Matsɛmɛ I, 6 - BAIBLO ALOO NGMAMI KLƆUKLƆU Ɔ

Salomo ma Yawɛ we ɔ

¹ Israel bi ɔmɛ a we Egipt jemi se jeha lafa eywiɛ kɛ nyingmi kpaanyɔ, nɛ ji Israel matsɛ, Salomo tsɛ yemi jeha eywiɛne ɔ we nyɔhiɔ enyɔne ɔ nɛ a tsɛɛ Ziv ɔ mi ɔ, Salomo je Yawɛ we ɔ mami sisi.

² We ɔ nɛ Matsɛ Salomo ma ngɔ ha Yawɛ ɔ kami ji gugue nyɔngma kɛ enuɔ, e blimi gugue enuɔ, kɛ e hiɔwe yami gugue kpaago kɛ fa.

³ Kue ɔ nɛ ngɛ Yawɛ we ɔ hɛ mi ɔ kami ji nine mi blimi nyingmi eywiɛ, kaa we ɔ blimi ɔ nɔuu; lɛ e blimi ji nine mi blimi nyingmi enyɔ.

⁴ Salomo pee saflɛhi nɛ blɔ ngɛ a mi ngɔ wo Yawɛ we ɔ he.

⁵ E ma tsu wawihi kɛ wo gbogbo ɔmɛ a he ngɛ kpo nɔ je, ngɛ we ɔ kasa hiɛ kɛ hiɛ, kɛ se ɔ tsuo.

⁶ E ma tsu nɛ ɔmɛ siaudo etɛ; zugba tsu ɔ blimi ji nine mi blimi nyɔngma, kpɛti nɔ́ ɔ blimi nine mi blimi nyɔngma kɛ enyɔ, nɛ hiɔwe nɔ́ ɔ blimi ji nine mi blimi nyɔngma kɛ eywiɛ. E pee kpokuhi kɛ wo we ɔ gbogbo ɔmɛ a he, nɛ e kɛ plai ɔmɛ fɔ nɔ; se e kɛ wui gbogbo ɔ mi. Kikɛ nɛ ɔ Salomo pee nɛ e kɛ tsa tsu ɔmɛ kɛ wo gbogbo ɔ he.

⁷ Tɛ nɛ a kó momo ngɛ tɛ gbami he nɛ a kɛ ma tsu ɔ; lɔ ɔ he ɔ, benɛ a ngɛ tsu ɔ mae ɔ, a nui hamle, loo gbiɛ, loo dade kpa ko nya ngɛ lejɛ ɔ.

⁸ Tsu tsɔwi siaudo etɛ ɔmɛ nɛ a ma ngɔ wo gbogbo ɔmɛ a he ɔ, zugba nɔ́ ɔ sinya a nya fɔɔ si kɛ yaa we ɔ leneyi je; nɛ gba he tso ngɛ nɛ a kuɔɔ kɛ yaa siaudo enyɔne ɔ, kɛ etɛne ɔ a nɔ.

⁹ Benɛ Matsɛ Salomo ma we ɔ gbe nya a, e sɛu nɔ kɛ seda plai, kɛ gbegbeli.

¹⁰ E ma tsu tsɔwihi siaudo etɛ, nɛ e kɛ seda plai tsa mɛ kɛ wo gbogbo ɔmɛ a he kɛ kpe. Siaudo tsuaa siaudo hiɔwe yami ji nine mi blimi nyɔngma.

¹¹ Yawɛ de Salomo ke,

¹² “We nɛ o ngɛ mae nɛ ɔ, ke o maa ye ye mlaa amɛ, kɛ ye fami ɔmɛ a nɔ ɔ, lɛɛ ma pee ha mo kaa bɔ nɛ i wo o tsɛ David si ɔ.

¹³ I kɛ ye ma Israel maa hi si, nɛ i be a he jee.”

¹⁴ Jehanɛ Salomo ma Yawɛ we ɔ gbe nya.

Yawɛ we ɔ mi dlami

¹⁵ Salomo ka seda gbegbeli ngɔ wo gbogbo ɔmɛ a he ngɛ we ɔ mi je, kɛ je zugba kɛ ya ta siaudo ɔ nya; zugba a nitsɛ lɛɛ e kɛ sɛsɛo ka mi.

¹⁶ E ma se tsu ko nɛ a tsɛɛ he klɔuklɔu pe kulaa a ngɛ we ɔ se je. E kami ji gugue enuɔ, nɛ a kɛ seda gbegbeli po mi kɛ je siaudo ɔ nya kɛ ba ma zugba.

¹⁷ Tsu nɛ ngɛ he klɔuklɔu pe kulaa a hɛ mi ɔ kami ji gugue nyɔngma.

¹⁸ Seda gbegbeli nɛ a ka ngɔ wo gbogbo ɔmɛ a he ngɛ we ɔ mi je ɔ ha tɛ ɔmɛ a hɛ mi; a je blɔ hlɔ tɔhi kɛ mɔmɔhi nɛ blɛke saminyawiiwi kɛ mɛtɛ he.

¹⁹ Salomo pee tsu ko ngɛ we ɔ kpɛti tutuutu, he nɛ a kɛ Yawɛ somi daka a maa ma.

²⁰ Kpɛti tsu nɛ ɔ kami ji gugue enuɔ, e blimi gugue enuɔ, kɛ e hiɔwe yami hu gugue enuɔ; nɛ a kɛ sika tsu ngmingmiingmi ha he. Bɔ sami la tɛ ɔ, a kɛ seda gbegbeli ha he.

²¹ Salomo kɛ sika tsu ngmingmiingmi ha tsu ɔ mi. E kɛ sika tsu kɔsɔkɔsɔ po piɛ ngɛ kpɛti tsu ɔ hɛ mi, nɛ e kɛ sika tsu ha lejɛ ɔ hulɔ.

²² E kɛ sika tsu ha we mluku ɔ tsuo he; bɔ sami la tɛ nɛ ngɛ he klɔuklɔu pe kulaa a hu e kɛ sika tsu ha he.

²³ Salomo kɛ oliv tso pee kerub enyɔ ngɔ ma he klɔuklɔu pe kulaa a; kerub kake kami ji nine mi blimi nyingmi enyɔ.

^24-26 Kerub enyɔ ɔmɛ a nɔ́ tsuaa nɔ́ sɔ fiee. Eko tsuaa eko hiɔwe yami ji nine mi blimi nyingmi enyɔ. A ngɛ pɛli enyɔɔnyɔ; pɛli kake mi blimi ji nine mi blimi nyɔngma. Lɔ ɔ he ɔ, pɛli enyɔ ɔmɛ nɛ a tsa kɛ je hiɛ kɛ ya si hiɛ ɔ peeɔ nine mi blimi nyingmi enyɔ.

²⁷ Salomo kɛ kerub enyɔ ɔmɛ ma a sibi a kasa nya ngɛ he klɔuklɔu pe kulaa a. A gbɛ a pɛlihi a mi; kerub kake pɛli kɛ e nyɛmi nɔ́ nya ya kpe ngɛ tsu ɔ kpɛti. Pɛli enyɔ ɔmɛ nɛ piɛ ɔ, nɔ kake nɔ́ nya sa gbogbo he ngɛ hiɛ, nɛ nɔ kake hu nɔ́ nya sa gbogbo he ngɛ hiɛ.

²⁸ Salomo kɛ sika tsu ha kerub ɔmɛ a he.

²⁹ A je blɔ kpɛ níhi kaa kerubhi, tã, kɛ mɔmɔhi nɛ a blɛke saminyawiiwi ngɔ mɛtɛ gbogbo ɔmɛ a he kɛ kpe ngɛ we ɔ mi blɔ, kɛ kpo nɔ blɔ tsuo.

³⁰ Zugba a nitsɛ po a kɛ sika tsu ha hɛ mi.

³¹ Salomo kɛ oliv tso kpɛ sinya enyɔ nɛ a bla ngɔ ma he klɔuklɔu pe kulaa a we agbo ɔ nya. Sinya yi mi tso ɔ, kɛ kasa nya ní ɔmɛ peeɔ kɔ nya enuɔ.

³² A je blɔ hlɔ kerubhi, tãhi, kɛ mɔmɔhi nɛ a blɛke ngɔ mɛtɛ sinya amɛ a he; a kɛ sika tsu ha sinya amɛ, tã amɛ, kɛ mɔmɔ ɔmɛ a he.

³³ Salomo ngɔ oliv tso kɛ kpɛ sinya tso kɔ nya eywiɛtsɛ kɛ ma we ɔ agbo ɔ nitsɛ nya.

³⁴ E kɛ sɛsɛo kpɛ sinya blablɛ enyɔ nɛ kuɔ fɔɔ nɔ.

³⁵ A je blɔ hlɔ kerubhi, tãhi, kɛ mɔmɔhi nɛ a blɛke ngɔ mɛtɛ he, nɛ a kɛ sika tsu ha he.

³⁶ Kue ɔ nɛ Salomo ma ngɛ we ɔ kpɛti ɔ gbogbo ɔmɛ ɔ, tɛ nɛ a kó gbaka etɛ, kɛ seda plai gbaka kake nɛ a kɛ pee lɛ.

³⁷ A to Yawɛ we ɔ sisi ngɛ Salomo yi nɔ jeha nɛ ji eywiɛ ɔ we nyɔhiɔ enyɔne ɔ nɛ a tsɛɛ Ziv ɔ mi.

³⁸ Salomo yi nɔ jeha nɛ ji nyɔngma kɛ kake ɔ we nyɔhiɔ kpaanyɔne ɔ nɛ a tsɛɛ Bul ɔ mi ɔ, a gbe Yawɛ we ɔ, kɛ e he nɔ́ tsuaa nɔ́ nya pɛpɛɛpɛ kaa bɔ nɛ a tsɔɔ kaa a ma lɛ ɔ. Lɔ ɔ he ɔ, jeha kpaago ji be tsuo nɛ Salomo ngɔ kɛ ma Yawɛ we ɔ.