Matsɛmɛ I, 4 - BAIBLO ALOO NGMAMI KLƆUKLƆU ƆSalomo tsɔli nikɔtɔma amɛ 1 Salomo ye tsɛ kɛ ha Israel tsuo, 2 nɛ e tsɔli nikɔtɔmahi ji nɛ ɔmɛ nɛ: Zadok binyumu Azaria ji osɔfo. 3 Matsɛ Pɛdiyohi ji Shisha binyumuhi Elihoref, kɛ Ahiya. Sanehi ngmalɔ ji Ahilud binyumu Yehoshafat. 4 Tatsɛ ji Yehoyada binyumu Benaya. Osɔfohi ji Zadok kɛ Abiatar. 5 Tsɔli ɔmɛ a nyatsɛ ji Natan binyumu Azaria. Matsɛ ga wolɔ ji osɔfo Zabud, Natan binyumu ɔ. 6 Matsɛ we ɔ nɔ hyɛlɔ ji Ahishar. Nihi nɛ a nyɛ ɔ a nɔ kɛ tsuɔ ma ní tsumi kpakpataa a a nɔ hyɛlɔ ji Abda binyumu Adoniram. 7 Jehanɛ, Salomo pee nyumuhi nyɔngma kɛ enyɔ amlaalohi ngɛ Israel zugba a tsuo nɔ. Mɛ lɛ a ba haa matsɛ ɔ, kɛ e we ɔ niye ní; nɔ tsuaa nɔ ba haa niye ní hlami kake ngɛ jeha mi. 8 Amlaalo ɔmɛ a biɛ, kɛ hehi nɛ a hyɛɛ nɔ ɔ ji nɛ ɔmɛ nɛ: Benhur nɔ́ mi ji Efraim yo ɔ nɔ. 9 Bendeker nɔ́ mi ji Makaz, Shaalbim, Bet Shemesh, Elon, kɛ Bet Hanan. 10 Benhesad nɔ́ mi ji Arubot, Soko, kɛ Hefer zugba a tsuo. 11 Benabinadab nɛ ngɔ Salomo biyo nɛ a tsɛɛ Tafat ɔ, e nɔ́ mi ji Dor tsuo. 12 Ahilud binyumu Baana nɔ́ mi ji Taanak, Megido, kɛ Bet Shan tsuo, ngɛ Zaretan kasa nya, ngɛ Yezreel leneyi je, kɛ ya pue Abel Mehola, kɛ Yokmeam. 13 Bengeber nɔ́ mi ji Ramot ngɛ Gilead, kɛ Manase binyumu Yair kɔpehi nɛ ngɛ Gilead ɔ. Lɛ kɛ̃ e nɔ́ mi ji Argob zugba a nɛ ngɛ Bashan ɔ nɛ. Ma nguangua nyingmi ekpa ngɛ zugba a nɔ; a fia gbogbo ngɔ wo a he, kɛ a nya agbohi nɛ a kɛ akɔblee pee. 14 Ido binyumu Ahinadab nɔ́ mi ji Mahanaim. 15 Ahimaaz nɛ ngɔ Salomo biyo ɔ nɛ a tsɛɛ Basemat ɔ, e nɔ́ mi ji Naftali. 16 Hushai binyumu Baana nɔ́ mi ji Asher kɛ Bealot. 17 Parua binyumu Yehoshafat nɔ́ mi ji Isakar. 18 Ela binyumu Shimei nɔ́ mi ji Benyamin. 19 Uri binyumu Geber nɔ́ mi ji Gilead, nɛ ji Amor Matsɛ Sihon, kɛ Bashan Matsɛ Og a zugba a. Nimli nɛ ɔmɛ a se ɔ, amlaalo kake ngɛ nɛ hyɛɛ zugba a tsuo nɔ. Salomo ye tsɛ ngɛ kplɔkɔtɔ mi 20 Nimli nɛ ngɛ Yuda kɛ Israel ɔ hiɛ babauu kaa wo nya zia; a yeɔ ní, nɛ a nuɔ ní, nɛ a náá bua jɔmi. 21 Nɛ Salomo ye tsɛ ngɛ ma amɛ tsuo a nɔ, kɛ je Yufrate pa a nya kɛ ya si Filisti bi ɔmɛ a zugba a, kɛ ya pue Egipt bi ɔmɛ a huzu ɔ nya tɔɔ. Je ma nɛ ɔmɛ wo tó ha lɛ, nɛ a sɔmɔ lɛ e wami be ɔ tsuo. 22 Daa ligbi ɔ, niye ní nɛ a ngɔɔ kɛ baa matsɛ we ɔ ji nɛ ɔmɛ nɛ: ngma mamu bukɔbukɔ lita akpe enuɔ, kɛ blɛfo mamu lita akpe nyɔngma, 23 nahi nɛ wo zɔ nyɔngma, kɛ nahi nɛ a lɛ mɛ ngɛ nga nɔ nyingmi enyɔ, kɛ to lafa; slo odabɔhi, adowahi, kɛ kungwɔhi nɛ wo zɔ. 24 Salomo ye tsɛ ngɛ zugba a nɛ ngɛ Yufrate pa a bonyoku je ɔ tsuo nɔ, kɛ je Tifsa hluu kɛ ya pue Gaza. Matsɛmɛ ɔmɛ tsuo nɛ ngɛ Yufrate pa a bonyoku je ɔ sɔmɔ lɛ; nɛ e kɛ je ma amɛ nɛ bɔle lɛ kɛ kpe ɔ hi si ngɛ tue mi jɔmi mi. 25 Salomo yi nɔ ɔ, Yuda kɛ Israel tsuo hi si ngɛ he jɔmi mi kɛ je Dan kɛ ya si Beersheba; nɔ tsuaa nɔ ngɛ lɛ nitsɛ e wai tso kɛ ngmɔkɔ tso. 26 Salomo ngɛ okpɔngɔ tsu akpe nyingmi eywiɛ kɛ ha e ta zugba lɛ ɔmɛ, kɛ okpɔngɔ ta buli hu akpe nyɔngma kɛ enyɔ. 27 Matsɛ Salomo ganɔhi nyɔngma kɛ enyɔ ɔmɛ a ti nɔ tsuaa nɔ ngɔɔ niye ní ba haa matsɛ ɔ, kɛ nihi tsuo nɛ a yeɔ ní ngɛ matsɛ okplɔɔ ɔ he ɔ. Nɔ tsuaa nɔ kɛ e nɔ́ baa ngɛ nyɔhiɔ nɛ a to lɛ ɔ nɔ; nɔ ko pui mi. 28 Jehanɛ, ngma, kɛ nga nɛ a kɛ haa okpɔngɔ ɔmɛ, kɛ lohwehi nɛ a he sɔɔ ɔ, ganɔ tsuaa ganɔ kɛ e nɔ́ baa be mi nɛ a ngɛ hlae ɔ. 29 Mawu ha Salomo nile, nɔ́ sisi numi, kɛ juɛmi nɛ nya wa babauu nitsɛ bɔ nɛ a be nyɛe maa kale. 30 Salomo le ní pe ní leli nɛ ngɛ beleku je kɛ Egipt tsuo. 31 E le ní pe nɔ tsuaa nɔ; e le ní pe Etan, Ezrahi no ɔ; e le ní pe Mahol binyumuhi, Heman, Kalkol, kɛ Darda; nɛ e he biɛ ngɛ je ma amɛ tsuo nɛ bɔle lɛ kɛ kpe ɔ a mi. 32 Salomo bu abɛ akpe etɛ, nɛ e po la akpe kɛ e nya enuɔ. 33 E tu tsohi a he munyu kɛ je Lebanon seda tso ɔmɛ a nɔ hluu kɛ ya si nga tsɔwi nɛ puɛɔ ngɛ gbogbohi a nɔ ɔ a nɔ. E tu lohwe nane eywiɛtsɛmɛ, pɛlitsɛmɛ, kɛ ní nɛmɛ nɛ sãã si, kɛ lohi a he munyu. 34 Zugba a nɔ matsɛmɛ ɔmɛ tsuo nu e nile ɔ he, nɛ a woɔ nihi blɔ kɛ yaa ya buɔ lɛ tue. |
Bible in Dangme © Bible Society of Ghana, 2018.
Bible Society of Ghana