Matsɛmɛ I, 7 - BAIBLO ALOO NGMAMI KLƆUKLƆU Ɔ

Matsɛ Salomo nitsɛ e we ɔ

¹ Salomo po lɛ nitsɛ e we hulɔ; e ngɔ jeha nyɔngma kɛ etɛ kɛ gbe we ɔ nya.

^2-3 Tsuhi nɛ ngɛ matsɛ we ɔ mi ɔ, a tsɛɛ kake ke Lebanon hue tsu. E kami ji gugue nyingmi enyɔ kɛ enuɔ, e blimi gugue nyɔngma kɛ enyɔ kɛ fa, kɛ e hiɔwe yami gugue kpaago kɛ fa. Lebanon hue tsu nɛ ɔ ngɛ seda titimahi zã etɛ nɛ a kɛ seda plaihi ma a nɔ; seda titima nyɔngma kɛ enuɔ ngɛ zã tsuaa zã mi. A kɛ seda sɛu tsu ɔ nɔ kɛ be ngɛ nito he ɔmɛ nɛ maa si ngɛ titima amɛ a nɔ ɔ.

⁴ Kasa nya gbogbo enyɔ ɔmɛ nɛ a ngɛ hiɛ kɛ hiɛ ɔ, saflɛhi zã etɛ ngɛ eko tsuaa eko he.

⁵ Sinya tso ɔmɛ, kɛ saflɛ tso ɔmɛ tsuo hɛɛ kɔ nya eywiɛɛywiɛ, nɛ saflɛhi zã etɛ ɔmɛ nɛ ngɛ gbogbo enyɔ ɔmɛ a he ɔ, a pee mɛ hanɔhanɔ kɛ kpee a sibi.

⁶ Tsu ɔ kpa biɛ ji titimahi a kue. E kami ji gugue nyɔngma kɛ enyɔ kɛ fa, e blimi gugue kpaago kɛ fa. Kue wayoo ko kɛ e yi mi gba, kɛ titimahi ngɛ he.

⁷ Matsɛ Salomo je tsu ha matsɛ sɛ ɔ, nɛ lejɛ ɔ e hii kɛ buaa sanehi a he. Tsu nɛ ɔ, a tsɛɛ lɛ kojomi kue; nɛ a kɛ seda ka mi kɛ je zugba kɛ ya si akpale ɔmɛ a he.

⁸ Salomo hi he ɔ nitsɛ nɛ ngɛ kue kpa ko mi ngɛ kojomi kue ɔ se ɔ, e pee lɛ kaa tsu kpa amɛ nɔuu; nɛ e po jamɛ a we ɔ eko kɛ ha e yo nɛ ji Egipt matsɛ ɔ biyo ɔ.

⁹ Tsu nɛ ɔmɛ tsuo, kɛ kue nguaa a, tɛ nɛ he jua wa nɛ a kɛ pee mɛ kɛ je sisi tomi ɔ nɔ kɛ ya si siaudo ɔ he. A susu tɛ ɔmɛ loko a kó, nɛ a kɛ sau dla a hɛ mi, kɛ a se.

¹⁰ Tɛ nguanguahi, kɛ tɛhi nɛ a he jua wa saminya nɛ a kɛ to tsu ɔ sisi; tɛ ɔmɛ ekomɛ a kami ji nine mi blimi nyɔngma kɛ ekpa, nɛ ekomɛ hu a kami ji nine mi blimi nyingmi enyɔ.

¹¹ E nɔ nɛ a fia a, lɔ ɔ hu tɛhi nɛ a he jua wa, nɛ a susu nɛ a kó, kɛ seda a kɛ pee.

¹² Matsɛ we mi kue nguaa a, kpɛti kue ɔ nɛ ngɛ Yawɛ we ɔ, kɛ wayoo ɔ nɛ ngɛ agbo ɔ nya a, tɛ nɛ a kó gbaka etɛ, kɛ seda plai gbaka kake nɛ a kɛ pee gbogbo ɔmɛ.

Huram ní tsumi

¹³ Matsɛ Salomo tsɔ nɛ a ya ngɔ nyumu ko nɛ a tsɛɛ lɛ Huram kɛ je Tiro kɛ ba.

¹⁴ Yalɔyo ko nɛ je Naftali wɛtso ɔ mi ɔ bi ji lɛ; e tsɛ lɛɛ e je Tiro, nɛ akɔblee ga ní tsulɔ ji lɛ. Huram hu akɔblee ga ní tsulɔ kpanaa ji lɛ; nɛ e ba Salomo ngɔ nɛ e ba tsu akɔblee ní tsumi ɔ tsuo.

Akɔblee titima enyɔ ɔmɛ

¹⁵ Huram pee akɔblee titima enyɔ; kake hiɔwe yami ji nine mi blimi nyingmi etɛ kɛ ekpa nɛ kpa nɛ kami ji nine mi blimi nyingmi enyɔ kɛ eywiɛ maa kpe he. Puɔ ngɛ a mi, nɛ eko tsuaa eko timi ji nine nguɛ mi eywiɛ.

¹⁶ Jehanɛ, e pee akɔblee kpɔ enyɔ kɛ ma titima amɛ a yi mi; kake hiɔwe yami ji nine mi blimi nyɔngma.

¹⁷ E pee ya enyɔ nɛ a lo, kɛ mɔmɔ jlasi nɛ a pee kaa kɔsɔkɔsɔ ngɔ ma titima enyɔ ɔmɛ a yi mi.

¹⁸ E pee kpɔ kokloohi kaa tso yiblii gbaka enyɔ ngɔ wo ya a eko tsuaa eko he kɛ kpe, nɛ e ngɔ kɛ ha titima amɛ a yi mi kpɔ ɔmɛ a nɔ.

¹⁹ Kpɔ ɔmɛ nɛ maa si ngɛ titima amɛ a yi mi ɔ, a pee mɛ kaa mɔmɔ, nɛ eko tsuaa eko hiɔwe yami ji nine mi blimi kpaanyɔ.

²⁰ A pee nɔ́ kokloo ko ngɛ ya a nɛ ngɛ titima a yi mi ɔ kasa nya, nɛ lɔ ɔ mi kpɔ ɔmɛ ngɛ ɔ nɛ. A pee kpɔ kokloo lafa enyɔ ngɛ gbaka enyɔɔnyɔ mi kɛ bɔle kpɔ tsuaa kpɔ.

²¹ Huram ngɔ akɔblee titima enyɔ nɛ ɔmɛ ngɔ ma Yawɛ we ɔ agbo ɔ nya; e wo nɔ́ nɛ maa si ngɛ leneyi je ɔ biɛ ke Yakin, nɛ e wo omleyi je nɔ́ ɔ biɛ ke Boaz.

²² Akɔblee kpɔ ɔmɛ nɛ a pee kaa mɔmɔ ɔ maa si ngɛ titima amɛ a yi mi. Bɔ nɛ a pee nɛ a kɛ gbe titima amɛ a he ní tsumi nya ji nɛ ɔ nɛ.

Akɔblee nyu nɔ́ ɔ

²³ Huram pee akɔblee nyu nɔ́ ko; e ngɛ kokloo, nɛ e mi kuɔmi ji nine mi blimi nyɔngma. Kɛ je e nya hiɛ kɛ ya si hiɛ ɔ, e peeɔ nine mi blimi nyingmi enyɔ nɛ kpa nɛ kami ji nine mi blimi nyingmi ekpa maa kpe he.

²⁴ A pee akɔblee tɔhi gbaka enyɔ kɛ bɔle nyu nɔ́ ɔ kuɔ si kɛ kpe; a sile akɔblee kɛ pee mɛ kɛ nyu nɔ́ ɔ tsuo kake.

²⁵ Nyu nɔ́ ɔ maa si ngɛ akɔblee na nyɔngma kɛ enyɔ a nɔ; etɛ plɛ a hɛ mi ngɔ kpee omleyi je; etɛ plɛ a hɛ mi ngɔ kpee bonyoku je; etɛ plɛ a hɛ mi ngɔ kpee leneyi je, nɛ etɛ hu plɛ a hɛ mi ngɔ kpee beleku je. Mɛ tsuo a plɛ a se ngɔ wo nyu nɔ́ ɔ.

²⁶ Nyu nɔ́ ɔ timi ngɛ kaa dɛ mi blimi. A pee e nya kaa bɔ nɛ kplu nya ngɛ ɔ, kaa mɔmɔ nɛ blɛke, nɛ nyu maa pee buɛ akpe enyɔ lɛ yaa mi.

Akɔblee tlɔɔke ɔmɛ

²⁷ Huram pee akɔblee tlɔɔke nyɔngma; tlɔɔke kake kami ji nine mi blimi kpaanyɔ, e blimi nine mi blimi kpaanyɔ, kɛ e hiɔwe yami nine mi blimi ekpa.

²⁸ Bɔ nɛ e pee mɛ ha ji nɛ ɔ nɛ: e pee akɔblee ní komɛ kɔ nya eywiɛɛywiɛ nɛ a kɛ hɔɔ akɔblee sinya tsohi a mi.

²⁹ E pee jatahi, na kuhi, kɛ kerubhi ngɛ akɔblee ní kɔ nya eywiɛɛywiɛ ɔmɛ a nɔ; nɛ e pee mɔmɔ jlasi saminyawiiwi ngɛ jata amɛ, kɛ na ku ɔmɛ a nɔ ngɛ hɛ mi, kɛ se tsuo.

³⁰ Tlɔɔke tsuaa tlɔɔke ngɛ nane eywiɛ kɛ a mi tsohi nɛ a kɛ akɔblee pee. E sile akɔblee ngɔ mɛtɛ tlɔɔke tsuaa tlɔɔke kɔ nya eywiɛ ɔmɛ, nɛ́ a kɛ kã maa ma nɔ; e pee mɔmɔ jlasi ngɔ wo eko tsuaa eko he.

³¹ E pee kla lokotoo ko nɛ maa hɛɛ kã a ngɔ ma nɔ. E nya je kpo ngɛ tlɔɔke ɔ yi mi nine mi blimi enyɔ, nɛ e sɛ mi nine mi blimi etɛ; nɛ e pee afɛu níhi kɛ bɔle kla a kɛ kpe.

³² Nane eywiɛ ngɛ tlɔɔke kake sisi, nɛ a pee tso ɔmɛ nɛ ngɛ nane ɔmɛ a he ɔ kɛ tsa tlɔɔke ɔ; nane kake hiɔwe yami ji nine mi blimi etɛ.

³³ A pee tlɔɔke ɔ nane ɔmɛ kaa bɔ nɛ a pee ta zugba lɛ ní ɔmɛ; a sile akɔblee kɛ sɔ̃ nane ɔmɛ a he tso ɔmɛ, kɛ dade ɔmɛ, kɛ ni kpa amɛ tsuo.

³⁴ A pee ninehi ngɔ mɛtɛ tlɔɔke tsuaa tlɔɔke kɔ nya eywiɛ ɔmɛ, nɛ nine ɔmɛ, kɛ tlɔɔke ɔ tsa.

³⁵ Nɔ́ lokotoo ko bu tlɔɔke tsuaa tlɔɔke nya kɛ kpe; e blimi ji nine mi blimi kake. A pee nya bumi nɔ́ ɔ, kɛ e he nine ɔmɛ, kɛ tlɔɔke ɔ ngɔ tsa.

³⁶ A hlɔ kerubhi, jatahi, kɛ tã ngɔ wo nine ɔmɛ, kɛ akɔblee ní ɔmɛ nɛ a kɛ hɔɔ níhi a mi ɔ a he ngɛ he tsuaa he nɛ a na blɔ ngɛ; nɛ mɔmɔ jlasi bɔle mɛ kɛ kpe.

³⁷ Bɔ nɛ a pee tlɔɔke nyɔngma amɛ ji nɛ ɔ nɛ. A sɔ̃ mɛ tsuo fiee; a hɛɛ susumi kake kɛ henɔ kake.

³⁸ Jehanɛ, Huram pee akɔblee kã nyɔngma, tlɔɔke tsuaa tlɔɔke kɛ e he kã. Kã tsuaa kã a, kpa nine mi blimi kpaanyɔ maa kpe he, nɛ nyu lita lafa kpaanyɔ maa ya mi.

³⁹ E kɛ tlɔɔke enuɔ ma Yawɛ we ɔ leneyi je, nɛ e kɛ enuɔ ma omleyi je; e ngɔ nyu nɔ́ ɔ lɛɛ ngɔ ma we ɔ leneyi je kɛ beleku je a kpɛti kɔ nya he ko.

Yawɛ we ɔ mi dlami níhi

^40-45 Jehanɛ, Huram pee buɛhi, sofihi, kɛ kãhi. Yawɛ we ɔ he ní tsumi nɛ Matsɛ Salomo ha lɛ tsumi ɔ, e gbe lɛ tsuo nya. Níhi nɛ e pee ɔ ji nɛ ɔmɛ nɛ: Akɔblee titima enyɔ. Akɔblee kpɔ enyɔ nɛ ma titima amɛ a yi mi. Ya enyɔ nɛ a lo, kɛ mɔmɔ jlasi nɛ a pee kaa kɔsɔkɔsɔ ngɔ ma titima enyɔ ɔmɛ a yi mi. Akɔblee kpɔ kokloohi kaa tso yiblii lafa eywiɛ nɛ a pee ngɔ wo gbaka enyɔɔnyɔ a mi kɛ bɔle kpɔ ɔmɛ. Tlɔɔke nyɔngma. Kã nyɔngma. Nyu nɔ́. Akɔblee na ku nyɔngma kɛ enyɔ nɛ nyu nɔ́ ɔ maa si ngɛ a nɔ. Buɛ ɔmɛ, sofi ɔmɛ, kɛ kã amɛ. Yawɛ we ɔ he ní nɛ ɔmɛ tsuo nɛ Huram pee ha Matsɛ Salomo ɔ, akɔblee nɛ a sa he a kɛ pee.

⁴⁶ Matsɛ ɔ ha nɛ a sɔ̃ ní ɔmɛ ngɛ akɔblee galɔ ní tsumi he nɛ ngɛ Sukot kɛ Zaretan a kpɛti, ngɛ Yordan kɔ̃ ɔ mi ɔ.

⁴⁷ Salomo ha we nɛ a ngmɛ akɔblee ní ɔmɛ nɛ a pee ɔ, ejakaa a hiɛ tsɔ; lɔ ɔ he ɔ, nɔ ko nɔ ko li akɔblee ɔ nya.

⁴⁸ Salomo ha a kɛ sika tsu ngmingmiingmi pee ní nɛ ɔmɛ hulɔ kɛ ma Yawɛ we ɔ mi: bɔ sami la tɛ ɔ, okplɔɔ ɔ nɛ a kɛ abolo klɛdɛɛ ɔ maa nɔ ngɛ Yawɛ we ɔ,

⁴⁹ kane tso nyɔngma amɛ nɛ maa he klɔuklɔu pe kulaa a hɛ mi ɔ, enuɔ ngɛ leneyi je, kɛ enuɔ hu ngɛ omleyi je; mɔmɔ ɔmɛ, kane ɔmɛ, abɛɛle ɔmɛ,

⁵⁰ kplu ɔmɛ, la gbemi ní ɔmɛ, kã amɛ, kɛ ngɛyu ɔmɛ nɛ a kɛ jeɔ la a; he klɔuklɔu pe kulaa a sinya amɛ a se asa amɛ, kɛ Yawɛ we ɔ kpo nɔ je sinya amɛ a se asa amɛ.

⁵¹ Benɛ Matsɛ Salomo gbe Yawɛ we ɔ he ní tsumi ɔ tsuo nya a, e ngɔ níhi tsuo nɛ e tsɛ David gbaa nɔ ngɔ ha Yawɛ ɔ ngɔ to nito hehi ngɛ lejɛ ɔ. Ní ɔmɛ ji nɛ ɔmɛ nɛ: sika hiɔ, sika tsu, kɛ ni kpa komɛ.