛ i ha mɛ ɔ nɔ. We nɛ ɔ hu nɛ i pee klɔuklɔu nɛ a ja mi ngɛ mi ɔ, ma je ye nine ngɛ he. Je ma amɛ tsuo pɛpɛɛpɛ maa wo Israel la, nɛ a maa ye e he fɛu.

⁸ We nɛ ɔ maa pee we doku, nɛ nɔ tsuaa nɔ nɛ bee ɔ he mi ma jɔ̃, nɛ e nya maa kpɛ e he; nɛ e ma bi ke, ‘Mɛni he je nɛ Yawɛ pee zugba nɛ ɔ, kɛ we nɛ ɔ kikɛ nɛ ɔ?’

⁹ Nɛ nihi ma he nɔ ke, ‘Ejakaa a kua Yawɛ, a Mawu ɔ nɛ je mɛ kɛ je Egipt zugba a nɔ ɔ. A kɛ a he ya mɛtɛ mawu kpahi a he; a ja mɛ, nɛ a sɔmɔ mɛ. Enɛ ɔ he je nɛ Yawɛ kɛ haomi nɛ ɔ ba a nɔ ɔ nɛ.’ ”

Salomo kɛ Hiram so

¹⁰ Salomo kɛ jeha nyingmi enyɔ ma Yawɛ we ɔ, kɛ matsɛ we ɔ.

¹¹ Tiro matsɛ, Hiram ji nɔ nɛ ha Salomo seda, sɛsɛo, kɛ sika tsu tsuo nɛ hia lɛ kɛ ha ní tsumi ɔ. Benɛ a gbe ní tsumi ɔ nya a, Matsɛ Salomo ha Hiram ma nyingmi enyɔ ngɛ Galilea zugba a nɔ.

¹² Se benɛ Hiram je Tiro kɛ ba hyɛ ma amɛ nɛ Salomo ha lɛ ɔ, e sume.

¹³ Lɔ ɔ he ɔ, e bi Salomo ke, “Ye nyɛmi, mahi nɛ o ha mi ji nɛ ɔmɛ lo?” Enɛ ɔ he je ɔ, biɛ nɛ a kɛ tsɛɔ ma amɛ kɛ ba si mwɔnɛ ɔ ji Kabul.

¹⁴ Blɔɔ Hiram ngɔ sika tsu kilo akpe eywiɛ ngɔ mane Salomo momo.

Salomo ní tsumi kpa komɛ

¹⁵ Matsɛ Salomo nyɛ nihi a nɔ kɛ tsu ma ní tsumi kpakpataa, nɛ e kɛ ma Yawɛ we ɔ, matsɛ we ɔ, Milo mɔ ɔ, Yerusalem gbogbo ɔ, Hazor, Megido, kɛ Gezer ma amɛ.

¹⁶ (Be ko ɔ, Egipt matsɛ ɔ ya tua Gezer, nɛ e ngɔ ma a. E gbe Kanaan bi ɔmɛ nɛ a ngɛ lejɛ ɔ, nɛ e sã ma a. Pee se ɔ, e kɛ ma nɛ ɔ ke e biyo kaa blɔ womi ní benɛ e ya gba Matsɛ Salomo ɔ,

¹⁷ nɛ Salomo dla po ma a ehe.) Jehanɛ, Salomo po ma nɛ ɔmɛ hulɔ: Bet Horon nɛ ngɛ sisi je ɔ,

¹⁸ Baalat, Tamar ngɛ Yuda nga a nɔ ɔ,

¹⁹ mahi nɛ a toɔ Salomo níhi ngɛ a mi ɔ, mahi he nɛmɛ nɛ e we okpɔngɔ ɔmɛ, kɛ ta zugba lɛ ɔmɛ ngɛ ɔ, kɛ hɛja jemi mahi ngɛ Yerusalem, kɛ Lebanon, kɛ e nɔ yemi he kpa amɛ tsuo.

^20-21 Benɛ Israel bi ɔmɛ ya ngɔ Kanaan zugba a, Kanaan bi nɛ piɛ ngɛ lejɛ ɔ nɛ Israel bi ɔmɛ gbi mɛ ɔ, mɛ ji nihi nɛ Matsɛ Salomo nyɛ a nɔ kɛ tsu nyɔguɛ ní tsumi kpakpataa nɛ ɔmɛ ɔ. Mɛ ji Amor bi, Hit bi, Periz bi, Hiv bi, kɛ Yebus bi nɛ a nina ngɛ nyɔguɛ yee we kɛ ba si mwɔnɛ ligbi nɛ ɔ.

²² Israel bi ɔmɛ nitsɛmɛ lɛɛ Salomo ngɔɛ a ti nɔ ko nɔ ko kɛ pee we nyɔguɛ; mɛɛ a tsu ní kaa e ta buli, tsɔli, asafoatsɛmɛ, ta zugba lɛ nyatsɛmɛ, kɛ okpɔngɔ ta buli.

²³ Tsɔli nikɔtɔmahi nɛ ngɛ Salomo ní tsumi ɔmɛ a nya, nɛ a hyɛɛ ní tsuli slɔɔto ɔmɛ a nɔ ɔ, a hiɛmi ji 550.

²⁴ Benɛ Farao ɔ biyo, nɛ ji Salomo yo ɔ klɛ kɛ je David ma a mi kɛ ho lɛ nitsɛ e we nɛ Salomo po ha lɛ ɔ mi ya a, jamɛ a be ɔ nɛ Salomo ma Milo mɔ ɔ nɛ.

²⁵ Si etɛ ngɛ jeha mi ɔ, Salomo sãã sami bɔ, kɛ tue mi jɔmi bɔ ngɛ bɔ sami la tɛ ɔ nɛ e puɛ kɛ ha Yawɛ ɔ nɔ. E sãã tsopa kɛ e he via hulɔ kɛ haa Yawɛ. Jehanɛ, Salomo gbe Yawɛ we ɔ nya.

²⁶ Matsɛ Salomo kpɛ lɛhi babauu hulɔ ngɛ Eziongeber nɛ ngɛ Elat kasa nya a, ngɛ Wo Tsu ɔ nya ngɛ Edom zugba a nɔ.

²⁷ Matsɛ Hiram wo e we akua hluili komɛ nɛ a nine si wa kɛ ní tsumi blɔ kɛ ya piɛ Salomo tsɔli ɔmɛ a he.

²⁸ A hlui lɛ kɛ ya Ofir zugba a nɔ, nɛ a ya ngɔ sika tsu kilo akpe nyɔngma kɛ eywiɛ ngɛ lejɛ ɔ kɛ ba ha Matsɛ Salomo.