Matsɛmɛ I, 5 - BAIBLO ALOO NGMAMI KLƆUKLƆU Ɔ

Salomo dla ní kɛ ha Yawɛ we ɔ mami

¹ Tiro matsɛ, Hiram kɛ David ɔ, huɛmɛ ji mɛ. Enɛ ɔ he je ɔ, benɛ e nu kaa a pɔ Salomo nu nɛ a wo lɛ matsɛ ngɛ David se ɔ, e tsɔ kɛ ya ha lɛ manye.

² Salomo kɛ sɛ gbi mane Hiram ke,

³ “Mo nitsɛ o le kaa akɛnɛ tsaatsɛ David kɛ e he nyɛli nɛ bɔle lɛ kɛ kpe ɔ ngɛ ta hwue he je ɔ, e nyɛ we nɛ e ma tsu nɛ a ma ja Yawɛ, e Mawu ɔ ngɛ mi kɛ ya si be mi nɛ Yawɛ ha nɛ e ye e he nyɛli ɔmɛ tsuo a nɔ.

⁴ Se jehanɛ lɛɛ Yawɛ, ye Mawu ɔ ha mi tue mi jɔmi ngɛ ye huza amɛ a mi he tsuaa he; i be he nyɛli, nɛ nɔ ko hu ti si kɛ wui mi.

⁵ Yawɛ wo tsaatsɛ David si ke, ‘O binyumu, nɔ nɛ ma ha nɛ e ye tsɛ ngɛ o se ɔ, lɛ ji nɔ nɛ maa ma tsu nɛ a ma ja mi ngɛ mi.’ I to ye yi mi kaa ma ma jamɛ a tsu ɔ ha Yawɛ, ye Mawu ɔ, nɛ́ a ja lɛ ngɛ mi.

⁶ Lɔ ɔ he ɔ, ha nɛ a hɛ seda tsohi ngɛ Lebanon ha mi. Ye tsɔli ɔmɛ ma ba piɛ o tsɔli ɔmɛ a he, nɛ ma wo o tsɔli ɔmɛ hiɔ bɔ tsuaa bɔ nɛ o maa tsɔɔ. Kaa bɔ nɛ mo nitsɛ o le ɔ, nɔ ko nɔ ko be Israel nɛ le tso hɛmi kɛ nyɛ Sidon bi ɔmɛ sɔ.”

⁷ Benɛ Hiram nu Salomo sɛ gbi ɔ, e ná bua jɔmi babauu, nɛ e de ke, “A gbaa Yawɛ mwɔnɛ ligbi nɛ ɔ, kaa e ha David binyumu ní lelɔ nɛ maa ye ma nguaa nɛ ɔ nɔ!”

⁸ Lɔ ɔ se ɔ, Hiram ngɔ sɛ gbi ngɔ mane Salomo ke, “O sɛ gbi ɔ ba su mi; nɔ́ tsuaa nɔ́ nɛ o ngɛ hlae ɔ, ma pee ha mo. Ma ha mo seda tsohi, kɛ sɛsɛo tsohi.

⁹ Ye tsɔli ɔmɛ maa muɔ tso ɔmɛ kɛ je Lebanon kɛ ba wo ɔ nya, nɛ ma ha a fi mɛ kɛ bla kɛ gu wo nɔ kɛ ya pue he nɛ o maa tsɔɔ mi. Ma ha nɛ a pɛne kpa a ngɛ a he ngɛ lejɛ ɔ, konɛ o ha nɛ a ba muɔ kɛ ho. Ngɛ moo o blɔ fa mi ɔ, ma suɔ nɛ o ha ye we bi ɔmɛ niye ní.”

¹⁰ Hiram ha Salomo seda tsohi, kɛ sɛsɛo tsohi nɛ e ngɛ hlae ɔ tsuo;

¹¹ nɛ Salomo hu ha Hiram ngma tɔni akpe enyɔ, kɛ nu nɛ a si lita akpe afa eywiɛ daa jeha kɛ ha e we bi ɔmɛ a nɔ hyɛmi.

¹² Yawɛ ye e siwo ɔ nɔ, nɛ e ha Salomo nile. Hiram kɛ Salomo hi si ngɛ tue mi jɔmi mi; mɛ ni enyɔ ɔmɛ a so somi.

¹³ Matsɛ Salomo hla nihi akpe nyingmi etɛ kɛ je Israel tsuo kɛ ha ma ní tsumi nɛ a nyɛɔ nɔ nɔ kɛ tsuɔ kpakpataa a,

¹⁴ nɛ e ngɔ Adoniram ngɔ pee a nyatsɛ. E dla mɛ ngɔ wo kuu etɛ a mi. Ke kuu kake mi bi akpe nyɔngma a ya tsu ní ngɛ Lebanon nyɔhiɔ kake ɔ, a maa kpale kɛ ba hi we nyɔhiɔ enyɔ. Jamɛ a be ɔ kɛkɛ kuu enyɔne ɔ ho Lebanon ya. Ke mɛ hu a ba pɛ kɛkɛ kuu etɛne ɔ hu ho. Ja sɔuu a hii a sibi tsakee.

¹⁵ Jehanɛ hu, Salomo ngɛ tɛ gbali akpe nyingmi kpaanyɔ, kɛ tɛ tlooli akpe nyingmi kpaago ngɛ yoku ɔmɛ a nɔ,

¹⁶ nɛ e ngɔ nihi akpe etɛ kɛ e nya lafa etɛ ngɔ to a nya, nɛ a hyɛ ní tsumi ɔmɛ a nɔ.

¹⁷ Ngɛ Matsɛ Salomo fami nya a, a gba tɛ kpakpa nguanguahi nɛ a he jua wa kɛ ba fia sisi tomi ha Mawu we ɔ.

¹⁸ Matsɛ Salomo tsu mali, Matsɛ Hiram tsu mali, kɛ Gebal bi ji ni nɛmɛ nɛ kó tɛ ɔmɛ, nɛ́ a dla tso ɔmɛ a he kɛ ha Mawu we ɔ mami ɔ nɛ.