Matsɛmɛ I, 3 - BAIBLO ALOO NGMAMI KLƆUKLƆU Ɔ

Salomo bi nile

¹ Salomo ya to Egipt matsɛ ɔ ngatsɛ. E ngɔ Farao ɔ biyo, nɛ e kɛ lɛ ba hi David ma a mi kɛ ya si be nɛ e ma matsɛ we ɔ, kɛ Yawɛ we ɔ gbe nya, nɛ́ e fia gbogbo ngɔ wo Yerusalem he.

² Jamɛ a be ɔ, a na we nɛ a ma we ha Yawɛ lolo; lɔ ɔ he ɔ, ma a ya nɔ nɛ a sã bɔ ngɛ wɔ piɛ ɔmɛ a mi.

³ Salomo suɔ Yawɛ, nɛ e ye e tsɛ David mlaa amɛ a nɔ; se e gbe lohwe, nɛ e sã tsopa kɛ e he via ngɛ wɔ piɛ ɔmɛ a mi.

⁴ Ligbi ko ɔ, Salomo ya Gibeon, nɛ́ e ya sã bɔ. Gibeon ji he nɛ wɔ piɛ nguaa a ngɛ; nɛ bɔ sami la tɛ ɔ nɛ ngɛ lejɛ ɔ, e nɔ Salomo sã sami bɔ akpe abɔ ngɛ ba be.

⁵ Jamɛ a nyɔ ɔ mi ɔ, Yawɛ je e he kpo ngɔ tsɔɔ Salomo ngɛ nlami mi, nɛ e bi lɛ ke, “Mɛni o suɔ nɛ ma ha mo?”

⁶ Salomo he nɔ ke, “O na tsaatsɛ David, o tsɔlɔ ɔ mɔbɔ babauu; ejakaa e ye mo anɔkuale, nɛ e pee nɔ́ nɛ da, nɛ e kɛ mo hi si saminya kɛ tsui mi faa. O mɔbɔ nami nɛ se pui nɛ ɔ tsa nɔ kɛ ba si o ha lɛ binyumu nɛ ba ngɛ tsɛ yee ngɛ e se mwɔnɛ nɛ ɔ.

⁷ Yawɛ ye Mawu lee, o ha nɛ i ba ngɛ tsɛ yee ngɛ tsaatsɛ David se, be mi nɛ jokuɛ bɔbɔyoo kɛkɛ ji mi, nɛ́ i li nɔ́ ko nɔ́ ko.

⁸ Ne mi ngɛ nimli nɛ o je blɔ hla mɛ kɛ pee mo nitsɛ o ma, nimli kpekpemi nɛ nɔ ko be nyɛe maa kane mɛɔ a kpɛti.

⁹ Lɔ ɔ he ɔ, i kpa mo pɛɛ, ha mi nile nɛ ma kɛ ye o ma a nɔ ngɛ dami sane yemi mi; nɛ ma le slɔɔto nɛ ngɛ nɔ́ nɛ da, kɛ nɔ́ nɛ dɛ a kpɛti. Ke pi ja a, lɛɛ kɛ ma pee kɛ ye o ma kpekpemi nɛ ɔmɛ a nɔ kɛɛ?”

¹⁰ Nɔ́ nɛ Salomo bi nɛ ɔ sa Yawɛ hɛ mi.

¹¹ Lɔ ɔ he ɔ, Mawu de lɛ ke, “Akɛnɛ o bi nile nɛ o kɛ ye dami sane, se o bi we ke o wami se nɛ kɛ, aloo o ma na ní, aloo a gbe o he nyɛli ha mo he je ɔ,

¹² nɔ́ nɛ o bi ɔ, ma pee ha mo. Ma ha mo nile, kɛ nɔ́ sisi numi babauu bɔ nɛ nɔ ko hí si hyɛ nɛ e kɛ mo sɔ, nɛ o se hu nɔ ko nɔ ko ba be nae nɛ e kɛ mo maa sɔ.

¹³ Jehanɛ, nɔ́ nɛ o bi we tete hu ma ha mo; o wami ligbi ɔmɛ tsuo ɔ, ma ha o ma na ní, nɛ o hɛ mi maa ba nyami bɔ nɛ matsɛmɛ ɔmɛ a ti nɔ ko nɔ ko kɛ mo be sɔe.

¹⁴ Nɛ ke o maa bu mi tue, nɛ o maa ye ye mlaa amɛ a nɔ kaa bɔ nɛ o tsɛ David pee ɔ, ma ha o wami se maa kɛ.”

¹⁵ Salomo hɛ tsɛ, nɛ e na kaa nlami lɛ e nla. E ya Yerusalem, nɛ e ya da si ngɛ Yawɛ somi daka a hɛ mi, nɛ e sã sami bɔhi, kɛ tue mi jɔmi bɔhi. Lɔ ɔ se ɔ, e ngmɛ e tsɔli ɔmɛ tsuo okplɔɔ.

Salomo kojo sane ko nɛ he wa

¹⁶ Ligbi ko ɔ, yi ajuamahi enyɔ ba Matsɛ Salomo ngɔ kɛ sane ko.

¹⁷ Nɔ kake de lɛ ke, “Nɛnɛ, i kɛ yo nɛ ɔ tsuo ngɛ we kake mi; nɛ i ba fɔ binyumu ngɛ we ɔ mi ngɛ e hɛ mi.

¹⁸ Nɛ́ i fɔ se ɔ, ligbi etɛne ɔ, yo nɛ ɔ hu ba fɔ binyumu. Wɔ ni enyɔ nɛ ɔmɛ pɛ lɛ wa ngɛ we ɔ mi lejɛ ɔ; nɔ kpa ko piɛ we wa he.

¹⁹ Ligbi ko nyɔ mi ɔ, yo nɛ ɔ hwɔ e binyumu ɔ nɔ, nɛ jokuɛ ɔ gbo.

²⁰ Nyɔ mi kɔ̃kɔ̃ɔ̃kɔ̃ benɛ i hwɔ mahe ɔ, yo nɛ ɔ te si nɛ e ba wo ye binyumuyo ngɛ ye kasa nya, nɛ e kɛ lɛ ya hɔ e mi si; nɛ e wo lɛɛ e binyumuyo ɔ nɛ gbo ɔ kɛ ba hɔ ye mi si.

²¹ Mɔtu benɛ i te si nɛ ma ha ye bi ɔ nyɔ ɔ, i na kaa e gbo. Se benɛ i hyɛ lɛ saminya a, i na kaa pi ye bi ɔ.”

²² Se yo kaketsɛ ɔ de ke, “Dɛbi! Ye bi ji nɔ nɛ hɛ ngɛ ɔ nɛ; o bi ji nɔ nɛ gbo ɔ nɛ!” Nɔ kake ɔ hu de ke, “Dɛbi! O bi ji nɔ nɛ gbo ɔ, nɛ ye bi ji nɔ nɛ hɛ ngɛ ɔ nɛ!” Bɔ nɛ a hua sane ɔ he kɛ ya kɛ ba ngɛ matsɛ ɔ hɛ mi ji nɛ ɔ nɛ.

²³ Kɛkɛ nɛ Matsɛ Salomo de ke, “Nɔ kake ke, ‘Ye bi ji nɔ nɛ hɛ ngɛ ɔ, nɛ moo o bi ji nɔ nɛ gbo ɔ nɛ;’ nɛ nɔ kake hu ke, ‘Dɛbi, mo mohu o bi ji nɔ nɛ gbo ɔ, nɛ ye nɔ́ ji nɔ nɛ hɛ ngɛ ɔ nɛ.’ ”

²⁴ Matsɛ ɔ ya nɔ nɛ e de ke, “Saminya, nyɛ ha mi klaate!” Benɛ a kɛ klaate ɔ ba a,

²⁵ e de ke, “Nyɛɛ dla bi nɛ hɛ ngɛ ɔ mi enyɔ, nɛ nyɛɛ ngɔ fa ngɔ ha nɔ kake, nɛ nyɛɛ ngɔ fa hu ngɔ ha nɔ kake.”

²⁶ Kɛkɛ nɛ nɔ tutuutu nɛ ji bi nɛ hɛ ngɛ ɔ nyɛ ɔ tsui mi sã lɛ ngɛ e bi ɔ he, nɛ e de matsɛ ɔ ke, “Nɛnɛ, i kpa mo pɛɛ, koo gbe jokuɛ ɔ. Ngɔɔ lɛ ngɔ ha yo ɔ kɛkɛ.” Se yo kaketsɛ ɔ de ke, “Dɛbi! E be ye nɔ́ pee, nɛ e be mo hu o nɔ́ pee; a dla e mi enyɔ.”

²⁷ Jehanɛ Salomo de ke, “Koo gbe jokuɛ ɔ! Ngɔɔ lɛ kɛ ha kekleekle yo ɔ; ejakaa lɛ ji bi ɔ nyɛ nitsɛnitsɛ.”

²⁸ Benɛ Israel ma a tsuo nu bɔ nɛ Matsɛ Salomo buá sane ɔ he ha a, a bu lɛ wawɛɛ nitsɛ; ejakaa a yɔse kaa Mawu ha lɛ nile nɛ e kɛ kojo ngɛ dami sane yemi nya.